DEUTERONOMIO
Jehován yunuima jau chibankin akubainxanunbun Moisin jakidi jatu jancha yusinikiaki, na janchadan
1
Mae betsa Suf besuudi Jene Jordán ukedi badi juaikidi mae betsa betsapa Parán inun, Tófel inun, Labán inun, Haserot inun, Dizahab namakis tsua janu jiweabumanu jawen kena Arabá anuxun jatun tadi jiwe puntebaunabu anuxun Israelin enabu dasibibun ninkaibun eska jancha Moisin jatu yuinikiaki. 2 Mati Horeb jawen kena betsa Mati Sinaí anua bui Seír baiwen 11 día kai mati tibi dunkeatanbaini mae betsa Cadés-barnea anu jikinibuki. 3-4 Jene Jordán kexa betsaudixun Moisin jatu yunua Amorreo nawabu xanen ibujaida Sihón, mae Hesbón anu jiwea jawen detenamenikabube Israelin enabu jatu maemashinabu Moisin ana jatu yunua mai pakea kesuakea Edrei anu Basán nawabu xanen ibujaida Og Astarot anu jiwexun jatu yunuaya Israelin enabun Og inun jawen detenamenikabu jatu maemakin keyushinabu Egipto anua taxnibidanibu ma 40 año kaya 11 uxetian xaba ja dukun taeaya ja nawabu jatu yamawashinabu jabiatiandi Moisin jaska dasibi Jehován yunuima jau chibankin akubainxanunbun Moisin jakidi jatu jancha yusinikiaki. 5 Jene Jordán kexa betsaudia jadidia badi juaikidixun Moab nawabu mae ewapa panpawan anuxun yusinti jancha Moisin jatu yusin taewakin yuikin:6 “Mati Horeb anuxun nukun mekenika Dios Jehován nuku yuikin: ‘Matudan, na mati dapi man janus jiwei chaipaki. 7 Natian nenua benibainkatsi matun mabu pewatan bukanwen, ja Amorreo nawabu janu jiwebaunabu inun jatu dapi dasibi jiwebaunabu mati matipa anudan. Jaska inun buidan, Arabá anu mapanpa inun kepanpa inun, mai tsusin Négueb anu inun, ianenwan kexa kepanpa Canaán nawabun mae anu inun, Líbano anu inun, ana nortekidi chaijaida jene ewapa Éufrates anudi ja mai dasibi anu jadi bukanwen. 8 Ja mai jidabi dasibi Abraham inun, Isaac inun, Jacob inun, matunabu pakubainxanaibudi matun xenipabu ea Jehován inankatsi en jatu yubani anu bukin janu jiweabu mebinkin putakin jatu yamawatan ja mai jidabi ibuwakubainxankanwen’, akin Jehován nuku yuini en matu shinanmaii”, akin Moisin jatu yuinikiaki.
***************