—Jehová matun xenipabun mekenika Diosun mai pepa matu ibuwamaxanai anu jadi jikikin ibuwatan man janu jiwexun chibankin jawen yunuti inun jawen nemati yusini natian en matu ana yusiain ninkatan jakimama aki jawen jiwekubainxankanwen, chintuanmadan. 2 Jaska en matu yusiainan, ana betsa wakin chichikin ewa wama inun jancha betsa tede akama jaska matun mekenika Jehován yunua besti chibain pejaidaxunkubainxankanwen. 3 Baal-peor mae anuxun en jancha ninkama matunabu betsa betsapabun jatun kenwanti dami mishkiki danti iki beti ixun kenwainmabuwen taexun Jehován jatu kupikin tenankin keyuai matu dasibibun jaska man uinmaki. 4 Jakia matun mekenika Dios Jehová dasibibun jawen jancha man chibainbudan, natian man jiweyuabuki. 5 Jaskaken matunan, uindakanwen. Janu man jiwexanai anuxun jawen jancha man chibankubainxanunbun Jehován jancha kushipa inun jawen yunuti inun jawen nemati jancha ea yuikubidana en matu yusindiakubidanimaki. 6 Jaskawen taexun Jehován jancha ninkakin man akubainaibu tsuabunda matu uinkin man unanepabu inun man ninkanikabu matu uinkin shinanxankanikiki. Jehován jancha man chibanmiskidi tsuabunda ninkakin yuikubainkin: “Ja yudabu ichapabu patapama yusin ninkanikabu inun unanepabuki”, akin matukidi yuitidubuki. 7 Jakia nawabun jatun kenwanti yushibu ichapa jayabun kenwankin yukabiabu jawa jatu ninkatan kematidumaki. Jakia nukubudan, nukun mekenika Dios Jehová nun jaya jawenchains nun yukai tibi nuku ninkatan kemakubainikiki. 8 Na yunuti jancha inun jawen nemati jancha pepa natian en matu inanxu keska, ¿jadatu yudabu jatun beya pepa jayabumen? Jaska jayabumaki. 9 Jakia 40 año dasibi man uinkubidanshina man jakimataskayamaxanunbun uindajaidakubainxankanwen, shinan jeneamadan. Jaska man uinkubidanai shinain jiwekubainkin na jabias jancha inun jawada man uinkubidanai matun bakebu inun matun bababu xabakabi jatu yusinkin tapinmakubainxankanwen— iwanan,

10 jatu ana yuikin:

“Jadia nun juima anu Mati Horeb dapi Jehová bebun matun ibubube man mapubaunibu en shinaiin. Jadixun Jehován ea yuikin: ‘Israelin enabu ea bebun ea jatu ichawaxunwen, en jancha en jatu yusiain ninkakin tapintan jau xaba tibi eki mesekin ea kenwandiakubainxanunbunan. Jabiaskadi wakin jatun bakebu jatu yusinkin jau jatu tapinmadiapakexanunbunan’, ea wa 11 en matu ichawaken mati tenanman matun ibubube man bea mapuabun mati anu chi jede ji ji ikaunaya chi kuin nai anu inakain meshu dunuken 12 janua Jehová chi jede namakis anua janchaya jawen jui ninkakin jawa dami man uianma inibuki. 13 Jabiatiandi jawen yubati jancha matun ibubu yuitan chipu mati anuxun jawen 10 yunuti inun jawen nemati jancha mestenepa mesejaida mishki sapa dabeki Jehován kenea jau unankin man tapintan akubainxanunbun matu yununiki. 14 Janu mai pakea betsa jatu mebinkin ibuwatan jadixun jawen jancha chibain man ikubainxanunbun jawen yunuti inun jawen nemati jancha ea matu yusinmakubainkatsi bebunkidi Jehován ea yununiki”, iwanan,

15-18 Moisin ana jatu yuikin:

“Mati Horeb anua chi jede namakis Jehová nixun matun ibubuya matu jancha wai jawen jui besti man ninkaniki, jawa dami yushin keska uianmadan. Jaskawen taexun jaki meseti wakin matunan, jawa dami betsa wataskayamaxankanwen. Uindajaidakubainxankanwen. Dami wakin juni itsa inun, ainbu itsa wakin inun, yuinaka itsa inun, peiyabu itsa inun, nutawen mapumisbu itsa inun, baka itsa wakin jaska taska dami wai chakabuyamaxankanwen. 19 Ja dikabi naiudi uinkin badi inun uxe inun bishi inun bishi kauani chaxakainai bechitan jaki mesei ‘¡Jabaa!’ iki datekin jaska kenwanyamakubainxankanwen. Yudabu dasibi medabewakin jawada shadabu nai anua uintidubu Jehován jatu damiwaxuniki. 20 Diosun Egipto anua matu mebikinankidankin matu paxawakinan, jawena wabidankin matu iweniki. Na jabiatian man jawenabuki. 21 Nun jawenabu kayabibia matuwen taexun en kaneaya Jehová eki sinatakin ea yuikin: ‘Jene Jordán min puketiduma inun mai pepa en jatu ibuwamaxanai anu min jikitidumaki’, ea waniwen taea 22 na jabia mae anua bestikiaki en mawaxanaii, Jene Jordán pukebainamadan. Jakia matubunan, pukebain ja mai pepajaida man ibuwaxanaii. 23-24 Jakia matun mekenika Dios Jehová yaushinikatun chiwen dasibi kuamis keska matuki sinatatiduwen taexun jaska matun mekenika Dios Jehován matu yubani jawen jancha jakimama inun jabiaskadi dami betsa betsapa ja dami watima matu nemani jabu tibi jakimama uindakubainxankanwen.

25 Mai pepa anu jikinixun bake pawai inun baba pawai ja mai anua anibui jakimakubainkin ja kenwanti dami betsa betsapa shinankin man axanimenkain. Jaska wakin matun mekenika Jehová bebunxun chakabu tibi wakubainkin man sinatamatidubuki. 26 Eskawen shinanti xabakabi en matu waii. Nai inun mai jabu chanitidubu keska wakin en matu unanti wamaii. Na en matu jancha wai danankin man chakabuwakin Jehová sinatamai jaudi man kaxanai anua man debui keyuxanaii. Jadi man jiwei chaipama itiduki, yamai keyuidan. 27 Man chakabuwai matu kupikin nawa betsa betsapa anu sa akin Jehován matu ubisitawaxanikiki. Matu jaska wa jatidi eskadabes jatun mae anu man jiwebaunxankanaii. 28 Nawa betsa betsapabu anuxun jadixun yushin junibun jatun mekenen dami wakin ji inun mishki dami wamisbu ja damidan, uintidubuma inun, ninkatidubuma, inun pitidubuma inun, juinsinatidubumabiaken nawabun beya chibankin man jatubetan kenwanxanaii. 29 Jadixun atimas yushin dami danankin matun mekenika Dios Jehová jakimatan dananbianixun ana benakin matun yushin jidabiwen inun matun juinti jidabiwen shinain man ana jaki nukutiduki. 30 Man nuitapai inun man bika teneai uinkin atimas shinan betsa watan ana chintunkidan jaska Jehován matun ibubu yusini man ana ninkakin akubaintiduki. 31 Dateyamakanwen. Matun mekenika Dios Jehová nuikipajaidatun matu putama inun matu yamawama ixanikiki. Jaska matun xenipabu yubanixun jakimama matu ana mekekin jeneama ikunkainxanikiki.

32 Shinankanwen. Unu jiwei taenibutian inun jadi man jiwei taenitian ikubidanshinabudan, Diosun mai jidabi dami wakin juni wani anua mai nati ikin tsuabuda man jatu yukatiduki. Na jaska en matu yuiai keska nukun Jehová Diosun kushipa keska betsabun unanibumenkain. Uindiakanimenkainan, na jaska nun uinshina keskadan. 33 ¿Chi jede pueai medanua Dios janchai nawa xukua betsan ninkatan debuama inibu jayamen, jaska man ninkani keskadan, chi medanua janchaidan? 34 Jaska matun mekenika Dios Jehován matun ibubu katuxun abidani keska nawa betsabudan, ¿tsua jaska keska jayabumen? Eska tibi akinan, matun ibubu katuxun jawen unanti ichapa inun, jawen unanmati dami ichapa inun, dami itimaska betsa betsapa wakin jawen kushipawen jatu datemakin jatu detenamemakin Egipto anua Jehován matunabu abidani keska jabias man uini keska wakin mekenika yushin betsanan, ¿atidumen? Jaska keska jayamajaidaki. 35 Matun mekenika yushin pepa chanima kayabi Jehová Dioski. Tsuan Dios binua ja keska betsa jayama matu unanmaniki, jaska matu shinanmakinan. 36 Nai anuxun jawen juiwen matu jancha wakin man kaneaibu matu pewakubidaniki. Janua mai anuxundi jawen kushipa chi jede medanua Jehován jancha taxniai man ninkakubidaniki. 37 Matun xenipabu bechipai jatuwen nuikunkidaniwen taexun matunabudi pakubainaibu katutan jawen kushipa mentsisipajaidawen mebinanankin Egipto anua Jehován matu taxnimabidaniki. 38 Janua mai pepa jatu mebinmakin matun bedubi nawa xukua tibi matu nichinxunkin jabu midima matu binuan kushipajaidabiabun jatun mae betsa betsapa anua Jehován matu jatu putaxunkubidankin dama keyuikiki. Matu jaska waxunaya jatun maiwan inun jatun mae tibi man mebinkubainxanaii, ibuwakinan, natian matu axuain man uiain keskadan. 39 Jaskawen taexun matun shinanwen tsuma pewatan jakimayamakanwen, mistu pewakinan. Matun mekenika Dios Jehovádan, nai inun mai jidabi jawenaski. Mekenika ja keska Yushin Pepa betsan binuan tsua jayamajaidaki. 40 Jaska natian en matu yunuai keska jawen yunuti inun jawen nemati jancha Jehován matu yunuima akin chibankubainxankanwen. Man jaska waibun maiwan ibuwamakin Jehován matu inain anu matu inun matunabu pakubaini badi ichapa janus jiwepakexankanikiki”, jatu wanikiaki.