“Israelin enabuun, matu yuinun ea ninkakanwen. Nukun mekenika Dios Jehovádan, bestichaiki, jatun kenwanti dami betsa betsapa keskamadan.

5 Jaskaken matun mekenika Dios Jehová bechipaikin matun juinti dasibiwen inun matun jiwea dasibiwen inun matun kushipa dasibiwen duawakubainxankanwen, jeneamadan.

6 Na jaska dasibi en matu yuixu matun shinan medan netantan jakimayamakubainkanwen. 7 Ja dikabi na jaska tibi en matu yusinxu jaska tibi jakidi janchakin matun bakebu yusinkubainxankanwen, matun jiwetanxun inun, bai namakixun inun, uxaitian inun, man besteaintianan. 8 Na yunuti jancha kenexun jakimatimakin bichi bau pishta watan nexatan matun mepitiki inun matun betunkuki nexetan jaya mapukubainxankanwen. 9 Ja dikabi matun jiwe beputi istabin dabeki jabias na yunuti jancha kenekubainxankanwen. Ja inun, matun mae kenekauana janu jikimisbu xui beputi anu jabiaskadi wakin kenediakubainxankanwen”, itan,

10 “Matun mekenika Jehován matun xenipabu Abraham inun Isaac inun Jacob mai pakea yubani anu ma matu jikimai kaikiki. Mae ewapa jawendua shadabu anu dayakin man beniama ini nawabun ayamabu anu Jehován matu ma ibuwamai kaikiki. 11 Jiwe pepa mabu mata jaya jawa man janu aduama inibu inun, unpax banakin man pukianma idiani inun, uva bai waxun man banama idiani inun, miban ji olivo ichapa man banama idiani man ibuwaxanaii, ja mae anuxun bimi pikin yaniwai pepeidan. 12 Egipto anuxun matun ibubu dayadu esclavo wanixun jatu ichakawaibu jawen kushipawen Jehován jatu mebikinantan iwekubidanixun mai pepa anu ma matu jikimadan, jaska tibi bestikidi shinankin nukun mekenikaki pechitan jakimayamakubainxankanwen. 13 Jaska shinain Jehováki mesekin kenwain ja besti dayaxuni pexunkubainxankanwen. Tsuabuda man yubakakatsis ikaidan: ‘En mia padanmaki’, iwanan, Jehován kena bestiwen xabakabi yubakakubainxankanwen. 14-15 Matun mekenika Jehová Dios matube jiweadan, yaushinanki, jawa chakabu jusia uinkatsi ikama pepa besti matu uinun ikadan. Jakia man kanekubainaya jawaida matuki sinatakin Jehován matu yamawatiduki. Jaskawen taexun matu dapi jiwebaunxanaibudan, jabun yushibubu tibi kenwanmisbu jayaki. Jatu chibankin jatubetan kenwanyamaxankanwen”, jatu anikiaki.