—Nukun xenipabun mekenika Dios Jehován ja mai pakea yunukin matu ibuwamaxanai anu jikitan na jancha en matu yusiain jadixun Jehován yunuti inun jawen nemati jancha matun jiwea jidabiwen man chibankin akubainxanunbun en matu yuiai ea ninkakanwen. 2 Jene kexa betsaudixun yuda betsa betsapa xukua tibibun mae jatu mebin man jatube detenamekubainxanaii. Januxun jatun yushibubu kenwanmisbu yamawakin keyukubainxankanwen, mati keyatapa anu inun mati tenanman anu inun ji tupan namanxun jabun januxun kenwanmisbudan. 3 Januxun jawen kenwanti chi tapu tekekin keyukin inun, jawen kenwanti mishki nichinibu dudukin keyukin inun, chibu nichinibu januxun kenwanmisbu kua keyukin inun, jatun yushibubu dami wanixun kenwanmisbu yamawakin keyuxankanwen. Ja dami uinkin jatun yushibu shinanmisbu dasibi tede akin keyukubainxankanwen, ja jatun yushibu dami jau tsuan ana shinanyamaxanunbunan.

4 “Jaska jatun yushibubu kenwanmisbu keska chibankin nukun mekenika Dios Jehová ja itsa watan kenwanyamaxankanwen. 5 Jene kexa betsaudi matunabu xukuabu tibitun mai pakea ibuwaimabun jadatuda mae Jehován ja mae katua janu jaki nukuti tadi jiwe jawen kena janua kaian anu kaxun kenwankin matun mekenika benimawakin man kenwankubaintidubuki. 6 Ja Jehová benimawati inabu menukin keyuti inun, diezmo inanti inun, jamapai medabenanti inun, jaki tanai bebunkidi min yubakaima inankuinti inun, matun shinanen besti inankuinti inun, jabu dukun ina awa bake bene inun chaxuwan kaiainbu ja jiwe anu jadi dasibi jatu inankin bupaxankanwen. 7 Jaska man daya chakayamakubainai yunu matu inanshina shinankin Jehová bebunxun ichaxun matunabubetan besti pi benimakin uinmakubainxankanwen, Jehová Diosun matu duawakubainshinawen taexunan.

8 Natian jaska nuku tibitun shinankin jaska nun bechipaiai nun akubainaibu keska ukedi puketan na man ikai keskayamaxankanwen. 9 Chanimajaida ja mae anu man unanuma jiwekubainxanai anu Jehován matu inanxanai anu man jikidiamaki. 10 Jakia Jene Jordán ma puketan janu Jehován matu ibuwaxuni anu jikitushitan janua matuki sinataibu Jehován jatu matu nemaxunaya jawama dateama man unanuma jiwekubainxanaii”, jatu watan.

32 januxun Moisin ana jatu yuikin:

“Jaska en matu yusinkin yunukubidanai akubainkin jenetaskayamaxankanwen, jancha betsa tede akama inun jancha betsa chichikin betsa wamadan.