Matunabu anua jaska idiamabia bebunkidi unantan matuki chanitidubu inun namakin uintan matu yuitidubu taxnitan 2 jaska idiamabia bebunkidi matu yuishina ikaya ana matu yuikin: ‘Yushibubu man unandiamabia ja chibankin ichaxun duawakin kenwanankanwen’, akin matu yuibiabu 3 ninkakin ikunwanyamakubainxankanwen. Jakia matun jiwea dasibiwen inun matun shinan dasibiwen man Jehová bechipaiai matu unankatsis ixanikiki. Jaskaya ja juni nematan chibanyamaxankanwen. 4 Jakia matun mekenika Jehová besti chibankin kenwain jaki dasia jiwexun jawen jui ninkakin jawen yunuti inun jawen nemati akubainkin dayaxunkin duawakubainxankanwen, yusinan betsa betsapabu ninkamadan. 5 Egipto anu matun ibubu ichakawakin jatu dayadu esclavo wakubainaibun janua matun mekenika Jehován jawen kushipawen matun ibubu paxawani jakimayamakubainxankanwen. Na junibun jatun yushin betsa matu chibanmakatsi ikin Jehová matu dananmakin jawen jancha matu ninkamamakin Jehován jancha chibain man jawen pei jiwebiaken ja junibun jaska idiamabia matu yuitidubu inun namawen uintan matu unanmatidubu jatu detekin tenanxankanwen. Jaska wakin chakabu matu anua man bextetidubuki”, jatu watan.