“Ukedi maiwan pakea matun mekenika Dios Jehován matu ibu wamaxanai anu ibuwai jikitanan, nawa betsa betsapabun jabun jamapai beya atimapa chakabujaida jayabuki. Jatu uintan jatu mawayamaxankanwen. 10-11 Jabunan, yushibu chakabubu daewakatsi ikin jatun bake mishtinbu inankin menu keyuxunmisbu inun, yushibu jatu yukaxunikabu inun, juni mukaya mesebu inun, nai anu bishi dua unanikabu inun, yushinbe janchanikabu inun, yushinwen xun itiabu inun, yudabu mawabube janchanikabu matu dapi jiwebaunxankanikiki. Jaska tibi jatuna tapinkin mawayamaxankanwen. 12 Tsuabunda jaska waibu danankin Jehován bechipaitidumajaidaki. Jaska nawabun beya chakabujaida jayabuwen taexun matu bebuxunkainkin matun mekenika Dios Jehován jawen kushipawen matu jatu nichinxunkubainxanikiki. 13 Jehová Diosun matu uianyan jawen jancha jawa kaneama pepakubainxankanwen. 14 Nawa betsa betsapa man jatu nichinxanaibun jadixun jatun mukayabun jaska inunbadiai jatu yusiainbu ikunwanmisbuki. Jawada taxnixanai bebunkidi yuimisbu jayabudiki. Jamen matudan, matun mekenika Jehová Diosun jabun amisbu keska matu nemamiswen taea jatu chibain jaskayamakubainxankanwen.

15 Matun mekenika Dios Jehován jawen jancha yuixunika betsa ea keska katutan matunabu anua matu taxnimaxunxanikiki. Diosun matu jaska waxunaya jawen jancha ninkakubainxankanwen. 16 Mati Horeb anu ichaxun Jehován jui kushipa ana ninkakatsi ikama ea yukai eska janchai: ‘Jehován jui nun ana ninkakatsi ikamaki. Jawen chi jede kushipa tuenai nun ana uinkatsi ikamadiki, mawakatsi ikamadan’, akin jaska matun ibubun ea yukanibuki. 17 Jatun jancha Jehován ninkatan ea yuikin: ‘Jaska shinankin yuiaibudan, peki. 18 Jatu anua en jancha ea yuixunika mia keskadi katuxun en taxnimaxanaii. Kushipa wakin jaska en yunua jatun ea jabu yuixunkubainxanikiki. 19 Jamen en kenawen janchakin ea jatu yuixunai tsuabunda jawen jancha ninkama ikubainaibu eanan, en jatu kupixanaii. 20 Jakia tsuabuda en kenawen janchabiakin jawada en ja yuiama jawen shinanen besti matu yuiaibu inun yushin betsan kenawen janchakin matu yuidiaibu jatu ninkama tenanxankanwen’, akin Jehován ea yuiniki. 21 Jaska en matu yuiaya matun juinti medan shinankin: ‘Tsuanda Jehován jancha yuiaidan, ¿jaskatan nun unantidumen?’ man itiduki. Matu yuinun ea ninkakanwen. 22 Jehován kenawen janchakin matu yuibiabu jaska yuiai jawa kaianmaken Jehován jatu yunuamaki. Jakia kanekin jatu kenwanmanun ika jatun shinanen besti matu yuiaibu jatun jancha ninkama jatuki dateyamakubainxankanwen”, akin jawenabu Moisin yusinikiaki.