“Natunan, ma chakabuwaxuki”, akin bestichaitun jaska jawada jakidi chakabu yuibiaya xanen ibubun jau ninkayamanunbunwen. Jakia dabetun kasmai, dabe inun bestitun jabias janchawen chitekin yuiaibu ninkaxun unanti watan xanen ibubun kupitidubuki.

16 “Jaska inun, juni betsa chakabu yuda betsaki sinatakin jawa meai uianmabia jaki kayai kunyan ikaya 17 ja dabe betsa jaki kayanun betsan jawa meamawen taea ja idabeaya Jehován jatu ninkaya jatu iyuxun jawenabu Diosbe janchaxunikabu inun xanen ibun jawada chakabu inun pepabu unanti wanikabu bebunxun ja dabe nichintan Jehován jatu ninkaya 18 unanti wanikabun jatu yuka chakayamakin ja jaki chanichakai ja kunyan ixu chani unantan 19-21 jabias kupiti yuda betsaki chanichakakin nuitapawaxunwen taexun xanen ibubun jau ja juni chakabun jaska shinanxu keska jawa jawen nuiamajaida jau kupikubainxanunbunwen. Jawen jiwea benumakinan, kechaish akin xeta paskediakinan, jawen bedu tsekadiakinan, jawen tae kasmai jawen meken mextediakinan, ja chanichakaibu matun xanen ibun jatu kupiaibu ninkatan jawen datei jatun shinan chakabu bextekekubainxankanikiki. Jatu jaska wakin matu anua ja chakabu man yamawakubainxanaii”, akin Moisin jatu yusinikiaki.