Moisés mawanikiaki, na janchadan
34
Jawenabu yusinkin keyutan Moab nawabun maiwan panpa anua kai Mati Nebo anu mapekei ana mati kubudu betsa jawen kena Pisgá mamaki nixun jabias besusi Jericó uian anudan, januxun Jehován Moisés uinmakin jatixun Galaad enabu inun Danen enabun jatun mai pakebukuan kesua ixanai uinmakin 2 inun janu Neftalín enabu jatun mai pakea anu jiwebaunxanaibu inun, janu Efraínen enabu inun, Manasésin enabu jiwebaunxanaibu anu inun, badi jikiaikidi Ianenwan Mediterráneo kexa kesua anu jatixun Judán enabu jiwebaunxanaibu uinmakin 3 inun napanpa mai tsusin jawen kena Négueb anu inun, Jene Jordán kexa panpa inun, Jericó mae napanpa ewapa anu janu paniwan mapubauna anu kesutani mae pishta jawen kena Sóar kesua uinmakin keyutan 4 Jehován Moisés yuikin:“Ja maiwan jidabidan, min xenipabu Abraham inun Isaac inun Jacob jabu tibi yubakin: ‘Ja maiwan pakea matunabu pakubainaibu en jatu ibuwamaxanaii’, akin ja dabe inun besti en jatu yubaniki. Ja maiwan pakea min beduwen min uinun en mia uinmaii. Jakia ukedi pukebaini min katidumaki”, akaya
5 jabiaskadi Jehován bebunkidi yuimadan, Jehován tsuma Moisés mawaken 6 Moab nawabun maiwan pakea anu Bet-peor besusi napaku anu jawen yuda Jehová Diosun maiwanikiaki. Mawa janida jawen yuda Jehován maiwanidan, na jabiatian tsuan unanmakiaki. 7 120 año jayabia jawen bedu inun jawen yuda babuama Moisés mawanikiaki.
8 Ma debua unantan Moab nawabun maiwan panpa anu Israelin enabun Moisés manui shinain kaxai 30 día kaxakubaini nesenibukiaki. 9 Januxun bebunkidi Josué katukin jawen meken dabewen Moisin mamepixun jawen unanepati kushipa Moisin Josué yunuimawen taexun jaska Jehován Moisés yunumaima keska wakin Josuén jancha Israelin enabun jadi ninkakin taewabainibukiaki.
10 Moisés keska Diosun jancha yuixunika betsa Israelin enabu anua tsua jaska keska jayama inibukiaki, jaska jabe beisinain janchapauni keskadan. 11 Jatu eska waxunidan, Egipto anuxun jatun xanen ibu Faraón inun jawen xanen ibu bexmasbu inun jawenabu dasibi kupikin jawen dateti unanmati dami Moisin jatu axuni inun, 12 jaska Diosun kushipa inun jawen mesejaidawati dami tsuan atiduma jatu waxuain Israelin enabu dasibibun uinkubainibu tsuan jaska keska wakin Moisés binutidubumajaidakiaki.