2 “Israelin enabu xukuabu tibi anua xanen ibubu jatun jancha ninkamisbu bestibu katuxun jatu yunukin mai pakea Canaán anu janu Israelin enabu en ibuwamaxanai anu jau june uinbauntanunbun jatu nichinwen”, aka

3 jaska Jehován Moisés yunushina keska juni kushipabu jatu katubaunxun janu tsua jiweabuma Parán anu ixun Moisin jatu yunua Canaánkidi kai jikitan

25 janua 40 xaba mai pakea jidabi uinbaunkin keyutani ana chintunbidani 26 Parán janu tsua jiweabuma anu mae betsa jawen kena Cadés anu Moisés inun Aarón inun Israelin enabu dasibibu januxun jatu manai maniabu anu jatuki ana nukutan jaska ja mai pakea anu uinbaunshinabu dasibibuki chanikin bimi pepa janua beshianbu jatu uinmabaunkin keyutan 27 jabuan Moisés yuikin:

—Ja mai pakea anu min nuku yunua janu kaxunan, chanimajaida awa chuchu inun buna batapa jene jabai keska piti pepa jamen ikikiki, na piti jaska shadabu yunu jayadan. 28 Jakia ja yudabu janu jiweabudan, kushipajaidabuki. Jatun mae ewapajaida mishkiwen kenekauana keyatapajaidaki. Janua jatube detenamenun ika tsua jikitidubumaki. Ja dikabi, Anacin enabu keyatapa ewapabu pakubainaibu nun uindiashinaki. Nun jatuwen dateshinaki. 29 Mai tsusin anu jawen kena Négueb anu Amalecin enabu ichapa jiwebaunabuki. Hitita nawabu inun, Jebuseo nawabu inun, Amorreo nawabu mati matipa anu jiwebaunabuki. Ianenwan ewapa kexa anu inun Jene Jordán kexabukun Canaán nawabu midima jiwediabuki— jatu waibun

30 jaskaibu Caleb jatube kaxun uindiatanshinxun yudabu inun Moisés bebunua ja ibaunaibu jatu jancha nesewatan jatu yuikin:

—Kushipatan ja mai pakea jatu mebinanxankanwen. Jatun mae tibi achitan nun ibuwatidubuki— jatu waya

31 jabe butanshinxun Caleb kemakin yuikin:

—Jamaki. Jaskamajaidaki. Nun jatube detenametidubumaki. Jabudan, kushipajaidabuki, nuku binuadan— ikin

32 Israelin enabu dasibi jabu dasibibu butanshinxun jatu yuikin:

—Jadi kaxun ja mai pakea nun uinbauntanshinadan, chakabujaidaki. Ja yuda janu jiweabudan, yuda betsabu bechipaiama jatu detemisbuki. Yuda ewapabu midima nun jatu uinshinaki. 33 Ja dikabi Anacin enabu keyatapa ewapa pakubainaibudi nun uindiashinaki. Nun jatube nia tananameadan, nun jatu naman shini tiubuki. Jabun nukudi jabiaskadi nuku uinshinabuki— jatu wabu.