Moiséski María inun Aarón ja inibukiaki, na janchadan
12
Moisin Etiopía nawa ainbu ainwanshinken jawen taexun ja ainbu danankin Moisin pui María inun jawen betsa Aarónen Moiséskidi jancha chakabukin 2 yuikin: “Jehovádan, Moisés bestibe janchama nuku dikabibe janchadiatiduki”, iki ibubis keainbun Jehován jatu ninkakin 3-4 Moisés chanima mai jidabi anua tsua keskama ibubis keinsmaken jaskawen taexun Moisés inun Aarón inun María Jehován jatu yuikin:—Nenua taxnikaini janu eki nukuti tadi jiwe anu bukanwen— akin jatu yuia
janu buabun 5 nai kuin butuawen Jehová ma butua janu jaki nukuti tadi jiwe jawen beputi bebun nixun Aarón inun María jatu kena ja dabe beabu 6 Jehován ana jadixun jatu yuikin: “Eska en matu yuiai ea ninka pewakanwen. Matu anua en jancha ea yuixunika katutan uxa namai inun betsa watan jaska ixanai bebunkidi en matu unanmamiski. 7 Jakia en tsuma Moisés pepa dasibibu binua chintuinsmabe janchaidan, en jaskaismaki. 8 Jabe janchaidan, beisinanbukuin en jabe janchamiski, jancha xabakabiwenan. ¿Jaskai ea uin ebe beisinanbiamisken jaki dateama man jaki jancha chakabui ikai?” jatu wai
9 Jehová jatuki sinata chakayamatan kai 10 janu jaki nukuti tadi jiwe anua nai kuin benibainkin María kupibaina jawen yuda jidabi lepra chami chakabui mesejaida ma juxupai keyuken Aarón nasukekaun uian María ma chami juxupai keyuken 11-12 datejaidakin Moisés yuikin: “En Xanen Ibuun, ¿en nuitapai mia ea apa? Unainsmapai patapai nun chakabuxuwen taexun nuku kupiyamawe. Bakeishta kaindiama ma debua chapui taei kaian keska nukun pui María jaska kupitan jeneyamawe”, aka
13 jawen jancha ninkatan Moisin Jehová jatu yukaxunkin: “En mekenika Diosuun, ana jaska wama min kupixu jenetan ea xuxawaxunwen”, aka
14 Jehován Moisés kemakin yuikin: “Tsuanda jawen epa chakabuwa jaki kemu bekuxu aka dakekin 7 xaba taxnikain tsua uinsmaki. Jaska keskadi wakin nenua min pui nichinwen, jau mae benanta jiweyutanunan. 7 xaba keyuaya jawen dake main jawen bichi xuxaya matuki ana dasitiduki”, aka
15 jaska Moisin ninkatan María jawen mae anua benanta nichianbu ka 7 xaba mae benanta anu tadi medibi María jiweyuaya jawenabu jani buyuama jabianu jiweyuabun 16 ma María xuxa ana chintunkidanken Haserot anua Israelin enabu dasibi ana taxnibaini bukubaini janu tsua jiweabuma anu jawen kena Parán anu jikixun jatun tadi jiwe puntebaunabun