Israelin enabun nami pikatsis ikaibu Jehován jatu yubanikiaki, na janchadan
11
Xaba betsatian bika tenekubaini june Jehováki ja ikaibun Jehován jatu ninkai jatuki sinatajaidakin jatun tadi jiwe puntebaunabu dapi chi jede dekutan putabaunaya 2 yudabu bibiski ibaunkin jau jatu medabewanun Moisés yukabu januxun Moisin ninkatan Jehová jatu yukaxuna ninkatan Jehován chi jatu nuka waxuniki. 3 Januxun Jehová jatuki sinatakin chi jedewen jatu menukeanshinawen taexun jadi shinankin kenakin: “Na mae kenadan, Taberáki”, anibukiaki.4 Yuda betsa betsapa xuku betsa Egipto anua jatube paxai beimabu Israelin enabube jiwekubidani piti pepa bestikidi shinankubidanaibun atimas Israelin enabudi jatubetans shinan chakai kaxai yuinamekin: “Uatian nun pimis keska tsuan nuku nami inanpainun nun pintsi ikaii. 5 Egipto anuxun baka midimajaida jamen nun pikubainimadan, en shinanjaidaii, pintsikinan. Ja dikabi pepino inun, melón batapa inun, puerros inun, cebolla inun, ajo nun jamen pikubainmis nun shinanjaidaii. 6 Jakia nenuxun nun jawa piama buni tenei mawaii. Jawa betsa jayama na nai anua dudu maná besti pikubaini nun ma jatsanshinaki”, ikubainaibun
7 ja piti manákidi matu yuinun ea ninkakanwen. Manádan, uinkin culantro jexe keska inun ji xuku pashinipa keskaki. 8 Jawen piadan, jawen nis xekiwan misi xeniyabi bawaxun pia keskaki. Ma badi keyaya nai anua dudu maná binun ika buxun bitanxun denekin kasmai tin tin akin pewatan unpaxki juatan kasmai misi wakin unpax eskadabeyabi mishpu waxun ichawaxun tsuikin bawakin misi wakubainibukiaki. 9 Meshu medandi nibi ichatan jatun mae jidabi anu tuis tuis iki nai anua dudu manaundia nidi ipaunikiaki.
10 Jatun tadi jiwe jikiti anu Israelin enabu tibi jawenabube pintsiaibuwen taea kaxai keskai june Jehováki ja ikaibu Moisin ninkai, Jehová jatuki sinatajaidaya jatun jancha bechipaiamadi 11 Moisin Jehová yuikin:
—En min tsumadan, ¿jaskakin min ea ichakawai? ¿Jawa ekidi chakabu min jayamen? Minabu min ea jatu iwemaima eas bika tenemakanikiki. 12 Janu jatun xenipabu min jatu yubani anu jatu iyukinan, bakeishtan chuchu akai keska ikuxun en jatu iyuxanun ¿min ea yunuimamen? En jatun epamenkain. En jatun ewadaka. En jaskamaki. 13 ¿Jania en jatu nami bixuain, na yuda midimajaidabun jau pinunbun nami jatu bixunkinan? Kaxakubidani bexun ea yuikin: “Nun nami pikatsis ikai nuku bixunwen”, ea akeakekanikiki. 14 Na yudabu ana enmesti en jatu iyukatsi ikamaki, ea bika tenema chakayamaibuwen taexunan. 15 Min jaskas ea dayamakin jatu iyumaidan, en bechipaiamaki. Jaskakenan, jawaida ea tenandiwe. Min ma ea tenanan, ana en bika teneai min ea uianma ixanaii— aka
16 Jehován Moisés kemakin yuikin:
—Tsuabuda ja jabun jatu yunua jatun jancha ninkamisbu 70 xanen ibubu unanepa katutan ea jatu ichawaxunbidanwen. Janu Dioski nukuti tadi jiwe anu jatube juwe, mibetan jau ea manai benunbunan. 17 Uiainbu bututan en mibe janchai kaii. Jau jabuan mia medabewakin ja yubabu mibetan jau mekekubainxanunbun en yushin min jayadan, paxkaxun jatu tibi en inanbaunxanaii, mawaida ana mimesti bika teneama jatube min medabenanxanunan, minabu jatu medabewakin iyuidan. 18 Minabu eskaibu en ninkaii. Pintsijaidai kaxakubidankin yuikin: “Egipto anuxun nami pikubaini nun pe jiweimaki. Jakia nenu nun juima tsuan nuku nami inanmaki, nun pinunbunan”, ikaibu en Jehován ma en jatu ninkawen taexun meshukidi en jatu nami inanxanaii. Jaskawen taexun jatu yunuwe, jau jatun chakabu jenei shinan betsai nashinunbunan, meshukidi nami en jatu inan pikatsidan. 19-20 Ea Jehová matube kakin en ninkayamaya keska ¿jaskai man ea danan paepawai? Kaxai yuinamei: “¿Jaskatanun ika nun taxnikidanimamen, Egipto anuxun pikin pewabiaidan?” iki “Ikis man janchakunkainaiwen taexun xaba bestichaima, inun xaba dabemadi inun, 5 xabama inun, 10 xabama inun, 20 xaba bestima jatian besti man nami piama ikubainxankanaii. Jakia uxe bestichai man nami pikubainxankanaii. Pikubaini jatsantan janankatsis iki man katsa janankunkainxankanaii, dekin xuiwen dikabi janan beidan”, akin ea jatu yuixunwen— aka
21 Moisin kemakin yuikin:
—Na yudabu midimajaida ainbu inun bake mishtinbu tanama 600,000 junibu besti ebe beaibun ¿ja jati yudawanan, min nuku pimai? Mian yuikin: “En jatu nami inan uxe bestichai pikubainxankanikiki”, min ixuki. 22 ¿Jania jatida nukun chaxuwan inun nukun ina awa detekubainkin dasibi nun jatu pimakubainxanai? Uxe bestichai nun jatu pima keyutidumaki. Damaki. Ja dikabi ianenwan anua baka dasibi bikin nexe keyuxun nun jatu pima keyua damadiki— aka
23 Jehován Moisés ana kemakin yuikin:
—Min ea shinanan, en kushipadan, ¿pexeishta dabanen min ea shinain ikai? Natian jaska en mia yuiai en mia axuntidumenkain, en mia axuntidumamenkain, min uinxanaii— aka
Israelin enabu 70 xanen ibu betsabu jawen janchaxunikabu Diosun jatu wayunikiaki, na janchadan
24 janu Dioski nukuti tadi jiwe anua Moisés taxnikidan jaska Jehován yuixu jawenabu ichawaxun dasibi jatu yuitan januxun jaska Jehován yunuxu keska wakin Israelin enabu 70 xanen ibubu ichawabain janu Dioski nukuti tadi jiwe dapi jatu kekunbauna 25 janua nai kuinwen Jehová bututan Moisésbe janchai menetan januxun ja Yushin Moisés inainma jaya paxkatan ja 70 xanen ibubuki inanbaunaya ja Yushin jatu medan jikikin jatu achia Diosun jancha yuixunikabu keska jatu janchamatan ana jaska jatu janchamama inikiaki.
26 Ja 70 xanen ibubu jatu katua xanen ibu dabe Eldad inun Medad janu Dioski nukuti tadi jiwe anu buama jatun mae anua niti itan bashikubiabun ja Yushinen jatu achidia jabudi Diosun jancha yuixunika keska janchai taeaibun 27 jaska janchaibu bedunan ninkatan kushikain Moisés yuikin:
—Un unu nun ika anuadan, Eldad inun Medad Diosun jancha yuixunikabu keska janchakanikiki— akaya
28 januxun Nunen bake Josué bedunanbiatun Moisés medabewakin taewabidanimatun Moisés yuikin:
—En xanen ibu Moisiin, jatu nemawe, jau ana jaska janchayamanunbunan— aka
29 jakia Moisin Josué kemakin yuikin:
—¿Jaskakin min ea yaushimai, jatu nemakatsis ikinan? En shinanan, jawenabu dasibi jawen jancha yuixunika wakin Jehován jawen Yushin jau jatu achimakin keyununwen— atan
30 janua jatun mae anu Israelin enabu xanen ibubube Moisés chintuainbun
Kuma ichapajaida Jehován jatu yununikiaki, na janchadan
31 Jehován ianenwan bexun akin niwe yunua kuma xuku tibi midima niwe kushipatun xunku abidan abidankin jatun tadi jiwe puntebaunabu anu inun jatun mae jidabi kesukauna anu butubauni jatixunda xaba bestichai juni katidutixun kuma midima butukin mai achikin keyubainabu janus matsamanabaini buspu tsaua jawen keyatapa metrotia kesuabun 32 ja xabatian inun meshu jidabi inun xaba ja kachu betsatiandi yudabun kuma achitantankin betsabun ichapa bikin inun jatiditun eskadabes bikin 10 kuki ewapa matawakin ja kuma detetan pewakin chapatan tsusinwankin jatun jemaintin anu dasibibun badinwankin manchinbaunxun 33 ja dukuntun nami pidinun, iwanan, kuma bawaxun pikin Israelin enabun nasa nasa akaibun jaska waibun Jehová jatuki sinatajaidakin kupikin yuda midima isin chakabuwen jatu jawaida tenankin keyunikiaki. 34 Pintsiwen taea besti kemukin shinankubidani mawakanxuwen taexun ja mae kenakin: “Quibrot-hataaváki”, anibukiaki, nukun janchawen yuiadan, “Pintsiwen taea besti mawabu janu maiwatiki”, akinan.
35 Quibrot-hataavá anua Israelin enabu ana maei bui Haserot anu jikia janu bashikua maniabun