—Unpax nuku inandiwe, nun anunan— akanwanbu Moisin jatu yuikin:

—¿Jaskai man eki ja ikai? ¿Jaskakin Jehová nukun mekenika Dios man unanti wai?— jatu wa

3 ninkabiatan yudabun unpax manujaidakin Moiséski ana ja ikin yuikin:

—¿Jaskakin nuku unpax manumakin nuku inun nukun bakebu inun nukun inabu debu wanun, iwanan, nuku bika wakin: “Bunankanwen”, akawankin Egipto anua min nuku iweimamen?— akubaunabu

4 jatuki Moisés datekin Jehová yukakin:

—Jawa en jatu axuanma en manaya mishki tunkuwen tsaka tsaka akin ea tenantidubuki. ¿Jatu jawa waxunpa, na yudabudan?— aka

5-6 Jehován Moisés kemakin:

—Minabu ichapa bashiyubaini kakin Israelin enabu xanen ibu betsabube besti mia dukun bebukain ja Egipto anuxun min mestenti jiwen ja ianenwan min jawen bekushima bukin tsumabaini kaxun ja Mati Horeb anuxun en mia manai niken ja mishkipanwan min mestentiwen kushaxanwen. Min jawen kusha unpax tuei jabaxanikiki, minabun jau akubainunbunan— aka

Moisin jatu iyui kakin Israelin enabu xanen ibubun bedubi ja mishkipanwan jawen mestentiwen Moisin kusha jawaida unpax tuei ishchunikiaki. 7 Israelin enabu ja ikaibuwen taexun ja mae anu unpax tuea Moisin kenakin: “Meribáki”, atan ja dikabi Jehová Dioskidi yudabun Dios unanti wakin yuikin: “Jehová Diosun nuku medabewaimenkain. Danankin nuku medabewamadaka”, ikaibuwen taexun jabias mae Moisin kenakin: “Masáki”, anikiaki.

8 Ja mai panpa Refidim anua Israelin enabu budiabumaken jatu nichinun ixun Amalec nawa ichapabu bexun jatu dete taewaibun meshuaya jatu jenebaini meshukidi ana jatu detekatsi manaibun 9 januxun Moisin jawen medabewanika Josué kenaxun yuikin:

—Meshukidi Diosun kushipa mestenti ji tsumatan ja mati mamaki anuxun matu uin en jadi nibaixanaii. Jaskawen taexun nukunabu detenamea unainbu jatu katuxun jatu pewatan Amalec nawabu detekin jatu binumakin jatu nichinxankanwen— aka

10 jaska Moisin yunuai keska wakin Josuén jawenabu detenamea unanjaidaibu ichapa katukin jatu ichawaken janua penaya Aarón inun jawen chai Hur Moisésbe mati pishta anu mapekeaya Amalec nawabube detenamei taeaibun 11 jadixun jawen mestenti Moisin manaundi sananyan Israelin enabun jatu detekin maemaibun janua Moisés ma punxukua juindukunun ika punpanianyan Amalec nawabun jatu detekin maemaibun 12 janua Moisés ma jin ika ana jawen punyan sanantidumaken jawaida mishki ewapa bexun jaki tsauntan yusmaudi Aarónen metsuan yusiudi Hurin metsundiatan janua Diosun kushipa mestenti ji ja dabetun Moisés tsumamaxun Moisés sananmabaikin badi jikidiama Moisés jin iki punpanindiamaken 13 Moisés jaskaken Josué jawenabubetan jatun deteti nupe chaipa kenujaidawen detekin Amalec nawabu mawakin jatu nichinibukiaki.

14 Chipu Jehován Moisés ana yuikin:

—Mai jidabi anu Amalec nawabukidi shinantima wakin en tede akin keyuxanaii. Jabias jancha jawen jatu shinanmati una anu kenetan Josué yuikin unanmawe— aka

15 jaska yunua Moisin atan jawen kenwanti chi tapu waxun kenakin: “En Jehová Dios jau ea unanpakexanunbun na kena en waxuki”, iwanan, 16 yuikin: