—Moisiin, Jacobun bakebu pakubainaibu, Israelbudan, na jabias jancha min jatu yuitanun en mia yuiai ea ninkawe. 4 “Jawada Egipto nawabu en akima inun tete peiwen nuyai keska kushipawen matu iwekin en matu mekebidana man uinkubidanshinaki. 5 Janunkain en jancha ninkakin en yubati jancha man chibankubainaya mai jidabi enaswen taexun nawa xukuabu tibi anua en matu katuni enabu pepabus man ikunkainxanaii. 6 Matu dasibi ebe janchanika xanen ibubu wakin enabus medibi wakin en matu jiwemakubainxanaii”, akin na jabias jancha minabu Israelin enabu ea jatu yuixuntanwen— aka

7 jaska wa ninkabidan butuxun jatu kenaxun xanen ibubu ichawaxun Jehován jancha Moisin jatu yuia xanen ibu tibitun jawenabu jabias jancha jatu yuidiabu 8 jabiatiandi Israelin enabu dasibitun ninkatan kemakin:

—Jehován jancha min ma nuku yunuxu ninkatan chibankin nun akubainxanaii— akabu

yudabu janchakanxu Moisin bui ana mapeketan Jehováki chanikin banabima 9 janua Jehován Moisés yuikin:

—Uian. Nai kuin matun mae anu butetan ja medanua nun janchanameaya minabun ninkatan jau min jancha ikunwankubainxanunbun janua en mibe janchai kaxanaii— iwanan 10-11 —Minabu anu en jatu anu butukatsi ikai ikis inun meshukidi jau penunbun jatu yuiwe. Uxa dabetan dasibibun uiainbun Mati Sinaí anu en butuxanaiwen taexun nashikin jatun tadi patsakin pewatan jau ea manaxanunbunwen. 12 Na mati en matidan, jau janu kemayamaxanunbun jawen nemati jatu waxunxanwen. Jaska watan jatu yuiwe, jau uindaxanunbunan, mesekidan. “En jatu kenamadan, mati anu jau mapekei janu kemayamaxanunbunwen. Jau janu bua binukain paiyamaxanunbunan, jadatuda ninkamas binukain kanekin chakabuwayadan, jau mawanun kupikin tenanxankanwen. 13 Mekenen deteama jakia mishki tunkuwen tsaka tsaka akin inun pia kuinwen tsakakin jatu tenantidubuki, matunabu kasmai matun inabudan”, akin na jabias janchawen nemakin ea jatu yuixuntanwen. Eska besti ninkatan minabu ja mati anu kematidubuki. En chaxuwan maxun pudi atiwen jatu kenakin chan akai ninkatanan— aka

14 Moisés mati anua butukidan jawenabu jaskakain jau mati dapixun jatun mekenika Jehová kenwanxanunbun jatu yunua jawenabu nashikin jatun tadi patsa keyuabun 15 juni ewabus Moisin yuikin:

—Na man jaskaitianan, Dioski nukukatsidan, matumebi pepai ana uxa dabei matun ainbe chutanameyamakanwen— jatu waya

16 xaba dabe inun besti penaya nai anua tin ikainkaini kana baka baka ikaya mati mamaki kuin meshu mayai anua jui chaxuwan maxun pudi akin chaipa waya ninkai jatun tadi jiwe anua yuda dasibibu datei saki saki ikaibun 17 Dioski jau nukui bununbun Moisin jatu iyua mati tenanman anu jawen nemati anu mapuabun 18 mati mamaki chi jede medan Jehová ma butuawen taexun chi kuinen Mati Sinaí jidabi achimakin bai ewapa kua keska jawen kuinwen mati anu pacha sakumaya 19 chaxuwan maxun chan ichakayamai jeneama chaipaya Moisés janchaya tin ikainkainai keska juiwen Jehován kemaya 20 ja Mati Sinaí ja besti budu keyatapajaidanu bututan jau janu nianu mapekenun Jehován Moisés kena janu mapekeaya 21 Jehován yuikin:

—Ea uinun ika jawen nemati binubidani ichapa jau mawayamanunbun jatu nemai ana butuwe. 22 En jatu kupiyamaxanun ebe jatunabu ea janchaxunikabudi chaima eanu kemanun ika jatun shinan jau pepa wanunbunwen— aka 23 Moisin Jehová kemakin:

—Mianu nun mapekepanan: “Na mati jawen nemati kenebaunkin enas ea waxunwen”, akin min ea yuishinaki. Min nuku nemashinawen taea Mati Sinaí minasken mianu kemanun ika mapeketidubumaki— aka

24 Jehován ana yuikin:

—Bututan Aarón iwei ana jutanwen. Jakia eanu bekatsi ikaibu ea jatu janchaxunikabu inun minabu dasibi bei jawen unanti jau binubidanyamanunbun jatu nemawe, jakia ninkamas eanu beaibu en jatu kupitidukidan— aka

25 butuxun Moisin jabias jatu yuia