Diosun nemati inun jawen yunuti meken dabeti jatu inanikiaki, na janchadan
20
Januxun dasibitun jau ninkanunbun Dios janchakin eska jancha jatu yuikin:2 “Eadan, en matun mekenika Jehová Dioski. Jabun Egipto anuxun matun xenipabu tsuma wakin esclavo wanixun dayama chakayamakin bika jatu tenemaibu jadia ean en matu iweimaki.
3 Jaskaken jamapai yushin betsa betsapa duawakin kenwanyamakubainxankanwen, ea besti en matun Jehová Dioskidan.
4 Ja inun, betsadan, jawada jawen kenwanti dami wakin yushin itsa wayamakubainxankanwen, nai anu jiweabu inun, mai anu jiweabu inun, jawada jene medan jiweabudan. 5 Ja yushin betsa betsapa dami tibi anudan, ja bebun danti ixun duawakin kenwanyamakubainxankanwen. Matun mekenika Dios Jehovádan, en eaki, tsuabuda enabu waxun jatu mekei en jatu yaushimisdan. Jabun ea danankin dami betsa kenwainbu jatun ibubun chakabuwamisbuwen taexun jatun bakebu inun, jatun bababu inun, jatun bababun bakebu en jatu kupikubainxanaii. 6 Jakia jatun ea bechipaikin en yunuti jancha ninkatan chibanpakexanaibudan, jabu inun jatun bakebu paibu jatu bexteama jatuwen nuikin en jatu duajaida wanunbadiaii.
7 Ja inun, betsadan, eadan, en matun mekenika Jehován kenaki meseama jamen xabakabi yuiyamakubainxankanwen. Jakia meseama en kena jamen yuibaunaibu jawa jatu jakimama en jatu kupixanaii.
8 Ja inun, betsadan, sábado juindukuntitian jakimama ea shinain ja xabatian enas ikubainxankanwen. 9 Dayaidan, 6 xaba besti janu dasibi matun daya akubainxankanwen. 10-11 Eanan, nai inun, mai inun, jene inun, janu jiwea akeakeabu 6 xaba dayakin en jatu damiwaniki. Jakia janu juindukunti wakin séptimo xaba medibi wakin janu ea kenwanti xaba pewakin en medibi waniwen taexun semana tibi 6 xaba ikunkainaya matun daya dasibi akubainxankanwen. Jakia séptimo xabadan, janu matun mekenika Dios Jehová, eadan, janu ea shinanti juindukuntitian ipakexanikiki. Janu dayatimadan, matun juni bakebu inun, matun ainbu bakebu inun, matun juni tsumabu inun, matun ainbu tsumabu inun, matun inabu inun, nawa betsabu matun mae anu jiweabu jabu dayatidubumadiki.
12 Ja inun, betsadan, matun epa inun matun ewa duawakubainxankanwen. Man jaska waibun ja mai pakea anu iyuxun en matu ibuwamaxanai anuxun matu inun matunabu pakubainaibu badi ichapa inankin en jatu duawakin pe jiwemapakexanaii.
13 Ja inun, betsadan, e iskaun sinatakin tsua tenanyamakubainxankanwen.
14 Ja inun, betsadan, kemui ainyan inun beneyabia betsabe chutanameyamaxankanwen.
15 Ja inun, betsadan, yuda betsabun jamapai tibi biain yumetsutaskayamaxankanwen.
16 Ja inun, betsadan, yuda betsa jaskamabiaken jamenmens jakidi chanichakakin nuitapawayamaxankanwen.
17 Ja inun, betsadan, yuda betsan mae anu jawada jaya uin jawen kemutaskayamaxankanwen, jawen jiwe inun, jawen ain inun, jawen juni tsuma dayadu inun, jawen ainbu tsuma dayadu inun, jawen inabu inun, jawen jamapai tibi jaya uin jawen kemuamadan”,
akin Jehován jawen jancha jatu yuia
Israelbu Dioski datenibukiaki, na janchadan
18 kana bakatan tin ikainkaini inun, chaxuwan maxun pudi ati chan akin chaipa wai inun, chi kuin meshu mayai dasibibun ninkakin uin datei saki saki iki Israelin enabu chixtekidi xeketan benanta mapuxun 19 dasibibun dateyabi Moisés yuikin:
—Mian besti nuku jancha wawe, nun mia ninkakubainunan, jau Diosun nuku ana jancha wayamanunan. Nuku ana jancha waya nun mawatidubuki— akabu
20 jatu daewakin Moisin yuikin:
—Dateyamakanwen, man mawamakidan. Dios bututan man jaki datei mesepakexanunbun matu unanti waikiki. Pe bestikunkaini jiwei man ana chakabuyamaxanunan— jatu wa
21 benanta mestean mapuyuabun Moisés ana mapekei nai kuin meshupa anu ka Dioski nukunikiaki.
***************