Dios jatube yubakani jancha ana jatu mestenwanmanikiaki, na janchadan
24
Jehován Moisés ana yuikin:
—Butuxun en jancha jatu yuitan Aarón inun, jawen juni bake dabe Nadab inun Abihú inun, 70 Israelin enabu xanen ibubu na en nia anu ana mapekekin jatu iwexanwen. Jabu beabudan, benanta niti itan jabun ea kenwain jau danti ixanunbunwen. 2 Juadan, mia besti min eki kematiduki. Jakia ja mibe mapekeabu ea dapi betidubumaki. Ja dikabi Israelin bake betsabun mia chibain mapeketidubumadiki— aka
3 Moisés butuxun Jehován yunuti jancha inun jawen nemati jatu pewaxunxu jawenabu yuia ninkatan dasibubun jui bestichai keskawen Moisés yuikin:
—Jawen jancha dasibi Jehová Diosun ma nuku pewaxunadan, ninkatan chibankin nun akubainxanaii— akabu
4 januxun Jehován jawen jancha dasibi yunushina una medan Moisin kene keyutan uxashini penaya butuxun mati tenanman anu jawen kenwanti mishki chi tapu jatu wamatan Israelin 12 juni bake jayani ja tibitun enabu xukua akeakeabu 12 jawen Dios shinanmati mishki keyatapa medibi Diosuna jatun kena tibiya chi tapu dapi jatu nichinbaunkin benimatan 5-6 jau jabun ina awa Jehová Dios inankin menu keyukin Dios daewaxuntanunbun jatida bedunanbu Moisin yunua ina awa benes ichapa tesenxun jimi biabu paxkakin namakis kencha betsa ewapaki juxketan janua jimi namakis betsa chi tapuki basha basha atan 7 jaska watan Diosun yubati jancha una bixun jawen jancha dasibi jatu yuixuna ninkatan janus janchakin yuikin:
—Nukubudan, ana nukun shinanen nun itidubumaki. Jaska Jehován jawen yunuti nuku pewaxunai besti ninkatan nun axunkubainxanaii— akabu
8 januxun Moisés jimi kencha betsa anua tsumatan ni peiwen jimi pukuxun jawenabu basha basha akubaunkin jabiatiandi jatu yuikin:
—Na yuba jancha en matu yuixu na jimiwen Jehová matube yubakaikiki, na jawen jancha en matu yuixu tuxkutima man jawen shinanpakexanunbunan— jatu watan
9 janua Aarón inun, Nadab inun, Abihú inun, 70 Israelin enabu xanen ibubu jatu iyui Moisés ana mapekexun 10 Diosun tae naman nenkati zafiro tapa nanketapa xabakabi nai keska chaxa chaxa ikijaidai anuxun jadixun jabun xenipabu Israelin mekenika Dios nia uinbiaibun 11 Diosun jatu kupiama Dios uinbetanan pikin nuxukin kenwankin keyutan Moisésbe ana butuaibun
Moisés Mati Sinaí anu ana mapekenikiaki, na janchadan
12 januxun Jehován Moisés ana yuikin:
—Nedi eanu ana mapekewe. Januxun ea manakawe. Jawen yunuti inun jawen nemati jancha uinmakin min jatu yusinkubainxanun min juai mishki tude sapa dabeki en ma kenea en mia inanxanaii— aka
13-15 xanen ibu bexmasbu Moisin yunukin:
—Nun kaya nenuxun ea manayuxankanwen, jatianda en chintuainan. En betsa Aarón inun en chai Hur matube en bashiyubainaidan, tsuabuda chakabui ja ikaibu ea xanen ibuxunyukin Aarón inun Hurin jau jatu pewanunbun ja dabe anu jatu iyuxankanwen— jatu watan jawen medabewanika Josué iyui Diosun mati nai kuinwen achimaken namakis anu mapekea 16 Diosun kushipa jua niti ika ja Mati Sinaí anu 6 xaba kuinwen bepuken janua séptimo xabatian jadi kuin medanxun Diosun Moisés kenaya 17 januxun jatun tadi jiwe dapi mapubaunxun mati keyatapajaida mamakia Jehován kushipa tsuan nematiduma chi jede keska ji ji ikai Israelin enabun uiainbun 18 ana mapekei nai kuinen ja mati achia anu Moisés jikia jadia 40 xaba inun 40 yame Diosbe ikunkainikiaki.
***************