—Egipto anuxun kenti nami mata inun xekiwan misi midima xaba tibi nun yanijaidawakubainaibun Jehován buni tenemakin unanxubida nuku debuwaya Egipto anu pe nun ikeanimaki. Jakia nenu janu tsua jiweabuma anuxun nuku buni tenemakin unanxubida nuku dasibi debuwanun, iwanan, shinankin man nuku iweshinaki— iake iakeaibun

4 januxun Jehován Moisés yuikin:

—Piti nai anua ui keska wakin en matu nidi axuaiin. Ja yudabun xaba tibi kainbain jati ja xabatian besti pitidubu jau ichawakubainxanunbunwen. Tsuabunda en yunuti ninkaibu inun tsuabunda ea ninkabuma en jatu unanti wakatsis ikaii. 5 Janua juindukuntitian ana jawa piti bitidubumaken ja juindukunti idiamaken semana tibi xaba meken buxkatitian janu piti ichapa dabeki bitan jatun jiwe anu jau buxun adukubainxanunbunwen— aka

6 Moisés inun Aarónen ninkaxun jatu yuikin:

—Egipto anua Jehová bestitun matu iweimadan, na badi kaya jaska unantan man kenwanxanaii. 7 Jaska inun, Jehován kushipadan, penama man uinxanaii. Jaska Jehováki man jaki ja ikai matu ninkakubainikiki. Uindakanwen. Nuku dabetun jaska Dioskidi nun matu yuibiakubaina ¿jaskai man nukukidi ja idiakunkainai?— jatu wa

8 Moisin ana jatu yuikin:

—Man Jehová yuain ninkaxun man pinunbun badi kaya nami matu inan man yani wanunbun penaya misi ichapadi matu inandiaxanikiki. Man nukuki ja ibiaya nukudan, nun jawamaki. Jakia nukuki ja ikama nukun mekenika Dios Jehováki man ja ikaii— jatu watan

9 januxun jawen betsa Aaróndi Moisin yuikin:

—Israelin enabu dasibi eska jatu yuiwe: “Matun ja iti jancha matu ninkaiwen taea ja kuin nai anua butua anu Jehová bebun ichakanwen”, akin jatu ea yuixunwen— akaya

10 jaska Moisin Aarón yuixu Israelin enabu jatu yui janchaya jadi tsua jiweabumakidi uin dabekeaibun jawen kushipa jatu uinmakin nai kuin butua chaxa chaxa ikaya 11 Jehován Moisés ana yuikin:

12 —Israelin enabun ja ikaibu jatun jancha en ninkaxuki. “Badi kaya man nami piaii. Janua penaya misi pikin yanijaida watan en eadan, ‘En matun mekenika Dios Jehová’, man unanjaidaxanaii”, akin ea jatu yuixunwen— aka jabias janchadi Moisin jatu yuiaya

13 janua badi kaya kuma keska midimajaida nuyabidani janu jatun uxati tadi jiwe puntebaunabu anu butuabu achixun detexun bawaxun piabun penayadi nibi ichapatun mai mecha wabia 14 ma tsusinken mai anu jawada atsa nisa keska dudu mania 15 uin unanbuma yuka iki: “¡Jabaa! ¿Jawamen?” ikaibun atimas Moisin jatu yuikin:

—Man ja pinunbun ja misi Jehován matu inankubainxanikiki. 16 Jehován ea yuishina matu yuinun ea ninkakanwen. Badi tibi jati man pitidubu jiwe ibu tibitun jau ichawakubainxanunbunwen. Matun jiwe tibi anua jati yudabu tanatan matube jiweabuti 2 litro yuda tibituna ichawakin bixunkubainkanwen— jatu wa

17 jaska jatu yuixu keska misi bikin jiwe ibu tibitun jatiditun ichapa bikin betsabun jatun yuda tanabain eskadabes duakabi buxun yaniwabun 18 jaska Diosun jatu tanashina keska chibankin chichanki tanaxun ichapa buabu dasibitun pikin keyuabu texe jayabuma janua ichapama duakabi buabu pi jawa buniama jati jatun piti misi tanaxun bikubainibukiaki.

19 Moisin ana jatu yuikin:

—Matun piti jawa texe wataskayamakanwen, adukinan— jatu wabia

20 jawa ninkama jatiditun: “Meshukidi pixanun”, iwanan, texe aduabu penaya chapui pisi maiyai xenajaidaken jaska uintan jatuki Moisés sinatajaidaya

21 janua penaya tibi jati jawenabun pitidubu jiwe ibu tibitun ichawakubainaibun badi kukin ja misi payukin keyuaya 22 ja meken buxkati xabatian viernes penaya jawenabu tibi tanabain man bishian ana binumakin jabia tidi yuda tibituna 4 litro jati xaba dabe pitidubu bitanxun xanen ibubu bexmasbu Moisés anu buxun jaska yuiabu 23 jatuki sinatama Moisin jatu yuikin:

—Nadan, Jehován ea yuishinaki. Meshukidi juindukuntitian sábado medibiki. Janu nukun mekenika Dios Jehová nun kenwanxankanaii. Jawada xuikatsi ikin natian xuitidubuki. Jawada juakatsi natian ikis juatidubuki. Ikis pitan jawen texe adukanwen, meshukidi pitidan— jatu wa

24 jaska Moisin jatu yuia shinankin pitan jawen texe aduabu penaya jawa chapuama xena jayamaken 25 janua Moisin ana jatu yuikin:

—Jehová kenwain man juindukunwainwen taexun piti texeshina ikis pikanwen, na xaba sábadotianan. Jabia xabatiandi nai anua misi piti man ana jawa biamaki. 26 Jakia ja meken buxka xabatian penaya man ichawatidubuki. Jamen metuti xaba juindukuntianan, janu daya jayama ikunkainxanikiki— jatu wabia

27 jatiditun ninkama kainbain metuti xaba sábadotian: “Misi ichawanun”, ika buxun jawa bechiabumajaidaken 28 januxun Jehován Moisés ana yuikin:

—En yunuti jancha inun en yusian jancha man danainan, ¿jatian man bextekexanai, en ana matuki sinatayamaxanunan? 29 Ninkakanwen. Ja juindukuntitianan, matun juindukuntiki. Meken buxkati xaba penaya dabeki piti ea Jehován en matu inankubainxanaii.

30 Jaskaken xaba metuti tibi juindukuntitianan, matun mae anu jawa dayai buyamakubainxankanwen, jakimamadan— jatu wa

31 Nadan, nai anua misi piti Israelin enabun yuikin: “Manáki”, akin kenapaunibukiaki, jexe juxupa culantro bimi keskadan, jawen nis buna batapa kapan keskadan.

32 Chipu Moisin ana jatu yuikin:

—Jehován yunuti matu yuinun ea ninkakanwen. “Egipto anua matu iwexun nenu janu tsua jiweabuma anuxun misi en matu pimaima matunabu pakubainkin jau uinkubainxanunbun ja piti maná bishtu litro dabe mata watan jatu aduxunkubainkanwen”, akin ea yuishinaki— iwanan,

33 jawen betsa Aarón yuikin:

—Jaki aduti kenti beputiya bixun nai anua misi litro dabe mata waxun jaki aduti kenti medan nanexun beputan nukunabu pakubainkin jau uinkubainxanunbun Jehová bebun jawen jatube yubakani jancha aduni bau medan tsaunwen, nukunabun jau jatu aduxunkubainxanunbunan— aka

34 jaska Jehován Moisés yunushina keska wakin jau jatu aduxunkubainxanunbun ja dukun jaska bebunkidi jatube yubakani jancha aduni bau medan nai anua misi Aarónen adukin tsaunikiaki.

35 Bukubaunkin janu tsua jiweabuma anuxun Canaán mai pakeanu jikidiama 40 año nai anua misi Israelin enabun piyukubaunibukiaki. Janua janu yudabu jiweabu anu ma jikiabun Jehován ja misi ana jatu inanma inikiaki.

36 Jatun nai anua misi tanati, litro dabedan, jawen kena gomerki. 10 gomerdan, efa bestichaiki.