Benimai jawen juiwen Moisés kantanikiaki, na janchadan
15
Janua Jehová Dios kenwain Moisés inun Israelin enabu jatun juiwen kantakin:“Jatun caballo inun jaki katsaumebainaibu
jenewen jatu achikin jasakin keyukin
Diosun jatu yamajaidawaxuwen taexun
en juiwen Jehová kenwain en kantakunkainxanaii.
2 Jakidi en kantakunkainun
ea kushipa wakin
Jehován ea medabewamiski.
En mekenika Dios kayabiki.
Jaskawen taexun jeneama en kenjaidawakubainxanaii.
En epan mekenika Dios iniwen taexun
jakidi jancha pepa besti en jatu yuikubainxanaii.
3 Jehová kushipajaidatun yudabu kushipabu jatu binumiski.
Jawen kenadan, Jehová jamebi jiweaki.
4 Faraónen caballon tadanbainti inun,
jawen detenamenikabu kushipabu ianenwanwen jatu achimakin
jawen detenamenikabu jabun jatu yunumisbu xanen ibubudi
Ianenwan Tashipa anu jatu jasaxuki.
5 Mishki keskai jene nuajaida medan Faraónen detenamenikabu ibubis pukuaibun
ianenwanen jatu achixuki.
6 En Xanen Ibu Jehováan, min punyan yusiudi kushipajaidawen
miki sinataibu min jatu binumakin keyumiski.
7 Tsuabunda mia sinatamaibu
min kushipa tsuan mia nematidumawen
min jatu kupikin keyumiski.
Jatuki sinatakin basi chushia kua keska wakin
min jatu yamawamiski.
8 Jatuki sinatajaidakin jatu xun akin ianenwan min paxkaya
jene tunkax tunkax ibiai
mishkiwen kene kebean keskaxuki,
janua ianenwan nuajaidabia namakis tea nia jawa takax ikamadan.
9 Janua Egipto detenamenikabun shinankin:
‘Jatu chibanbain achixun
jatun mabu mebinxun paxkanun bukanwen,
jatu jaska wai nun benimanunbunan.
Janua dedati kenujaida chaipa sitan
en mekenwen bais bais akin
en jatu yama waxanaii’, ikaibun
10 jakia min xun akaya
ianenwanen jatu xea keyuxuki,
jene tunkax tunkax ikai anu mane shumbun xankama
jamebi pukumis keskaidan.
11 En Xanen Ibu Jehováan, mekenika yushin betsa mia keska tsua jayamajaidaki.
Medibi pepajaidakin dasibi min binu keyuaki.
Jamapai shadabu wakin: ‘¡Jabaa!’ imakin
min jatu datemamiski.
Jaskabia jau mia kenwanxanunbun
min pepa ikunkainaii.
12 Min kushipawen jatu kupikin
mai tuax akin jaxpa watan mai min jatu xeamaxuki.
13 Nukunabu jatu detepananbun
min nuikipawen nuku duawakin mekexun min jatu nuku nemaxunxuki.
Egipto detenamenikabu anua min nuku jatu mebinxun
min kushipawen min nuku yunuaii,
unanuma min jiwe medibi anu iyukinan.
14 Jaska min amis ninkai
nawa betsa betsapabu datejaidaxankanikiki.
Filisteo nawabu datei saki saki ikaibun
15 Edom nawabu xanen ibubu dakei
jawa janchabumaken
Moab nawabu kushipabudi datei saki saki idiaibun
Canaán nawabu kushipabia
ana kushipa jayama shinain dasibi juinti nishmaxankanikiki.
16 En Xanen Ibu Jehováan,
Egipto nawabu kushipa anua mebintan mina wakin
min nuku iweaya nun jatu dainbainkin keyudiama
min kushipawen datei
¡mishki keskai jawa tukuama jau pes manixanunbunwen!
17 En Xanen Ibu Jehováan,
jadi nun jiwenun mati medibi pepa min nuku katuxuni anu
nun jiwexanun nuku iyuwe,
min kushipawen min ma nuku pewaxuni anu janu min medibi jiwea anudan.
18 Jehováan, miadan, min xanen ibu ikunkainxanaii, ikibi ikidan.”
Benimai María kantanikiaki, na janchadan
19 Ianenwan namakis caballon tadanbaintiki mapuabu inun caballo katsaumenikabube Faraón jikia Jehován jenewen jatu achimaxuken jakia jabias ianenwan namakis mai tsusin anu bebunkidi Israelin enabu pukei keyubainabun 20 janua Marían Dios kenwain jakidi janchaxunmis Aarónen pui jawen mimawati bichi tudu tun tun atiya kai ainbuaibu dasibi bichi tun tun atiyabundi María chibain nawakubainaibun 21 jatu kebi María kantakin:
“Egipto nawabu nuku binumakin jatu yamajaidawaxuwen taexun
Jehová kenwain kantakubainankanwen,
ianenwan medan caballo inun
katsaumenikabu ianenwanwen
jatu yamajaidawaxudan”,
ikaya ainbuaibun jatun mimawati tsuma Maríabe xekebaunibukiaki.
Unpax muka anuxun yudabun Moisés yuanibukiaki, na janchadan
22 Ianenwan Tashipa anua Moisin jatu kainmabainkin iyua bui janu tsua jiweabumanu jawen kena Sur anu xaba dabe inun besti bukubaini unpax jawa bechiama 23 atimas chacha betsa Mará anu nukuxun ja chacha unpax meabu mukajaidaken danankin: “Jaska nun atidumaki”, ikaibun
24 ja jene mukajaidaken Moiséski sinatakin ana yuankin: “¿Unpax manuchakayamakin nun jania akai?” ikaibun 25 Jehován jau jatu medabewanun Moisin jatu ea axunkin yuka ni maxu betsa Jehován Moisés unanmakin yuikin: “Ja ni maxu betsa ja jene mukajaida anu putawe,” aka jaska wa dami jene batajaidanikiaki, ana mukamadan.
26 Januxun Jehován jatu yubakin yuikin: “Jaska en matu yunuai besti ea benimawakin en yunuti akubainkin en nemati ninka pewakubainkin en jancha dasibi man ninkakubainaibun Egipto nawabu en jatu yumanwanshina keska wakin en matu kupiama ixanaii. Jamen man ea ninkamajaidaken en matu kupixanaii. Eadan, en Jehováki, matun xuxa wanikadan, en ea bestiki.”
27 Janua ana bukubaini janu 12 chacha netsuisma pepa inun 70 paninwan mapu anu jawen mae kena Elim anu jikiabu janu chacha unpax ichapa anu jatun tadi jiwe dunkemabaunkin puntebaunabun