2 “Chintunkidan Pi-hahirot dapi Migdol inun Ianenwan Tashipa namakis jatun tadi jiwe ana jau puntexanunbun jatu yuiwe, Baal-sefón besuudi ianenwan kexa anu jau uxanunbunan. 3 Man jaskaya Faraónen matukidi shinankin: ‘Chintun kextukunkaini jani kati unanma ma benuabuki. Janu tsua jiweabumanu bui jani butidubumaki’, ikin matu shinanxanikiki. 4 Januxun ana Faraón en ninkaisma waken patapakin matu ana achinun ixun jawen detenamenikabubetan Faraónen matu chibanxanikiki. Matu jaska waya Faraón inun jawen detenamenikabu en jatu yamawaiwen taexun ‘Eadan, en Jehová emebi en jiweadan’, jawenabu Egipto nawabun ea jani unankayabixankanikiki”, akin jatu unanmaxun Jehován jatu yunua Israelin enabu chintunbidanaibun 5 “Israelin enabu ma paxashinabuki”, akin Egipto nawa xanen ibujaida Faraónki chaniabu jawen xanen ibu bexmasbubetan Faraónen shinan betsawatan: “Nun jawa shinanmaken paxaibun nun jatu nemama ishianki. Nuku tsuan ana dayaxuntidumaki”, iki yuinamea akeakeaibun

6-7 janua Faraónen jatu chibankatsi jawen caballon tadanbainti jau pewanunbun jatu yunua ma pewakin keyuabu 600 caballon tadanbainti pepas inun caballon tadanbainti ichapa betsa pe bexmas dasibi Faraónen jatu ichawamatan xanen ibu bexmasbun jabun tadanbainti xukua tibi jatu yunukubainaibu jatu chibanmakin: “Israelin enabu achinun”, ika bukin Faraónen jawen detenamenikabubetan jatu chibanbainaibun 8 Jehován Faraón ninkaismakin juinti kushiwatan janua Israelin enabu paxaibu Jehován jatu kushipawaya kainbainshinabu Faraónen shinanma jatu achikatsis ikaya

9 caballon tadanbainti anu mapubainaibu inun caballoki katsaumebainaibu jawen detenamenikabu jabu dasibibu Faraónbetan Israelin enabu achinun ika chibanbaini Pi-hahirot dapi Baal-sefón besuudi ianenwan kexa anu jatun tadi jiwe puntebaunshinabu anu bui ma badi kaya jatuki kemai 10 Egipto detenamenikabu kushibidanaibun uin Israelin enabu datejaidakin jau Jehován jatu medabewanun kaxai keskakin Jehová yukabiakin 11 Moisés jancha chakabuwakin yuikin:

—Egipto nawabun nuku tenanun ika bekanikiki. Jadi Egipto anua nun mawa jani nuku mai watidubumaken nenuxun nuku tenanun, iwanan, ¿min nuku taxnimabidanshinamen, tsua jiweabuma anuxun nuku tenan bestinun ikadan? 12 Janu tsua jiweabumanua mawama Egipto nawabu nun ana jatu dayaxunkubainaii, akin uatian mia yuikin: “Nuku jenedibainwen”, akin Egipto anuxun nun mia yuimaki— akin yuiabu

13 Moisin jawenabu jatu kemakin:

—Datei babuama mestein juinti kushitan manakanwen. Jaska jatu maemakin Jehován matu medabewai samama man uinxanaii, ja yudabu matube bei matuki kemadiabuma ana man jatu uianma ixanaii. 14 Jawawenda Jehován matu jatu nemaxunaya pes mapuxun man jatu uinxanaii— jatu waya

15 jawaida Jehován Moisés ana yuikin:

—¿Datebiakin jaskakin min ea yukai? Badi juaikidi jau buxanunbun jatu yuiwe. 16 Janua mianan, min mestenti ji jene bemaki sanankin jene paxkawe, jatu dami waxunkinan. Min jaska waken mai tsusinken janu bui paibainkin ianenwan namakis Israelin enabu mibe pukebainxankanikiki. 17 Jakia eanan, jatu uinmakin jau matu chibain ianenwan namakis jikibainunbun Egipto nawabu jatu ninkaisma juinti kushi waxun Faraón inun, jawen detenamenikabu inun, jatun caballo tadanti inun, jabu caballoki katsaunmeabu dasibi yamawakin yuda dasibi en kushipa en jatu uinmaxanaii, jau jakimama shinankubainxanunbunan. 18 Jaska jatun caballo tadantiki mapubainabu inun, jatun caballo katsaumeabu inun, jatun xanen ibujaida Faraón debuaiwen taexun: “Ea en Jehová emebi en jiwea”, jaska unankubainxankanikiki, Egipto nawa dasibibunan— aka

19 nai kuin budu tsaua kayanbis Israelin enabu bebun kai Diosun nai tsumapan jawaida jatu betsa waxunkin bebun kai maewakin 20 nai kuin meshu wakin Egipto nawa detenamenikabu inun Israelin enabu namakis nichintan Egipto nawabukidi jatu meshu watan janua Israelin enabu anu jatu xabawabainaya janua Egipto nawabun Israelin enabuki jawa jatuki nukuama ishiainbun

21 jabiatiandi jene bemaki jawen mestenti ji Moisin sananken badi juaikidia niwe kushipajaida xunku imashinkin Jehová ianenwan paxkakin ja namakis mai tsuin wankin dami wakin keyuken 22 janua yusiudi inun yusmaudi kebenkin kene keska juyunkin jene dabe waken ja namakis mai tsusin anu Israelin enabu pukebainbainaibun

23-25 jaska waxun Jehován ana jatu nemama Israelin enabu pukei keyuaibun Faraónen jatu uintan jatu yunua jawen detenamenikabu caballo katsaumeabu inun caballo jawen tadanbaintiki mapubainaibu dasibitun jabun achitanun ika buaibu jau jene jaki dasiwakin namakis jikikainkin jatu chibain pukebaini ianenwan namakis anu buaibu penaya chi jede budu tsaua inun nai kuin kayanbis medanxun Egipto nawa detenamenikabu jatu uinkin jatun caballon tadanbainti tae chakabuwakin jani katiduma wakin jatu bika tenemakin Jehován jatu ichakawaya Egipto nawa detenamenikabu yuinamei:

—Jatun mekenika yushin Jehován nuku ichakawaikiki. Chintuin paxadinankanwen— ikaibun

26 ianenwan kexa betsaudi Israelin enabu pukei mapekei keyuabun Jehován Moisés ana yunukin:

—Ianenwanen Egipto detenamenikabu jau jatu achinun jene bemaki min mestenti ji ana sananwen— aka

27 ianenwan bemaki jawen mestenti ji Moisin ana sananken Egipto detenamenikabu paxapananbun penaya ianenwan ana jaki dasiwakin jene medan Egipto detenamenikabu Jehován jatu achimakin bichikin keyunikiaki. 28 Israelin enabu jatu achinun ika ianenwanu Faraónen detenamenikabu jatu chibain jikibainaibun jene ana jaki dasikin jatu achia jawen caballon tadanbaintiki mapuabu inun caballo katsaumebainaibu tsua jawa paxama 29 jakia bebunkidi mai tsusin anu bui yusiudi inun yusmaudi jene paxka dabea namakis Israelin enabu pukebainaibun

30 Egipto detenamenikabun jatu achipananbun Jehován Israelin enabu jatu medabewakin Egipto detenamenikabu jatu jasa mashi anu mawa maniabu uinkin 31 jaska jawen kushipawen Jehován jatu kupixu uinxun jatun mekenika Dios Jehová kenwain jaki mesekin jawen tsuma Moiséskidi mesekin ja dabetun jancha Israelin enabun ikunjaidawanibukiaki.