17 Faraónen jatu ana nemama Israelin enabu Egipto mai pakea anua jenebaini Canaán nawabun mai pakeakidi bui chaimabiaken jabu jaki sinataibun mai pakea anu Diosun jatu iyukatsi ikama shinankin: “Filisteo nawabuki datei jatube detenamekatsi ikama shinan betsatan Egipto anu Israelin enabu ana chintuntidubuki. Ja baiwen en jatu iyuamaki”, ixun 18 Ianenwan Tashipakidi jawen kexa anu janu tsua jiweabuma anu Diosun jatu iyubauna Egipto anua xanen ibubu bexmas tibi jawenabube kai Israelin enabu dasibi buaibun 19 jatun xenipabu xanen ibu José mawa jawen yuda maiwama jawen xau bau medan nanexun dintu medan jawenabun adunibu Moisin jatu bumaya jaska Josén jatu yubakin: “Nukunabu pakubainxanaibu Diosun jatu ana shinankin iyuaya nenua en xau jau buxanunbunwen”, jatu aniwen taexun jawen xau bau medan nanenixun buaibun

20-22 janua xabatian inun meshu medan jau chibanununbun nai kuin budu tsaua butuawen Jehová jatu bebuxunkainkin meshu medan chi jede watan jatu chaxawaxunbainkin Jehová jatu bebuxunkainaya Israelin enabun chibanbainaibun badidi nai kuin bututan jatu jeneama kai inun, meshu medandi chi jede keska kakin jatu jeneamadi jadidi bai kakidi jatu unanmabainaya Sucot anua kainbaini bui janu tsua jiweabuma kexa anu Etam anu jikixun uxakatsi jatun tadi jiwe puntebauntan janu uxaibun