2 —Egipto nawabun uxe tanakin kenamisbu tibi ana shinanma na uxe daka benadan, matunmebi man ja tanabainkin chibanpakexanun na añoki tana taewakin matuna en matu axuaiin. 3 Na jabias uxe 10 xaba kainaitian jiwe ibu tibitun jawenabubetan pinun, iwanan, chaxuwan kasmai cabra bakemenkain, bene babupabu jau katununbun jatu yunutanwen. 4 Jakia jatunabu eskadabestun chaxuwan bake pikin keyutidubumaken juni betsa ja dapi jiweabe yubakatan jatunabus tanatan: “Chaxuwan bake bestichai nukunabubetans man pitiduki”, iwanan, ja dabetun chaxuwan bake bestichai biabu jiwe bestichai anuxun jatubetan pi jau jatuki dasixanunbunwen. 5 Chaxuwan bene badi bestichaiya jawa isin jayama jawen yuda dasibi pe keyu jau bixanunbunwen. Chaxuwan bake kayabi pepa jayamaken ina chaxu betsa cabra bake bitidubuki. 6 Bitan mekekubainkin uxe xaba 14tian jati xabatian ma badi jikiaya meshudiamaken jabiatiandi jiwe ibu tibi dasibibun ja jatun piti chaxuwan jau tesenxanunbunwen. 7 Ja chaxuwan tesentan jawen jimi dasibitun kenchaki kesunxun bikin mata waxun ja jiwe anuxun ichaxun piaibu anu jawen jikiti xui beputi ji istabin dabe inun jawen makishkunki chaxuwan jimiwen jiwe ibu tibitun jau puxa keyubaunxanunbunwen. 8 Ja jabias meshutian jiwe tibi anuxun chaxuwan bake jiki keunxun xuixun pikin misi xaxama inun miban betsa muka jusia jau naixanunbunwen. 9 Paxa inun juadi jau pitaskayamaxanunbunwen. Jakia jawen buxka inun jawen punyan dabe inun jawen kishi dabe jawen yuda dasibi taeyabis chi anu jau xuixanunbunwen. 10 Xaba betsatian piti jenekin jau texe wayamaxanunbunwen. Ma xabakidanaya jatida texea jau kuakin keyuxanunbunwen. 11 Jehován kushipa shinanti piti man besikin piaidan, tadi sawe pewatan inun bichi tae sawetan inun matun mestenti tsumatan kainbainkatsi jawaida pixankanwen, Jehován Pascua shinankin pikinan. 12 Ja man jaska waitian jabias meshuki Egipto mai jidabi anu iaketankin jiwe tibi anuxun jatun juni bake iyuabu inun jatun ina bene jabu dukun kaianbu dasibi tenankin Egipto nawabun jatun dami yushin tibi en kupi keyuaii. Ea en jiwemis Jehován jaska en matu yuiaii.

13 Ja jiwe anu man ika tibi anu jaki dasitan en jawen matu unanti waxanai jimi ma puxabu uintan mia inun minabu en matu dunkebainkin Egipto nawabu kupikin matun juni bake iyuabu en matu tenananma ixanaii. 14 Jamebi jiwemis Jehová Dios en eaki. En jancha ikunwankin en yunuti shinankin año tibi na uxe 14 xabatian ea kenwain besikin pikin jeneyamakubainxankanwen. Matun bakebu inun matun bababu pajaidai año tibi jabias uxe jabiatiandi jawa jakimama jabundi ea kenwain jau janu besipakexanunbunwen, jeneamadan. 15 Na jabias besi man akaidan, 7 xabatian misi xaxauma pikubainxankanwen. Ja besi man taewaitianan, misi xaxawati matun jiwe anu jayayamaxankanwen. Jamen ja 7 xaba besitian tsuanda misi xaxawatiya piaibudan, kupikin matunabu anua jau jatu nichinxanunbunwen, jawenabube ana jiwemamadan. 16 Jehová kenwain besi taeaitian ja dukun xaba inun jawen jenei xaba ja xaba dabe medibijaidatian jau dayayamapakexanunbunwen. Jakia jatun piti besti bawatidubuki. 17 Egipto anua en matu kainmabainaiwen taexun ja misi xaxama besitian piti watan jau pipaxanunbunwen. Matun bakebu inun matun bababu pajaidakubainkin na jabias Pascua besi jakimama año tibi jau besikubainxanunbun en yunuti jancha en matu mestenwanmaii, pakin jatun epa tibitun jawen bakebu jau jatu yusinpakexanunbunan. 18 Año tibi janu uxe ja dukun xaba 14tian badi kaya misi xaxawatiuma pikin taewakin matu dasibitun chaxuwan namiyabi misi xaxawatiuma pikubainxankanwen. Janua xaba 21tian badi kaya ana misi xaxawatiya ma ana pikin taewabaintiduki. 19 Misi xaxawatiuma pikin besikin ja 7 xabatian tsuabunda misi xaxa piaibu minabu kasmai nawa matube jiweabumenkain, jatu nichianbu matube ana jiwetidubumawen taea matun jiwe tibi anua jawen misi xaxawati jau tsuabuda jayayamaxanunbunwen. 20 Ana jabiasdi en matu yuai ea ninkakanwen. Janida man jiwekunkainai anuxun besikin misi xaxama besti matun pitiyabi pikubainxankanwen— akin Jehován Moisés yuia

21 janua Israelin bababu xanen ibubu tibi Moisin kenakin ichawaxun jatu yuikin: “Jiwe ibu tibitun chaxuwan bene año bestichaiya isin tene jayama dasibi jawendua jawen yuda xunpin bixun tesenxun 22-23 kenchaki jawen jimi kesunkin mata waxun ni pei meske meske axun neakin buxukuatan jimi pukutantankin janu jikiti xui beputi ji istabin dabe inun jawen makishkunki jimiwen puxakin jau keyuxanunbunwen. Egipto nawabu kupikatsi iki jawen nai tsumabe Jehová jukin jawen beputi ji istabin dabe inun jawen makishkunki jimiwen man puxabu uinkin jau matun juni bake iyuabu tenanyamaxanun jatun debuwanika nai tsuma nemai matun jiwe tibi manaundi dainbainxanaiwen taea penadiama matun jiwe anua kainyamayuxankanwen. 24 Matu inun matun bakebu inun matun bababu pajaidakin na yunuti jancha ikibi ini shinankin Jehová kenwain man besikunkainxanaii, badi tibi jakimamadan. 25 Jaska matun xenipabu yubani ja maiwan pepa Jehová Diosun matu inankin ibu wamaxanai anu man jikia na matun juni bake iyua tenanma dunkeakeakebaini jawen shinanmati besi jau jakimayamaxanunbunwen, badi tibi shinankubainidan. 26 Badi tibi janu jawen jikiti xui beputi ji istabin dabe inun jawen makishkunki chaxuwan jimiwen man puxa keyuaya matun bakebun matu yukakin: ‘¿Jawa yuiamen, jimiwen man ji puxaidan?’ matu wabu 27 eska jatu yuiwe: ‘Egipto nawabu kupikin jatun juni bake iyuabu Jehován jatu tenankin Israelin bababun jiwe tibi dunkeakeakebainkin nukun xenipabu medibi waniwen taexun jimiwen puxakin nukun mekenika yushin Jehová nun kenwanmiski’, akin na jabias jancha en matu yuixu matunabu yuiditankanwen”, akin Moisin jatu yuia buxun jatunabu ichawaxun xanen ibu tibitun jatu yui keyuabu ninkatan Israelin enabu dasibi Jehová kenwanun ika beui beti iki keyuxun kenwantan 28 januxun jaska jau jawada anunbun Jehován Moisés inun Aarón yuixu tapinkin unantan akaibun

29 jabiatiandi bebunkidi jaska yuia jukin yamenapun Egipto nawabun jiwe tibi anuxun jatun juni bake iyua tibi Jehován jatu tenan akeakebaunaya Faraón xanen ibun juni bake iyua jawen xantukun xanen ibutidu ja dukun mawai taeaya janua juni bichiti jiwe medanuatundi bake iyuabu tibi mawai keyudiaibun jatun inabu bene ja dukun kaian mawai keyudianibuki. 30 Jaskaibun meshu medan Faraón inun jawen medabewanika xanen ibubu dasibibu inun Egipto nawabu dasibi bestentan butubaun jiwe tibi anua mawaibuwen taea bis bis iki keyubauni kaxa chakayamaibun 31 jawaida jabias meshu medan Moisés inun Aarón jau itanunbun, Faraónen jatu yunua buxun jatu iweabu Faraónen jatu yuikin:

—Matu inun matunabu bui keyui ikis enabu jenedibainkanwen. Jaska man yuishina matun mekenika yushin Jehová kenwain budikanwen. 32 Jaska man akatsis ishian matun chaxuwan inun matun ina awa dasibi iyui budikanwen. Buxun matun mekenika yushin kenwankin ea dikabi yukaxunkanwen— akin juinti nishma punu nukaxun jatu nichian

33 Israelin enabu dasibi jau jawaida bununbun jatuwen datekin shinain: “Jatuwen taea nukudi nun mawatidumenkain”, iki yuinamekin jatun mai jidabi anuxun Egipto nawabu dasibibu jatu nichinbaunaibun 34 ma bukatsi jatun mabu pewakin jatun misi xaxadiama kencha medan tadiwen yabutan 35 jaska Moisin yunushina jatun oro mabu inun, jatun plata mabu inun, jaya besiti tadi jatu ea amabaunshina 36 Jehován Egipto nawabu jatu mesewaxunaya jamapai shadabu ea ikaibu Egipto nawabun jawaida jatu inan inan abaunaibun jatun mabu dasibi bukin Israelin enabun Egipto nawabu jatu nuitapajaidawanibukiaki.

37 Jabia meshu medan Ramsés anua kainkainkin jenebaini Sucotkidi Israelin enabu bui ainbuaibu inun jatun bakebu tanama 600,000 juni ewabu juinti kushi detenametidubu jawenabube main bukin 38 jatun inabu ichapajaida iyuaibun nawa betsa betsapa Egipto nawabun jatu achinibudi jatube paxadiaibun 39 Egipto nawabun jatu jawaida nichiainbun jaska waxun piti pewatima paxai bukin misi wakin sapa waxun tsuitiki bawaxun pikubainibukiaki.

40-41 Egipto mai pakea anu 430 año Israelin enabu pai jiwekubidani jati año ma keyuken Egipto mai pakea anua kainbaini Israelin enabu xanen ibu kushipabu tibi jawenabube paxakin Jehován jancha ikunwankin Moisés chibanbainibukiaki. 42 Jamebi jiwemis Jehová kenwankin ja meshu medan nukun xenipabu kainmabainkin jatu iyuni ja Pascuatian man shinankubainxanaii. Egipto mai pakeanua Jehován jatu iyuniwen taexun año tibi jabias uxe inun jabias fecha shinankin Israelin enabu pajaidai jiwekubainkin Jehová Dios kenwain jau besikubainxanunbunwen, jakimamadan.