—Faraón inun jawenabu anua dami atimapa betsa wakin en jatu uinmakatsis ikaii. En jaska waya man kainbainunbun matu ana nemama ibubis jawen kushipawen matu nichinxanikiki. 2 Natianan, minabu Israelin enabu junibu inun ainbuaibu ja Egipto nawabu jatu dapi jiwebaunabu jatun oro mabu inun jatun plata mabu jau jatu ea akubaununbun jatu yunuwe— axun 3 jau jatuki yaushiyamanunbun Egipto nawabu Jehován jatu bechipaima Israelin enabun jatu ea akubaunaibu jatun mabuwen nuiama jatu inankubaunaibun Moisés juni min atidumawen taexun jakidi dasibibun pe shinankin Faraónen medabewanika xanen ibubu inun Egipto nawabu dasibi: “Moisés kushipaki”, mesejaidakin jatu inanxankanikiki— aka

4 Moisin Faraón ana yuikin:

—Jehován eska ea yuiai mia yuinun ninkawe. Na jabia yamenapun en ea Jehová Egipto mai pakea jidabi anu en iaketanaya 5 jiwe tibi anua minabun bake iyua bestibu tibi mawabaunkanikiki. Miadan, min xanen ibubiaken min juni bake iyua min xantukun xanen ibuxanai mawadiaxanikiki. Jaska inun, matun esclava dayanika ainbuaibun matu xekiwan denexunmisbun juni bake iyuabudi mawai keyuxankanikiki. Ja dikabi matun inabu bene jabu dukun kainmisbu mawai keyudiaxankanikiki. 6 Jaskaken janu Egipto nawabu jiwebaunabu anua jatun bakebuwen nuijaidai bis bis iki kaxajaidaxankanikiki. Uatian tenei kaxanibu keskama inun jaska ana kaxama ipaxanaibu binui kaxajaidaxankanikiki. 7 Jakia minabukidi inun Israelin enabukidi Jehován jaskas shinanma man unanxanun Israelin enabu inun jatun inabu uin jau jatun kamanen jau jau ayamanunbun matun kaman dasibi Jehován jatu nemaxanikiki. 8 Ja dikabi min medabewanika xanen ibubu dasibi eanu bexun eki danti itan ea ea akin: “Jaskakenan, nukun mai pakea jidabi anua kadiwe, minabun mia ninkamisbu iyuidan”, ea wadiabuma en katidumaki— akin Faraón yuitan

Moisin sinatajaidai Faraónen jiwe anua kainkainken 9 chipu ana Jehován Moisés yuikin:

—Egipto mai jidabi anuxun jawen dateti dami betsa betsapa man jatu uinmatidudan, Faraónen matun jancha ninkama ikunkainxanikiki— aka

10 jaska jatu yunua Faraón bebunxun jawen kupiti dami betsa betsapa Moisés inun Aarónen jatu uinmakin abiaxunkubainaya Jehován Faraónen juinti kushi wakin besu kushi wakubainaiwen taexun Israelin enabu kenwain bupananbun Faraónen jatu nichianmajaida inikiaki, bashikubainkinan.