—Jamebi jiwemis en ea Jehovádan, man ekidi shinankubainxanunbun jawen jatu datekin e imati dami betsa betsapa en kushipawen jatun mai pakeanuxun Egipto nawabu en jatu mesewani matun bakebu inun matunabu pajaidakubainaibu uinixun man jatu yuipakekubainxanunbun na jawen jatu datekin dami betsa betsapa wakin Faraón juinti kushi wakin jawen medabewanika xanen ibubu en jatu juinti kushi wadiashinaki. Jaskawen taea ana Faraón anu buxun eska ea yuixuntanwen— aka

3 Moisés inun Aarón Faraón anu buxun Jehován jancha yuixunkin:

—Hebreobun mekenika yushin Jehová Diosun eska mia ana yuikiki. Ninkawe: ¿Jatian ana juinti kushiama niti itan min ea ninkaxanai, ea bebunua babuidan? Jaska en mia yuiai keska enabun jau ea kenwain bununbun ana jatu nemayamawe. 4 Ninkamas min ana jatu nemaya meshukidi min mai jidabi anu shini midimajaida en yunuxanaii. 5 Minabun jau mai uinyamanunbun shini nidi ibidan mai dasibi bepuxankanikiki. Matun bai anu yunu betsa betsapa badux ui ikin ja texe washina pikin matun miban ji tibidi pikin keyuxankanikiki. 6 Shini tatashki iki jikibain min jiwe jawendua betsa betsapa anu inun min medabewanika xanen ibubun jiwe inun minabun jiwe tibi anudi jiki mataxankanikiki. Nenu jiwei taenibu anua shini bexanai keska min epabu inun min juchibun jaska uianma ikubidanibu na man jiweatian jaska taxnixanikiki— akin

Moisin yuibia Faraónen ana ninkamajaidaken jancha watan dabekebaini Moisés inun Aarón kainbainaibun 7 jawaida jawen medabewanika xanen ibubun Faraón yuikin:

—Ja junin nuku nuitapawakin nuku ichakawakubainaidan, ¿jatian nuku jenexanimenkain? Jau jatun mekenika yushin Jehová kenwantanunbun jatu nichindiwe. Nukunabu mawai keyutidubuki. Nukun inabu inun nukun miban shadabu ma nuku yamawankin ma keyuabudan, ¿min uianmamen?— akabu

8 jawen tsumabun jancha jatu ninkatan jau ana jatu itanunbun, iwanan, yunua beabu Faraónen Moisés inun Aarón yuikin:

—Matun mekenika yushin Jehová kenwain buditankanwen. Min jatu iyudiamadan, tsuabu min jatu iyuimenkain ea yuikanwen— jatu wa

9 Moisin kemakin:

—Jawen kenwanti piti pikin besikin nukun mekenika yushin Jehová nun kenkayabiwakatsi ikaiwen taexun nukun bake mishtinbu inun, nukun anibubu inun, yuxabubu inun, nukun juni bakebu inun, ainbu bakebu, inun nukun chaxuwan inun, nukun ina awa dasibi beabainkin nun jatu iyu keyukatsis ikaii— aka

10-11 sinatakin xabakabi Faraónen jatu yuikin:

—Uindakanwen. Ekidi man chakabu jatu shinanmanun ika ikai jau ea ana dayaxunyamanunbun ea jatu jenemabainkin matun mekenika yushinbetan matunabu man jatu paxa wanun ika ikaii, ea jatu unanti wamakinan. Man jaskabaintidubumaki. Matun mekenika yushin man kenwankatsi ikaidan, juni ewabus man jatu iyutidubuki. Buditankanwen— jatu watan jabun Faraón chikishwaibu jau jatu nichinunbun jawen tsumabu Faraónen jatu yunua Moisés inun Aarón nichinxunabu

12 kainbainaibu Jehován Moisés ana yuikin:

—Egipto mai jidabi anu shini bekin jawada badux ui ikin tenankin texewashina jau jabun pikin keyununbun min meken sananbaunwen— aka

13 Moisés jawen mestenti sananbaunaya badi juaikidia Jehován niwe xunku imabidana badidi inun meshu medan niwe xunku ishianyan janua pena betsatian niwen shini midima iwea 14 Egipto mai jidabi shinin achimakin keyubaunaya jati min tanatiduma bei, jati uinpaunibuma bei jati ana uianma ixanaibu na jabiatian besti bekin 15 mai bepukin keyuaibun jaska waxun min mai uintidumaken jawada badux ui ikin tenanma ikima pikin keyukin Egipto mai jidabi anu yunu pei inun ji pei pikin yamawaibun

16-17 datejaidakin Moisés inun Aarón jau jawaida itanunbun jawen tsumabu Faraónen jatu yunua buxun jatu iweabu Faraónen jatu yuikin:

—Matun jancha ninkama inun matun mekenika yushin Jehová ichai en chakabushinaki. En matu yukai en jakidi chakabushina ea buaxuntan jau shini chakabu ea nemaxunun ea kushipa yukaxunkanwen— jatu wa

18 jawen jancha ninkatan Faraónen jiwe anua kainkaini kaxun Faraónkidi Moisin Jehová Dios kushipa yukaxuna 19 badi jikiaikidia Jehován niwe kushipa maewa niwe bekin xunku imaya shini midimajaida niwen bukin Ianenwan Tashipa medan jatu dasibi pukukin jasakin keyuken Egipto mai jidabi anu shini ana jayamajaidaken 20 Jehován Faraón juinti kushi waken Israelin enabun kenwain bupananbun Faraónen jatu ana bashiaya

21 januxun Jehován ana Moisés yuikin:

—Jau ana mapubaunkin jamapai shadabu uinyamanunbun Egipto mai jidabi anu jau meshui keyunun min meken naiudi sananwen— aka

22-23 naiudi jawen meken Moisin sananyan janu Egipto nawabu jiwebaunabu anu meshu ten ikaitun jatu achishina yame ikibi ishinxun xaba dabe inun besti badi jayamaken jaska waxun ja dapi jiweabu ana uintidubuma inun jawa ana jaskatan maputidubumaken jakia janu Israelin enabu jiwebaunabu anu besti badi pexei chaxaken

24 januxun Faraónen Moisés inun Aarón jau jatu itanunbun jawen tsumabu yunua buxun jatu iweabu Faraónen jatu yuikin:

—Matun mekenika yushin Jehová kenwain butankanwen. Dasibi minabube inun matun bake dasibiya bukin jakia matun chaxuwan inun matun ina awa bashibaintankanwen— jatu wa

25 jakia Moisin kemakin yuikin:

—Nukun nun aki kaidan, jaskamaki. Mian min nuku shinanxuna min shinanen nukun inabu nun bashibaintidubumaki, nukun inabu nukun mekenika yushin Jehová inankin tesentan nun menu keyuxuni kaidan. 26 Jadatuda yuinaka pepa ikis nun katubaintidubumawen taexun dasibi nukun inabu nun jatu iyuaii. Jadatudawen nukun mekenika yushin Jehová nun kenwanxanai inun janu niti itan janixunda nun axanai anu nun unandiamawen taexun nenu nukun inabu bestichai nun jenebaintidumajaidaki— akaya

27 ana januxun Jehován Faraón juinti kushi wa Israelin enabun Jehová kenwain bupananbun jatu nematan 28 januxun ana Moisés nichinkin:

—Eanua kaindikainwen. Natian min ea anu ana jutidumaki. Ana jawenchains juyamaxanwen. Min ana ninkamas juaya en mia jatu tenanmaxanaii— aka

29 jawa dateama Moisin kemakin yuikin:

—Peki. Chanima min ea yuiaii. Ana jawenchains min besu en mia uianmaki— atan kainkainun ikaya