—Faraón anu ana kaxun ea yuixunkin: “Hebreobun mekenika Jehová Diosun eska mia yuikiki. Ninkawe: Jau ea kenwain bununbun enabu ana jatu bashiyamaxanwen. 2 Jakia bashikin min jatu nemakubainaya 3 en kushipawen matun inabu dasibi ea Jehován jatu isin paepa inan basi anu mapua matun caballo inun, matun asno, inun matun camello, inun matun ina awa inun, matun chaxuwan isin betsa paepawen mawaxankanikiki. 4 Jakia Israelin inabu inun Egipto nawabun inabu betsajaida wakin en mia uinmaxanaii. Israelin enabun inabu jawa betsa en tenanma ixanaii.

5 Na eska en mia yuiaidan, besti wakin en mia manayuaii. Meshukidi Jehován en axanaii”, akin na jabias jancha Faraón ea yuixunwen— aka

6 ninkatan Faraón anu Moisés kaxun Jehován jancha yuibia Faraónen ana ninkamaken jaska yuishina keska wakin penaya Jehován jatu chamijaida waya basi xukua tibi anua Egipto nawabun inabu dasibi mawai keyuaibun jakia Israelin inabu jawa betsa mawabumaken 7 jaska uintan Israelin enabu jiwebaunabu anu jawen tsumabun jau uinbauntanunbun Faraónen jatu yunua Israelin inabu uin buxun jatun inabu jawa betsataska mawamaken uinkubauntanxun chintunbidan jaska Faraón yuiabu sinatai juinti kushitan Faraónen ana jatu bashikin niti akaya

8 janua Jehován Moisés inun Aarón ana yuikin:

—Chi ketinmisbu anua mapu mespuxun butankanwen. Bukin Faraónki nukutan ja bebunxun Moisiin, mian besti ja mapu manaundi putakin sa sa axanwen. 9 Ja chi mapu damibaini kudumayabaini pabainkin jatun mai pakea jidabi anu Egipto nawabu dasibi inun jatun inabu jabu tenan meama ishianki, jatuki tsamia akeakekin jatu chami inan tenei su itan pe iake iakekin tenexankanikiki— jatu wa

10 buxun chi ketinmisbu anua mapu mesputan Faraón uinmanun ixun mapu buxun Faraón bebunxun manaundi chi mapu putakin Moisin sa sa akin keyuaya jatun mai jidabi anu Egipto nawabu dasibi inun jatun inabuki tsami keyuabu 11 jatunabube chami isin tenei nuitapakin Egipto nawa mukayabun Moisin axu keska ana anun ika kai taxniabumaken 12 Jehován Faraón jawen juinti kushi waya Faraón sinaxun jawen juinti kushiwen taexun Moisés inun Aarónen jancha jatu ninkamajaida jaska Jehován Moisés yuishina keskaya

13 januxun Jehován ana Moisés yuikin:

—Penamajaida butukaini kaxun Faraón bebun nixun ea yuixunkin: “Hebreobun mekenika yushin Jehová Diosun eska mia yuikiki. Ninkawe. Enabun ea kenwain buaibu ana jatu bashiyamaxanwen. 14 Min ana jatu bashiaya na jabiatiandi dasibi jawen kupiti mia anu inun, min medabewanika xanen ibubu anu inun, minabu dasibi anu en yunuaiwen taexun mai jidabi anu yushin kushipajaida tsua ea keska betsa jayama min unanxanaii. 15 En kushipa jatu uinmakin chami paewen mia inun minabu en kupiaya man mawakeanshinabuki. 16 Jakia mai jidabi anuxun en kushipa inun en kena jau unanbaunxanunbun en kushipa mia uinmakin en mia tenanma ishianki. 17 Jaska en mia uinmabiakubaina min shinan betsa watan enabun ea kenwain bupananbun min jatu bashikubainaii. 18 Jaskakenan, eskatian ea ninkawe. Meshukidi na jabiatiandi badux ui midima kushipajaida en nidi axanaii, jaska min xenipabu Egipto anuxun bai taenitian badux ui jaska ikunkidanama wakinan. 19 Jaskaken matun inabu mawama ishianbu inun matun bai anu dayaibu jiwe medan jau jiki keyununbun minabu jatu yunuwe. Yudabu dasibi inun inabu dasibi jiwetan jikiabuma xabakan mapuabu badux ui kushipa nidi ikin jatu dasibi tenan keyuxanikiki”, akin na jabias jancha Faraón ea yuixuntanwen— aka Moisin ninkabaini kaxun Jehován jancha dasibi Faraón bebunkidi yuibia Moisin jancha ninkamajaidaken

20 jaska Jehován jancha Faraónen medabewanika xanen ibu betsa betsapabun ninkatan datekin jatun dayadu inun jatun inabu jiwe medan jau bichinunbun jatun tsumabu jawaida jatu yunuabu 21 janua jatiditun Jehován jancha ninkabiatan danankin jatun xanen ibu Faraónbetan ninkabuma jatun dayadubu inun jatun inabu bai anua beama jenebidanabu 22 meshukidi penaya Jehován Moisés ana yuikin:

—Egipto mai jidabi anu yudabu inun jatun inabu inun jatun bai anu miban shadabuki badux ui jau nidi inun min meken naiudi sananwen— aka

23 naiudi jawen meken Moisin sananyan kanatun ichakayamai badux ui jusia yunukin Jehován badux ui midimajaida main nidi imaya 24 Egipto nawabu xanen ibui taeaitian badux ui midima ja keska uianma ikubidanibu inun ana ikama ipakexanai kana bakakin inun badux ui midima kushipajaida nidi akin 25 Egipto mai jidabi anuxun yudabu inun inabu ja bichiabuma inun bai anu miban shadabu detekin tenan keyukin ji tibi jawen punyan tekekin keyuaya 26 Egipto anu jatu jaska wakin Gosen mai anu janu Israelin enabu jiwebaunabu anu jawa betsataska badux ui nidi ikamaken

27 janua Moisés inun Aarón jau jatu itanunbun Faraónen jatu yunua ixuntanabu Moisés inun Aarón Faraónen yuikin:

—Kanekin jawen jancha en ninkama ikunkainai matun mekenika Jehová pepajaidaki. Jakia ea inun enabu nun chakabukunkainmiski. 28 Kana tin ichakayamai inun badux ui midimajaida nidi ikaiwen taexun shinan betsa watan minabu en ana jatu bashiama ixanaii. Jaskaken badux ui jau nesenun Jehová nuku yukaxunkanwen. Jehová man kenwain bununbun en matu nichinxanaii— jatu wa

29 Moisin yuikin:

—Jehová xanen ibui mai jidabi jawenasdan, min unanun min mae ewapa anua kainkaini kaxun Jehová naiudia en meken sananxun en mia yukaxunaya kana tin ikainkaini nesei badux ui main ana nidi ikamaki.

30-33 Jaskabiaya mia inun min medabewanika xanen ibubu Jehová Dioski man mesediama en unaiin— atan Faraón anua Moisés kainkaini kaxun jawen meken Jehováudi sananxun yukaxunaya kana tin ikainkaini inun badux ui inun ui kayabi jawaida nesei keyunikiaki. Jatun tadi wati lino bana juaya inun jatun xekiwan betsa cebada ma bimiaya badux ui kauankin teke teke akin yamawaxu inun jakia ja jukundiama xekiwan inun xekiwan betsa cebada badux ui ikin ja tekeama ixu Faraónen unantan 34 ui inun badux ui inun tin ikainkaini neseai uintan Faraón inun jawen medabewanika xanen ibubu dikabi jatube juinti kushitan ana chakabu shinankin 35 sina jawen juinti kushixun Israelin enabun Jehová kenwain bupananbun Faraónen ana jatu nichianma bashinikiaki, jaska Jehován bebunkidi Moisés yuima keskaidan.