—Faraón anu ana kaxun ea yuixuntanwen: “Jehová Diosun mia yuiai ninkawe. Enabun jau ea kenwain butanunbun jatu ana nemayamawe. 2 Jakia ninkamas min ea jatu nemakanyan jawen taexun mia kupikin min mai jidabi anu jeu midimawen mia inun minabu en jatu anu taxnimaxanaii. 3 Min jenewan anua jene kukatsa ikasi jeu midima kain chube ibidan min jiwe ewapa jawendua medan ishchubainbaini jiki keyui min dintu medan matai, min uxati medan matai, inun min medabewanika xanen ibubun jiwe medandi ishchubainbaini matai inun, minabun januxun misi wamisbu anudi matai inun, matun misi wati ji kencha medandi matai tsami keyubaunxankanikiki. 4 Miki inun min medabewanika xanen ibubuki inun minabu dasibiki tsaminbaunkin matu bika tenemaxankanikiki”, akin jabias jancha Faraón ea yuixuntanwen— aka

5 kaxun jabias jancha Faraón yuibiabu ana jatu ninkamajaidaken januxun Jehován Moisés ana yuikin:

—Min betsa Aarón amadiwe, jau jatun jene inun, jatun paxku debu dasibi inun, jatun ianenwan dasibi bemaki jau jawen mestenti sananbaunkin janida Egipto nawabu jiwebaunabu anu jau jeu midimajaida ishchubidan jau dasibi jatu medan matai keyununbun dami wamadiwe— aka

6 Jehován jancha Moisin Aarón ma yuiken jatun jene dasibi bemaki jawen mestenti Aarónen tsumaxun sananbaunaya jene dasibi anua jeu midimajaida kainbidani bekin Egipto nawabu jiwebaunabu anu matai keyuaibun 7 januxun jabiaskadi wakin Egipto nawa mukayabun jatun yushinen kushipawen jeu jene medanua jau taxninunbun dami wadiakin Egipto mai pakeanu jeu pa wadiaibun 8 jaska wabu jeu midimajaidatun jatu bika tenemaibun Moisés inun Aarón jatu yuima beabu Faraónen jatu yuikin:

—Ea inun enabu anua jeun nuku bika tenemai jau nuku nemaxunun matun mekenika Jehová ea yukaxunkanwen. Jehován ea jaska waxunaya minabun matun mekenika yushin kenwain buaibu en ana jatu niti akamaki— aka

9 ninkatan Moisin Faraón kemakin:

—¿Jawatian mia yukaxunpa, min jiwe jawendua anua inun, min medabewanika xanen ibubun jiwe anua inun, minabun jiwe anuadan, jau butubaintanun ea yuiwe, jau jeu jene kexa besti bashikununbunan?— aka

10 Faraónen kemakin:

—Jabia meshukidi ea axunwen— jatu wa Moisin yuikin:

—Peki. En mia axuin kaii. Nukun mekenika Jehová tsua keska jayama min uinxanaii. 11 Min jiwe jawendua ewapanua inun, minabu anua meshukidi jeu butubain jene kexa besti jiwexankanikiki, ana minabube mia bika tenemamadan— aka

12 Faraónen jiwe anua Moisés inun Aarón kainkaini kaxun jeu midimajaida Jehován yunushina jau jatu nemakin bextexunun Jehová Moisin yukaxuna 13 jaska yukai keska Jehován axunkin jeu dasibi tenan keyukin jiwe tibi medanua inun, jemaintin tibi anua inun, bai tibi anua jeu mawai keyua 14 Egipto mai pakea anu manibaunabun jeu ichawakin janus manchin keyuabu janua jeu chapui pisimayaya 15 jakia Jehován jeu yamawaxuna ana jawen dateama jawen juinti kushitan Moisés inun Aarónen jancha Faraónen ana jatu ninkama jaska Jehován Moisés yuishina keskakin Faraónen Israelin enabu ana jatu nemaniki.

16 Januxun Jehován Moisés ana yuikin:

—Egipto nawabun mae tibi anu mai mishpu dami jau shiunun Aarónen jau jawen mestenti sanantan mai bekushnun yunuwe— aka

17 jabias Jehován jancha Moisin Aarón yunukin ama jawen mestenti sanantan mai mishpu Aarónen bekushaya janu Egipto nawabu jiwebaunabu anuadi mai mishpu dasibi dami shiutan yudabu dasibiki inun inabukidi nidi ikin jatu tsan tsanki akin jatu pikin jatu bika waya 18 Egipto nawa mukayabundi jatun yushinen kushipawen jabiaskadi wanun ixun apaiabu ikamaken ja shiu damiatun jatu pikin yudabu inun inabu yumanwainbun 19 janua mukayabu buxun jatun xanen ibujaida Faraón yuikin:

—Na shiu dami wakinan, jatun Jehová Dios dasibi binuatun besti jatu dami wamaxuki— akabu jaska ninkabiatan ana jawen juinti kushitan jatun jancha Faraónen ninkama jaska Jehován bebunkidi yuishina keskaya

20 januxun Jehován Moisés ana jancha wakin:

—Meshukidi Faraón penama jene kexa butuikiki. Mia dukun penamajaida butukain jaki nukuxun eska Faraón yuixanwen: “Nukun mekenika Jehová Diosun eska mia yuikiki. Ninkawe: Enabun jau ea kenwain bununbun jatu ana bashikin niti ayamawe. 21 En jancha ninkama enabu min ana bashiaya miki inun, min tsumabuki inun, minabuki chupe midimajaida en yunuxanaii. Min jiwe inun, minabun jiwe inun, min mai jidabi anu chupe midimajaida en yunua xuku dakai buspu tsaubaunxankanikiki, main dikabidan. 22 Na Egipto anu en jaska waitianan, enabu Israelin enabu Gosen anu jiwebaunabu medan en jatu yunuama jawa chupe betsa taska en yunuama ixanaii. En jaska waya min ea uinkin en Jamebi Jiwemis Jehová eadan, na mae anu en nia min unanxanaii. 23 Minabu inun enabu anua mia uinmakin betsajaidawaxunkin jawen matu dateti dami meshukidi en mia waxunxanaii”, akin jabias jancha en mia yuiai Faraón ea yuixunxanwen— aka

24 uxashini penaya kaxun Faraón jabias jancha Moisin yuibia ana ninkamajaidaken chupe midimajaida nai kuin meshubidanai keska wakin Jehován yunuaya Faraónen jiwe anu inun jawenabun jiwe tibi anu chupe midimajaida nidi ibidan jatu pikubainkin jeneama Egipto mai jidabi jawa tukan wanma chupewan mataxun jatu chakabuwaya 25 januxun Faraónen jawen tsumabun Aarón inun Moisés jatu yuima jawaida yuitan iwexunabu Faraónen Moisés inun Aarón yuikin:

—Peki. Matun mekenika Dios kenwankin matun inabu tesenxun menu keyuditankanwen. Jakia nukun mai anua taxniama janubixun akanwen— jatu wa

26 Moisin kemakin yuikin:

—Janubixun nun jaska waidan, pemaki. Nukun inabu tesenxun menukin keyukin nukun mekenika Jehová Dios nun kenwanyan minabun ja inabu kenwankin medibi wamisbun jaska bechipaiama nuku uin nukuki sinatajaidakin mishki inun mankan tunkuwen nuku tsaka tsaka akin tenantidubuki. 27 Jaskawen taea janu tsua jiweabuma anu xaba dabe inun besti enabuya kaxun jadixun nukun inabu tesenxun menukin keyukin nukun mekenika Jehová kenwain jaska nuku yunushina keska axunun ika nun kakatsis ikaii— aka

28 Faraónen Moisés ana yuikin:

—Peki. En matu nichinyuaii. Janu tsua jiweabumanu jatixuinda kama matun mekenika Jehová Dios kenwankin buxun ea dikabi man ea yukaxuntanunbunan— jatu wa

29 Moisin ana yuikin:

—Uian. Meshukidi mianua min medabewanika xanen ibubu anua inun, minabu jidabi anua chupe bui jau ana jayayamanun mia anua kaxun jaska Jehová en mia yukaxunaii. En jancha jawen jenea ninkawe. Nukun mekenika yushin Jehová kenwain enabu buaibu jatu nemakin ana nuku padanyamawe— atan 30 Faraón anua kainkaini kaxun Jehová Moisin yukaxuna 31 jaska Moisin yukaxuna ninkatan Faraón anua inun jawen medabewanika xanen ibubu anua inun jawenabu dasibi anua Jehován chupe dasibi jatu kainmakin keyuxunbia ana chupe jayama 32 Faraónen uin ana jawen juinti kushitan Israelin enabu kenwain bupananbun ana nemakin jatu bashinikiaki.