—Uian. Jau Faraónen mia ninkakubainun ea keska wakin en mia jeneaii, jau en yunuti kushipawen min betsa Aarón jau mia janchaxunkunkainxanunan. 2 Dasibi en mia yunua, januxun min betsa min yuia, jatundi Faraón mia yuixunkubainxanikiki, jau jawen mai pakea Egipto anua Israelin enabu dasibi paxai buaibu jau jatu nichinxanunan. 3 Jakia jawen juinti kushi wakin ninkaisma watan en kushipa jawen unanmati dami betsa betsapa inun jawen e imati ichapa shadabu en matu amaxanaii, Egipto mai pakea jidabi anuxunan. 4 Matun jancha Faraónen ninkama dananyan janu en kushipajaida en jatu uinmakin dasibibu unanmakin Egipto nawabun jatu ichakawakubainmisbu Israelin enabu xanen ibu tibi jawenabube nenua en jatu iyuxanaii. 5 En kushipawen Egipto nawabu kupitan jatu anua Israelin enabu en jatu taxnimabainai ean en matu jaska wabainai Egipto nawabun ea en matun xanen ibu Jehová ea unanxankanikiki— akin Jehován Moisés yuia

6 Moisin ninkatan jaska Jehován dasibi yunushina Moisés inun Aarónen axunkubainibukiaki. 7 Moisés 80 badiya inun jawen betsa Aarón 83 badiya Faraón anu kaxun Jehová Dios janchaxunibukiaki.

8 Faraón anu budiabuma Jehován Moisés inun Aarón yuikin:

9 —En jancha man yuia Faraónen matu yuikin: “¿Man ea padain ikimenkain? Matun kushipa ea uinmakin jawada dami ea waxunkanwen”, matu waya, Faraón tsaua bebunxun jau jawen mestenti Aarónen putaxunun Aarón yunuxanwen, jau dami dunununan— jatu wa

10 Moisés inun Aarón Faraón anu buxun jaska Jehován yunushina keska wakin Faraón inun jawen medabewanika xanen ibubu bebunxun jawen mestenti Aarónen puta dami dunua dakaken 11 Faraón dateama jawen unanepabu inun jawen mukayabu jatu kena bexun jatun yushin kushipawen jabiaskadi jatuna akin 12 bestibu tibitun jawen mestentidi putabu dami dunua maniabun jakia Aarónen mestenti dami dunuatun jatun mestenti dami dunuabu ja Aarónenatun jatu xeankin keyuan 13 jaska Faraón axunbiabu uinbiatan jawa dateama juinti kushitan jaska Jehová Diosun yuishina keska Moisés inun Aarón Faraónen jatu ninkatan jawenabu jenexunama inikiaki.

14 Januxun chipu Jehován Moisés yuikin:

—Minabu bupananbun Faraón juinti kushichakayamatan jatu bashikiki. 15 Jaskaken meshukidi penamajaida Aarónbe jene kexa anu kakin ja mestenti dunu damishina tsuma kaxun janu Faraón butuai anuxun manaxankanwen. 16 Man jadi ka jaki nukutan Faraón ea yuixunkin:

—Hebreobu mekenika Jehová Diosun mianu ea yunuxuki. Mia yuikin: “Janu tsua jiweabuma anuxun enabun ea kenwain jau bununbun ana jatu nemayamawe.” En mia yuibia min ea ninkadiamaki. 17 Min jaska waiwen taexun Jehován yuikin: Na jabiatian en xanen ibu Jehová min ea tapiaiin, mia waikiki. Jaska jakidi min unanmaken ea yunuxu min uinun na mestentinin en jene bekusha dasibi jene jimi keyuikiki. 18 En jaska waya baka dasibi mawai keyukanikiki. Jene pisi mayaya mesekin janua ja unpax akabuma dananxankanikiki— akin

19 jawen betsan jaska waxanai Moisés besti Jehován yuikin:

—Aarónan, eska wamaxanwen. Jawen mestenti bitan Egipto mai pakea jidabi jene anu jau jimi daminunbun jawen mestenti tsumatan jene dasibi bemaki sananbaunwen. Jatun jenewan inun, jatun ian dasibi inun, jene beshudu ikai anu inun, unpax janua biti mai pukinkin kini wanibu inun, jatun unpax jaki manemisbu dasibi anu inun, janida Egipto nawabu jiwebaunabu anu jimi wamaxanwen, jatun ji kencha inun jatun mishki shumu anudidan, akin Aarón amaxanwen— aka

20 Jehován yunua kaxun jau jaska wanun Moisin Aarón ama jawen medabewanika xanen ibububetan Faraónen uianyan Aarónen jawen mestenti binikin sanantan jatun jenewan bekusha jene dasibi dami jimi keyuaya 21 baka mawai keyui jene napismayaya chakabuken Egipto nawabun danankin atidubuma janu jiwebaunabu anu jene dasibi dami jimi keyunikiaki.

22 Jakia jatun yushin kushipawen Egipto nawa mukayabun jabiaskadi wakin jabun unpax dami wakin jimi wadiaken jaska uinbiatan Faraón juinti kushitan jaska Jehován Aarón inun Moisin ma jatu yuixu keska ikaya 23 janua jaska uinbiaxu jawa jawen nuiama Faraón jawen jiwe ewapa jawendua anu chintunkaini mapekeken 24 jene anu unpax bixun atidubumawen taea unpax bexna janua biti jene kexa anu dasibitun pukinbainaibun

25 jaska Jehován Moisés inun Aarón jatu jene bekushmakin ichakawamashina 7 xaba binukainaya