—Chanima jabiaskaki. Natian Faraón en kupiai min uinxanaii. Matu nichinkatsi ikama matu yaushibiai en kushipawen taexun jawenabu anua ibubis Faraónen matu ana nemama nichinxanikiki, man kainbainunbunan— iwanan,

2 Moisin jau jawenabu yuinun Diosun ana Moisés yuikin:

—Eadan, en matun xanen ibu Jehováki. 3 Ea mekenika dasibibu binuatun matun xenipabu Abraham inun, Isaac inun, Jacob ean en jatu unanmakubainiki. Jakia en kena chanima kayabi xanen ibu Jehová en jatu unanmama iniki. 4 Jabu en jatube yubakanidan, Canaán mai pakeanu nawa keskai jiwekubaunpaunibu anu ja mai jidabi jawenabubetan jau ibuwaxanunbun en jatube yubakaniki. 5 Natian en jatu ninkaidan, Egipto nawabun jatunabu tsumawanixun jatu dayamakin nuitapawa chakayamaibuwen taea jaska jatun xenipabube en yubakani ma en ana jatukidi shinaiin. 6-8 Jaskaken minabu ea jatu yuixunwen: “Eadan, emebi en jiwea en kenadan, Jehováki. Egipto nawabun minabu dayamakin jau jatu ana tsumawayamaxanunbun jatu mexpamatan jatun mai pakeanua min jabu paxawaxanaii. En kushipa xabakabi dasibibu jatu uinmakin Egipto nawabu kupitan en matu iyuxanaii. Jaska watan enabus en matu waxanaii. Matun mekenika Jehová en ikunkainxanaii. Egipto nawabun matu dayama chakayamakin matu bika tenemaibu matun mekenika Jehován en matu iyuni matu inun matun bakebu inun matun bababun unankin shinankubainxankanikiki, ea jakimamadan. Mai betsa ukedia Abraham inun, Isaac inun, Jacob ja mai pakea en jatu yubaniwen taexun ja matu yunukin en matu ibu wamaxanaii. Eadan, en matun xanen ibu Jehováki, ean en matu jancha waidan. Ea ninkakanwen”— jatu wa

9 jabias jancha Israelin enabu Moisin jatu yuibia Egipto nawabun jatu dayama chakayamaiwen taea juinti nishma punu nukajaidakin Moisin jancha danankin ana ninkakatsi ikabumaken 10 Jehová Diosun Moisés ana yuikin:

11 —Egipto anua Israelin enabu kainbainaibu Faraónen jau jatu bashiyamaxanun ana uinkin yuitanwen— aka

12 jakia Moisin kemakin yuikin:

—Uian, Jehováan, min jancha en jatu yusian Israelin enabu ea jawa ninkabumajaidaki. Enabun ea ninkabumawen taexun ¿jaska watan Faraónen en jancha ninkatidumen? Eadan, xabakabi janchai en peismabia en jaska yuitidumaki— aka

13 ana nemakin Jehován Moisés inun Aarón yunujaidakin:

—Nenu Egipto anua enabu Israelin enabu jau paxanunbun man jatu iyuxanun en matu yunuaii. Na jabias jancha en matu yuixu matunabu inun Faraón banabimatankanwen— jatu wanikiaki.

28 Ana xaba betsatian Egipto mai pakeanua Jehová Dios Moisésbe janchakin 29 ana yuikin:

—Eadan, en matun xanen ibu Jehováki. Jancha dasibi en mia yuixanai Egipto xanen ibu Faraón ea yuixunkubainxanwen— aka 30 Moisin Dios ana kemakin:

—Xanen ibu keska jancha pewen en janchatidumaki. ¿Jaskatan Faraónen en jancha ea ninka pewatan ea axunxanimenkain?— aka