—Israelin enabu mekenika Jehová Diosun jancha mia yuinun ea ninkawe: “Jadi tsua jiweabuma anuxun jau enabun en pepa shinain besi nawatanunbun jatu nemakin bashiyamaxanwen”, akin, mia yuikiki— aka

2 jatun jancha ninkabiakin jawa jatu tapinkatsis ikama Faraónen jatu yuikin:

—¿Matun mekenika Jehová tsuamen? ja ninkatan ean Israelin enabu en nichinunan. Ja matun mekenika en unanma inun matunabu besi buaibu en jatu nichianmajaidaki— jatu wa

3 Moisés jawen betsa Aarónbetan Faraón ana yuikin:

—Hebreo nawabun mekenika Diosun nuku yuimaki. Jaskawen taea nukun mekenika Jehová kenwanun ika jadi tsua jiweabuma anua xaba dabe inun besti bui janu jikitan kenwankin chaxuwan ichapa tesenxun nun kuaxanaii. Nun jaska wakin kenwanmaken nuku kupikin tenantiduki, isin paepa tenemaimenkain, nukuki sinataibun nupewen nuku detetidubumenkain— aka

4 jakia jatun jancha ninkakatsi ikama jatuki sinatakin Egipto xanen ibun jatu kunyan akin:

—Moisés inun Aaróneen, ¿jaskakin matunabu dayabiaibun jatu itimaska wakin man jatun daya jenemanun ikai ikai? Nenuxun ea jaska yuiama dayaditankanwen— iwanan,

5 ana jatu yuikin:

—Matunabu midimabun ea daya chakayamaxunbiaibun ¿jaskakin man jatun daya jenemabainun ika ikai? Budikanwen— jatu watan

6 jabias xabatian xanen ibujaida Faraónen jawen yununikabu betsabu Egipto nawa inun betsabu Hebreo nawa jabun jatu dayamakin tananikabu jatu ichawatan yuikin:

7 —Israelin enabun ja jiwe wati mai jusikin kapanmisbu basi tsusin man jatu pewaxuna amisbudan, ana jatu inanyamakanwen, natian jau ibubis basi tsusian ichawatan akubainunbunan. 8 Man jatu inanmabia xaba tibi jati kainmakubainmisbu jatu jenemama ana jabiatidi jatu amakubainkanwen, betsa maewamadan. Natian chikishkin ea ea akin: “¿Nukun mekenika Dios kenwain kaxanpa?” akin ea yukakanikiki. 9 Ja junibudan, ana jatu dayama chakayamakubainkanwen, daya jenei bexpakidan Moisés inun Aarónen chani jancha jau ana ninkayamakubainunbunan— jatu wa

10 janua Egipto nawa yununikabu inun Israelin enabun jatu dayamakin tananikabu mae betsa betsapa anu buxun Israelin enabu jatu yuikin:

—Faraónen nuku yunuxudan, matu yuinun ea ninkakanwen. “Basi tsusin chunkish nun ana matu inanmakiaki. 11 Egipto nawabun basi matu ana pewaxunabumakiaki. Natian janiada ibubis bechitan basi tsusin chunkish bitan bitankin mai basi kapankin pewatan jati man tsusin wanmis keska jawa jeneyamakanwen”, akin nukun xanen ibujaidatun matu yunuikiki. Jaskakiaki. Akubainkanwen— jatu akeakeaibun

12 jaskaken Egipto mai pakea jidabi anu basi tsusin chunkish ichawakin keyuxun bebidan bebidanaibun 13 Egipto nawa yununikabun jatu yunuchakayamakin jeneama:

—Xaba tibi jati nun matu yunua man amisti wadiakin jeneama akubainkanwen, basi tsusin chunkish nun matu inan man akubainmis keska wakinan— akin jatu kushabetana yunukubainaibun 14 jati amisbuti jayamaken Egipto nawa yununikabun Hebreo nawa jabun jatu dayamakin tanamisbu yukakin:

—¿Jaskakin uatian man akubainshina keska ma ana akamamen, uatian inun ikisdan?— akin jatu kusha kusha akabu

15 jaska jatu wabu Hebreobun jatun daya tanamisbu dasibi Faraón anu buxun kaxai keskakin Faraón yuikin:

—Xanen ibujaidatuun, ¿jaskakin min dayadubu min nuku bika tenemai? 16 Min yununikabun basi tsusin chunkish nuku ana inanmabia jaska watan nun anun keska nuku yunuchakayamakin: “Menan, jawaidakanwen”, akin nuku kushakanikiki. Min yununikabun nuku kanemakin chakabuwamakanikiki, basi nuku ana inanmadan— akabu

17 jatun jancha danankin Faraónen jatu yuikin:

—Daya ichapa man jayabia jawawen jaskatima chikishi maputanun ika bexun ea yukakin: “¿Nukun mekenika Jehová kenwantanpa?” ikin man ea yukabidanbidanaii. 18 Matunabu dayamaditankanwen. Tsuan matu basi tsusin chunkish ana inanmabia man uatian akubainshina keskadi jabiatidi xaba tibi jatu amakubaintankanwen— jatu wa

19 Hebreobu jabun jawenabu dayamamisbun jatu jawa betsa waxuanma shinain:

—¡Nun peidawa! Xaba tibi jatixun nun daya midintiduma nuku nuitapawaikiki— itan 20 Faraónen besuudia taxnibaini Moisés inun Aarónen jatu manai anu jatuki nukutan 21 jatuki sinatakin jabun yuikin:

—Nuku bika tenemakin jau nuku tenanxanunbun jawenabu Faraón nukukidi chakabu shinanmakin man jatu nukuki sinatamaii. Man jaska waiwen taexun Jehován matu unanti watan jau matu kupixanunwen— jatu watan taxnibainaibun

22 juinti nishmajaidatan Moisin Jehová Dios yuikin:

—Jehováan, ¿jaskakin na Israelin enabu min jatu nuitapajaidawai? ¿Ea jaska wakatsi min ea nenu yunuimamen? 23 Min yunua kushipawen juxun en Faraón min kena en jaki chanibiashinken minabu Faraónen jawenabubetan ana jatu ichakawa chakayamaikiki. Min jawa jatu mekei nuiamaki— aka