—Enabu en jatu yuibia ea ikunwanma ea yuikin: “Nukun mekenika Dios miki nukutan mibe janchamaki”, ea wakin ea yuixankanikiki. ¿Jatu jaska waxanpa?— aka

2 —¿Min jawa tsumamen, min meken anudan?— akin Diosun yuka

—Jawen chaxuwan bamati ji en tsumaki— ikaya

3 —Peki. Mai anu udenwen— aka ninkatan ji udenkin main tin aka jawaida dami dunu pianantan mesea dakaken Moisés datei kushikainaya 4 jakia Jehová Diosun ana yuikin:

—Dateyamawe. Mexunkain jawen jina debu tsumawe— aka ninkatan ikunwankin Moisés mexunkain jawen jina debu tsumaya samama ana dami jiaya

5 Jehová Diosun ana yuikin:

—Na en mia jaska wamaxudan, min jatu uinmaya chanima en miki nukutan mibe janchaxu mia ikunwanxankanikiki, eadan, en matun xenipabun Dioski, Abraham mekenikadan, Isaac mekenikadan, Jacob mekenikadan— 6 iwanan, ana yuikin: —Jamen betsadan min meken xuchi anu mistutan metsekewe— aka ninkatan jawen meken xuchi anu mistutan ana metsekeaya jawaida isin betsa mesejaida ma dami badux ui juxupajaida keska jawen meken sananxun uianyan 7 Jehová Diosun ana yunukin:

—Min meken ana mistutan ana metsekewe— aka

ninkatan ana jawen xuchi anu jawen meken mistutan metsekea jawen meken ma dasibi xuxa Moisin uin: —¡Jabaa! Ma en meken kayabixuki, en yuda jidabi xuxa keskaidan— ikaya 8 Jehová Diosun ana yuikin:

—Min ja dukun jatu dami waxuan danankin mia ikunwanbumaken janua ja ja kachu min dami waya janu mia ikunwantidubumenkain. 9 Jakia ja dami dabe min jatu axunbia mia jawa ikunwanbumaken ana jatu dami betsa waxunkin Egipton jene anua unpax shumuki bitanxun mai metu anu min jukaya unpaxbia jawaida dami jimixanikiki, ja dami dabe inun besti jau ikunwanunbunan— aka

10 Moisin kemakin:

—¡Min ea peidawawa! Xanen Ibuun, ewen nuiwe. En janchai peismawen taexun en atidumaki. Uatian inun ikis en jabiaskaski. Min tsuma en jana janbismaki, en janchai petidumadan— aka

11 Jehová Diosun ana yuikin:

—¿Tsuan yudabu kexaya bawanimen? Jantu wakin juyu wakin pata wakin bekun wankin inun uinmaidan, ¿tsuan amismen? Jakia ean besti en amiski, Jehová Diosunan. 12 Jadi janchama katanwen. Mia putama en mibe kakin min kexa inun min jana pewakin min janchai en mia pe janchamakubainxanaii, jadi min yuiaikididan— abia

13 shinankin jeneama jawenchains Moisin ana yuikin:

—Xanen Ibuun, ea yunuama ewen nuiwe. Juni betsa katuxun min jancha bumaxanwen— aka

14 janua Moiséski sinatakin Jehová Diosun ana yuikin:

—Levín baba Aarón min juchidan, jancha pejaidamis en unaiin. Miki nukunun ika ma juikiki. Miki nukui mia uin benima chakayamaxanikiki. 15 Jau mia ja janchaxunun jaska dasibi min jatu yuikatsi ikai min betsa Aarónbetan min jatu yuiaya matu dabe en medabewakubainxanaii, jaska man akai matu unanmakinan. 16 Dios keskakin min Aarón yuiai min jancha jatun mia yuixunxanikiki, min kexawen min yuiai keska wakinan. 17 Na chaxuwan bamati jiwen dami betsa betsapa wakin min jatu mesewakin uinmaxanaiwen taexun butanwen— aka

—Peki— itan

18 jawen kukan chaxuwan mekexuna anua ana chintunkidani jawen kuka Jetrón jiwe anu jikixun yuikin:

—Kukaan, ea ninkawe. Enabu Egipto anu jiweyuabumenkain en uinkatsis ikaii. ¿Ana chintunkaintanxanpa?— aka

Jetrón kemakin yuikin:

—Peki. Uinda unanuma katanxanwen—

19 Madián nawabu anuxundi Jehová Diosun Moisés ana yuikin:

—Jabun mia detenun ika inibudan, ma mawanibuki. Dateama Egipto anu ana katanxanwen— aka

20 januxun jawen ain inun jawen juni bakebu asno kamaki jatu katsauntan Diosun kushipaya jawen ji tsumabaini Egiptokidi Moisés kai taeaya 21 chipu Jehová Diosun Moisés ana yuikin:

—Egipto anu min ma jikia jatu dateti dami en mia amashina keska jakimama na jabias dami ana akin Egipto xanen ibu Faraón uinmaxanwen. Min jaska waxunbia jawen juinti kushi wakin ninkaisma en waken Egipto anua Israelin enabu jawaida Faraónen jatu nichinkin jeneama ikunkainxanikiki. 22 Jaska wakin Faraónen jatu nemaya Faraón ea yuixunkin:

—Jehová Jamebi Jiwemistun mia ea yuimaikiki. Ninkawe. Israelin enabu en juni bake iyua keskabuki, en bechipaijaidaidan, akin ea yuixunxanwen. 23 Israelbu buxun jau ea kenwantanunbun min jatu nemashinaki. Min jatu nemakubainmiswen taexun min juni bake iyua min bechipaijaidadan, en tenanxanaii— akin —Na jabias jancha Faraón min betsa Aarón ea yuimaxunxanwen— aka

24 Abraham jiwekunkaunaitian jawada Diosun Abraham yununi shinanma jawen juni bake iyuatun jina kubichi Moisin mexteama iyamaken Egiptokidi bai kawen bui janu uxaibu anu jaki nukuxun kupikin Jehován Moisés tenanpanan 25-26 jawaida jawen ain Séforan jaska Moisin kaneni unantan jaki sinatakauan mishki nupe kenu bixun jawen bake iyuatun jina kubichi mextexun Moisin tapu takin yuikin: “Min nukun baken jimiwen taea min ana mawama min en bene jiweyuaii”, aka jawen baken jina kubichi Séforan ma mexteawen taea Jehová Dios jaki sinatai daetan Moisés kupiama inikiaki. Ma uxe betsa binukainaya

27 bebunkidi Jehová Diosun Moisin betsa Aarón yuikin: “Janu tsua jiweabumanu min betsa Moiséski nukui kawe”, aka Aarónen ninkatan chaijaida jaki nukui kai janu Diosbe nukuti mati anu Moiséski nukutushia badi ichapa uinsma benimajaidakin yukakin tantsu aka 28 Jamebi Jehová Diosun Moisés yuikin yunushina jancha inun jawen jatu dateti dami axanaikidi Moisin Aarón yui jaki dasibi chani keyua ninkatan 29 jaskabaini bui jikishinxun Moisés inun Aarón kaxun Israelin enabu xanen ibubu ichawaxun 30 jaska Jehová Diosun Moisés yuima jawen jancha dasibi Aarónen jatu yuixunkin inun jawen jatu e imati dami axanwen, iwanan, yunuima ibubis Moisin ja dami jatu axunkin jatu uinmaya

31 ja dami jatu jaska waxuna jawenabun uin chanima ikunwankin Egipto nawabun jatu ichakawamisbu Jehová Diosun uinmis unantan Israelin enabu danti itan beti ixun Jehová Dios kenwanibukiaki.