—Moisiin, Moisiin— aka

Moisin kemakin yuikin:

—En nenuki. Ea yuiwe— aka

5 Jehová Diosun yuikin:

—Ea dapi chaima juyamawe. En nenuken na mai medibiki. Jaskaken eki mesekin min bichi tae jutsekewe— aka ma jutsekeken

6 ana yuikin:

—En min xenipabun mekenika yushinki. Abraham inun, Isaac inun, Jacobun ea ninkakubainiwen taexun duawakin en jatu mekekubainiki— akaya Dios uiin Moisin datekin jawen mekenen jawen besu achimaken 7 ana Jehová Diosun xabakabi yuikin:

—Egipto anuxun enabu ichakawaibu xabakabi en jatu uinmis en unaiin. Jatu dayama chakayamaibun jau en jatu medabewanun nuitapai janchawen ea yukaibu en ninkaii. 8 Egipto nawabun jatun kushipawen jatu tsumawani jatu mebinbainkin ean Egipto mai pakeanua jatu paxawakin iyunun ika ma en butuaki. Jadi ja mai pakea betsa pepa ewapa anu unanuma jiwexanaibu anu piti midima jamen ikai anu en jatu iyuxanaii. Janu Canaán nawabu inun, Hitita nawabu inun, Amorreo nawabu inun, Ferezeo nawabu inun, Heveo nawabu inun, Jebuseo nawabu ikis jiweabu anu jatun mae tibi en jatu mebinma akeakexanaii. 9 Israelin enabu kaxaibu ma en ninkaki. Jabiaskadi Egipto nawabun jatu ichakawa chakayamaibu ma en uianki. 10 Jaskawen taexun enabu Israelin enabu Egipto anua min jatu kainmaxanun Egipto xanen ibu bena anu en mia nichinkin yunuyuaki— aka

11 Moisin Dios kemakin yuikin:

—¿Jaskakain xanen ibu Faraón bena anu kaxun enabu Israelbu en jatu janchaxuntan Egipto anua en jatu kainmai katidumen, en jawaumabiadan?— aka

12 Jehová Diosun ana kemakin:

—Ibubis min jawaumabiaken mia medabewakin mia putama en mibe ikunkainxanaii. Egipto anua enabu iwei nenu na mati medibi anu min ana juxun minabubetan min ea kenwanyan padanma en mia yunuima min uinxanaii— aka

13 datekin Moisin ana yuikin:

—Min ea jaska wa Israelin enabu anu kaxun ean jatu yuikin: “Jatun nukun xenipabu mekekin duawapauni Diosun matu anu ea yunushinaki”, en jatu wabia ea yukakin: “¿Jadakidi kenamen?” ea akabu ¿Jadakidi jatu yuixanpa?— aka

14 Diosun ana yuikin:

—Eadan, Enmebi En Jiweadan, En Eaki. Jadi Israelbu min jatu yuitiduki: “Jamebi Jiweatun matu anu ea yunushinaki”, akinan— iwanan,

15 ana Moisés yuikin:

—Eskakidi jatu yuikinan: “Matun xenipabu Abraham inun, Isaac inun, Jacob jatun jabu mekekin duawapaunidan, Jehován matu anu ea yunushinaki”, akin jatu yuitanxanwen. Na kena “Jehová” jabias ikunkainxanikiki, en kena jawa betsa maeamadan. Na en kena “Jehová” dasibitun ea shinantidubudan, jenenakamaki— iwanan 16 —En mia jaska wa kaxun Israelin enabu xanen ibubu ichawatan jatu yuikin: “Jehován matun xenipabu Abraham inun, Isaac inun, Jacob mekekin duawapaunitun ea bechitan matukidi shinankin Egipto anuxun matu ichakawa chakayamaibu matu uinmisxun ea yuishinaki. 17 Jabiatiandi Egipto anuxun matu bika tenemaibu matu medabewakin paxawatan janu Canaán nawabu inun, Hitita nawabu inun, Amorreo nawabu inun, Ferezeo nawabu inun, Heveo nawabu inun, Jebuseo nawabu jiwebaunabu anu iyukin mai pakea pepa anu piti inun nuxuti midimanu Diosun matu iyuxanikiki”, akin jatu ea yuixuntanxanwen. 18 Min jatu jaska wa mia ninka pewaxankanikiki. Jaskaken Egipto xanen ibu bena anu jatubetan uin kaxun xanen ibu yuikin: “Jehová Hebreobu mekenika Dios taxnikidan nukuki ma nukushinaki. Jaskaken nuku jeneyuwe, xaba dabe inun besti uxakain nukun mekenika Jehová kenwankin chaxuwan ichapa tesenxun kuakin nun benimawayui kaidan”, akin ja xanen ibu jaska ekidi yuixunxanwen. 19 Min jaska ekidi yuibia Egipto xanen ibun matu ninkatan matu nichianma ixanikiki. Jakia en kushipawen ninkamas en matu mebikinanxanaii. 20 Jawenabu en kushipa jatu uinmakin ichapabu jatu tenankin en jatu betsa betsapawen date date akubaina jatun mae pakeanuxun en jaska waiwen taexun datekin chipu xanen ibu Faraónen matu nemama jenexanikiki. 21 Jabiatiandi Egipto nawa dasibi en datekin matuki pe shinanmaya meken bestia man mais kama ixanaii. 22 Jakia man kainkainaitianan, matun ainbu tibitun Egipto nawabu matu dapi jiweabu inun jabe jiweabu anua jau jatun dau tibi yukaxanunbunwen, plata mabu inun oro mabudan. Ja dikabi jatun tadi pepa shadabu biankubaunkin keyutan matun juni bakebu inun matun ainbu bakebudi jatun tadi jatu sawemaya jau jaya bununbun jaska wakin Egipto nawabu man jatu nuitapa waxanaii, jatu kupikinan— aka