Moisés kainikiaki, na janchadan
2
Israelin juni bake Levín enabu betsan Levín janubi jawenabu kayabi ainbu bikin ainwantan bake wakubainaya juni bake bestichai inun ainbu bake bestichai kainmanixun 2 ana juni bake betsa bima june pustukin bachi xaxa sawemis atimas kaian juni bake jawenduajaida uintan jau jene anu putayamanunbun yaushitan uxe dabe inun besti june yumewakin 3 jakia jawen ewan shinankin: “En ana june yumewatidumaki”, ixun chichan ewapa bixun jawen xui buiwen buyakin keyuxun chichan jabiatiudi bixun jadi buiwen xui buya keyutan jawen bake chichanki nanetan chichan betsawen beputan yumewen mawexetan buxun jene pasu anu xachiwan nakumakin nuntantan nunuken 4 jawen ainbu bake yuikin: “Ea uindaxunwen, jaskaimenkainan”, aka benanta junexun jawen chipin manaya5 chipu Egipto xanen ibujaida Faraónen ainbu bake nashi jui jawen medabewanikabu chipashbube jene ketanbainkin xachiwan medan chichan nunua bechitan jawen medabewanika yunua chichan jenen nunua nexexun bexun 6 bepenxuna xanen ibun baken uian juni bake kaxaya jawen nuikin yuikin:
—Nadan, Hebreo bakeki, Israelin enabudan— akaya 7 janua jawen chipi junea taxnikidan juxun xanen ibun bake bechipaiaya yuikin:
—Jau mia chuchu amaxunkubainun ¿enabu chuchuya mia yuixuntanpa?— aka 8 Egipto xanen ibun baken yuikin:
—Itanwen— aka kushikaini kaxun ja kainma jawen ewa kayabi jaskaxu yuia jawaida kushikidani 9 jatuki nukua Egipto xanen ibun baken yuikin:
—Na bake en bixudan, mian ea yumewaxuntanwen. Min ea chuchu amaxunaya en mia pakakubainxanaii— aka ja bake ibuan iyuxun chuchu amaxunkubainkin 10 ma yumewaxuntan iyuxun Egipto xanen ibun ainbu bake inantan ibu ma kaken xanen ibun baken jawenabu yuikin:
—Na bakedan, enamabia ena kayabi en waii. Jene anua en nexeimawen taexun jawen kena Moisés en waxuki— jatu wa
Egipto anua Moisés paxai kainkainikiaki, na janchadan
11 ma badi ichapajaida kaken Moisés ma juni ewajaidatun jawenabu Hebreo nawabu uin kaxun jatun daya bika daya chakayamaibun jatu uinbaunkin jawenabu Hebreobu bestichai Egipto nawa pubenen kusha kusha akaya bechitan 12 datekin uiankeaketan janu tsua niamajaidaken jawenabu jatu manakuxunkin Egipto nawa kushakin tenantan janubi mashi basantan datanxun achimatan inun ka 13 uxashini bestentan ana jawenabu uinun ika kaken jawenabu Hebreo dabedi ja idabei detenamediaibun bechitan ja juni puben Moisin yukakin:
—¿Jaskai yuda betsa ikaskin janubi minabu min kushai?— aka juni pubenen yuikin:
14 —¿Tsuan mia xanen ibu waimamen? Mian daki min jatu unanti wamiski, kupikinan. Min Egipto nawa tenanshina keska wakin min daki eadi tenanun ika ikaii— aka Moisin ninkatan datekin shinain:
—En deteshinken dasibitun unankanikiki— ika 15 jaska Moisin ashinken Egipto nawa xanen ibu Faraónen tapintan manakukin tenanpanan Egipto anua Moisés badi juaikidi paxai kai mai betsa tsusinjaida pukebaini uke betsaudi Madián nawabu anu jikitan unpax biti kini anu ma kema tsauken
16 unpax beatiwen jawen amati mata waxun jatun epa Reuelin chaxuwan ichapa unpax amanun, iwanan, Madián nawa Diosbe janchaxunikan ainbu bake chipashbu 7tun jatun epan chaxuwan dasibi iweabu 17 jakia chaxuwan uinika betsabu bexun unpax yaushikin chipashbu jatu nema taewaibun Moisés benikaun jatu nemaxunkin chaxuwan uinika betsabu jatu nichinxuna buaibun jatu medabewakin unpax beatantankin chipashbun chaxuwan amaxunken 18 janua jatun chaxuwan iyui jatun epa Reuel anu jikiaibu jatu yukakin:
—¿Jaskakin jawaida man jatu amatanai?— jatu wa bestichaitun kemakin yuikin:
19 —Chaxuwan uinika betsabu nemaxun Egipto nawan nuku medabewaxuki. Ja bestimadan, unpax beatantankin min chaxuwan nuku amaxunxuki— aka
20 jawen bakebu yukakin:
—¿Jania ja juni pepadan? ¿Jaskakin ja besti man bashibidanxumen? Ja juni pepa itankanwen, jau ebetan piyununan— jatu wa ana buxun 21 ja juni iweabu beya wakin Reuel inun jawenabu Moisin jatu bechipai jatube jiwekunkainaya chipu ainwanmakin Reuelin jawen ainbu bake Séfora bimaken 22 januxun juni bake bima kaian jawen bake kenakin Moisin yuikin: “Juni betsan mai pakea anu nawa keskai en jiwekunkainaiwen taexun jawen kena Guersón en waii”, jatu wa
23 chipu badi ichapa kaken Egipto nawa xanen ibu ma mawaken Egipto nawabun Moisin enabu Israelin enabu jatu ichakawakubainaibuwen taea juinti nishmajaidai kaxai jau ea medabewanun ika Israelin enabu nuitapai jatun Dios ea akaibu Diosun ninkatan 24 jabu nuitapajaida waibu jancha ninkatan jaska jatun xenipabu Abraham inun, Isaac inun, Jacob yubani Diosun ana shinankin 25 Israelin enabu nuitapaibu uinkin medabewanun ixun jatu ana jaibuwakin taewabainikiaki.