ÉXODO
Egipto anua Israelbu paibu jatu nuitapawakubainibukiaki, na janchadan
1
Israel, jawen kena betsa Jacob Egipto anu jawen bakebuya jikinikiaki, jabu tibi jawenabuyadan. 2 Jawen juni bakebudan, Rubén inun, Simeón inun, Leví inun, Judá inun, 3 Isacar inun, Zabulón inun, Benjamín inun, 4 Dan inun, Neftalí inun, Gad inun, Aser Egipto anu jatun epabe jikinibukiaki. 5 Ja dukun jawen bake José kaniki dasiabu Jacobun enabu tanabudan, 70 yudabu Egipto anu jatuki dasitan jiwei taenibukiaki.6 Ja dukun Jacob mawaimaken chipu José inun jawen betsabu inun jati Jacobube Egipto anu jikinibudi mawakubainaibun 7 jakia Israelin bababu pai bake ichapa pawakin jatun mai pakea jatu achin keyui ana pachakayamai kushipai jiwekubainkin jatun mae anu jiwei nati ikaibun
8 chipu Egipto xanen ibujaida Faraón bena xanen ibui taekin jaska Josén jawenabu medabewapauni unanmatun xanen ibun jawenabu jatu yuikin: 9 “Uinkanwen. Israelin enabu pachakayamakin kushipakin nuku binupai ikanikiki. 10 Jaskakenan, jawadawen jatu bextekubainankanwen. Nun jatu jaska wama ana pakin nuku binujaidaibun tsuabuda nukuki sinatakin nuku detenun ika beaibun Israelin enabu pajaidakin nukuki sinatakin jabuki dasitan jatubetan nuku detebaini Egipto anua paxai keyutidubuki”, jatu wa
11 jaska jatu yunua chibankin Israelin enabu jatu ichakawakin jau jabun jatu uinkin jatu dayama chakayamanunbun jatu yunuabu jatu bika tenemakin jatu dayama chakayamakin janu piti aduti maewan dabe Pitón inun Ramsés Egipto xanen ibu Israelin enabun jau benixununbun jatu yunua axunkubainaibun 12 jatu dayamakin jatu bika tenemabiaibun jabiaskabiaken ana pajaidaibun janua Egipto nawabu jatuwen datejaidakin
13 Israelin enabu ana jadakidi kainkaintima wakin jatu esclavo tsuma waxun jatu kusha chakayamakin 14 jatun jiwea bikawakin jatuki besti chiti itan jatu daya kushipajaida jatu amakin ja jiwe wati mai basi jusia jatu pewamakin betsabudi jatuki sinatabetanan bai anudi jatu dayamakin jatu jaska wakin Israelin enabu Egipto nawabun jatu nuitapajaidawanibukiaki. 15 Januxundi Egipto xanen ibujaidatun bake kainmanika dabe Israel ainbu dabe jatun kena Sifrá inun Puádan, ja dabe jatu kenaxun jatu jancha wakin jatu yuikin:
16 —Matunabu bake kaiainbu jatu kainmakinan, jawa bake ikimenkain uintan jatu medabewakubainxankanwen. Juni bake kaianyanan, jatu tenankubainxankanwen. Jamen ainbu bake kaianyanan, jenexankanwen— akin jatu yunua
17 jakia jatu jaska wabia jabun bake kainmamisbun jawa xanen ibun yunuti jancha ninkaxunama Diosun kushipaki mesei datekin juni bakebu kaiain jawa jatu meama jiwemakubainaibuwen taexun 18 Egipto xanen ibun ana jatu kenamaxun jatu ja akin yuikin:
—¿Jaskakin juni bakebu kaiain man jatu tenanma jatu jiwemakubainai?— jatu wa 19 bestichaitun xanen ibu yuikin:
—Nuku nun Hebreo ainbuaibudan, Egipto ainbu nun keskabumaki. Nun kadiamaken juinti kushitan jawaida ibubis jatun bake kainmisbuki, nun jatu medabewadiamadan— aka
20 jaskaken bake kainmanika ainbuaibu Diosun jatu medabewaya janua Israelin enabu pai kushipai ana ichapajaidakubainaibun 21 bake kainmanika ainbuaibu Diosun kushipaki meseaibuwen taexun jawenabus pawakin Diosun jatu medabewakin pewakubainikiaki. 22 Ana jawawen jatu nematima Egipto xanen ibu Faraónen jawenabu dasibi yunukin: —Hebreo juni bakebu tibi kainyain jatu mebintan nukun jene anu pukukubainkanwen, jakia jatun ainbu bakebu besti kainyain ja jatu jenexunkubainkanwen, jau jiwenunbunan— jatu wa jaska jatun xanen ibun ma jatu yunua akin taewabainaibun