Si Paulus Inuhubm Lama Yuhudi
24
1 Kilimaan pungaan ina si Ananias kupala migia pegogot ugama ma' n Tertulus puguam kindi bandar Keseria.
Ma' kiara pa kutua' lama Yuhudi miniaa' siga lama na ingua' timomu gubnur Peliks nggien ingadu aal kentangan i Paulus.
2 Waktu peguhuman na pungaan nentaadn na lama simuak inubu' si Paulus pinisuak.
Pegsuak nya,
si Tertulus ingadu aal i Paulus di datu' Peliks.
Uubm nya,
“Datu',
pandi ihi aha migia panggat ma' pintaardn.
Ina na,
bunua mi aman ma' maju
3 nggien mi ga pudn ihi kintabm ma' megsuhur di diha.
4 Tei' supaya ga nda' ngondi' masa,
gaabm pa datu' kidoor aal nuan mi ngadu nti.
5 “Sia na pengasau pegolok pirinta.
Mbimbi ga bunua sia ndepatadn mi mpitindag bani lama Yuhudi.
Ma' sia hai ndedi kutua' lama tidi bandar Nejarat na.
6 Ina hai sia bas nginam ngedama' bali migia nggien mi simbiaakng,
tei' ihi ingedahap nya.
Ngundakng ihi na nguhubm nya miaa' undakng-undakng ugama mi,
7 tei' si Lisias,
kupala sojar na,
ingerampas nya tidi dihi
8 ma' igisuru' supaya ga lama ngadu nya ngua' temomu diha.
Bakng aha kimuat i Paulus,
asal kempandi aha kai kentangan aal inadu mi nti.”
9 Na lama Yuhudi dia miaa'-miaa' ingadu aal kentangan i Paulus ma' ipebaar onu ga susuad n Tertulus.
Pegdawaadn I Paulus Di Tingguangan Gubnur Peliks
10 Inubu' gubnur na inirdikng ma' pii' na di i Paulus,
tanda' sia kaap megdawa.
Inubu' si Paulus nigsuad,
“Pandi ou meleid na ma' pida ntoudn pa datu' ndedi ahibm di bunua nti.
Ina na,
senang guakng ku begdawa di tingguangan nu.
11 Maap nu kimuat di lama,
nda' lobi tidi pulu' dua rubian ringa' diti ou kindi Yurusalam ingua' simbiaakng.
12 Ndara lama Yuhudi bas ikurupa' diaadn nigbunu' duma' lama di bali migia nggien simbiaakng atau pudn ipitindag bani lama di bali leidn nggien simbiaakng atau mbimbi ga di bandar na.
13 Siga lama na hina ndara bukti' ngadu diaadn bakng baar aal ina ma' nda'.
14 Asal ngahudn ou nti:
ou simbiaakng di Itala nuan apu'-otud mi simbiaakng,
ma' miaa' di ajaardn baru kentangan Yesus bitangan siga lama nti sala'.
Tei' kahal ou pisiaa di nentaadn na buk sinuart nabi Musa ma' nabi leidn ringa' bu'.
15 Sama hai ma' siga lama na,
ou pudn ngarap ma' pisiaa hai Itala.
Ihi nggait ma' pisiaa Itala miag malik suhu lama miaa' kendahadn na ma' nda'.
16 Ina na,
kahal ou pa nggaap-aap supaya ga peresaadn ati ku mpia di tingguangan Itala ma' munusia'.
17 “Pida ntoudn leid ku ndara di bandar Yurusalam.
Peguli' ku kindia,
igiit ou siidn buntuadn adi suhu bangsa ku miskidn ma' nimbali punganyam mori di Itala.
18 Pegpunga ku miniaa' adat monsu' nggien mirisi deri ma' atakng ku nimbali punganyam,
dia nggien siga lama na iketomu diaadn.
Waktu ina nda' mbarabm lama miniaa' diaadn ma' ndara ingar.
19 Tei' kiara lama Yuhudi tidi bunua Asia,
patut siga lama na kinditi ngua' ngadu aal ku di diha bakng ou kiara sala'.
20 Bakng kehaadn,
biardn na siga lama nti mpuluas nentaadn na onu ga ndepatadn nda binuat ku ndoot di mekama ugama.
21 Set ga simpatad susuad ku di siga lama na di mekama ugama ringa' diti,
ou inuhubm pasal ou pisiaa lama mati biag malik.”
22 Inubu' datu' Peliks imutus peguhuman ina.
Sia pandi ajaardn baru kentangan Yesus.
Uubm nya,
“Nggait ou i Lisias,
kupala sojar na,
kinditi,
nubu' ou nelesai uhubm nti.”
23 Inubu' sia igisuru' kupala matus sojar ngijaga i Paulus ma' tetap naadn nya,
tei' si Paulus biniriadn toyuk kuluagadn.
Siga lama na nda' ngerarakng pangan nya ngua' ngahap ma' nuud nya.
Si Paulus Di Tingguangan Datu' Peliks Ma' Saa Na
24 Nda' ga keleid pungaan ina,
miatakng na datu' Peliks ma' saa na.
Ngaardn saa nya si Durusila,
sia bangsa Yuhudi.
Datu' Peliks igisuru' lama ingai i Paulus ma' sia ikidoor nya nigsuad pungga' ga' pisiaa di Yesus Kiristus.
25 Tei' waktu i Paulus ingelombus susuad na kentangan miaa' kendahan Itala ma' naadn deri,
ma' uhuman odu kiamat,
datu' Peliks niggolok.
Uubm nya,
“Ina ga.
Nggisuru' ou hai diha malik kinditi bakng kiara masa ku.”
26 Sia ngarap i Paulus nuap nya ma' siidn.
Ina na,
sia meseirt na nggisuru' lama mengai i Paulus nggien nsusuad ma' deirdn na.
27 Datu' Peliks inaadn i Paulus di soig giil pasal sia mingin mengai guakng lama Yuhudi.
Pegpunga dua ntoudn,
si Perkius Pestus pasi ndedi gubnur gimanti datu' Peliks.