Si Paulus Di Tingguangan Gubnur Pestus
25
1 Kutuluadn pungaan datu' Pestus miatakng di bunua Yudia,
sia ipanu tidi bandar Keseria limombus kindi bandar Yurusalam.
2 Dia kiara kupala pegogot ugama ma' kupala lama Yuhudi ingadu aal kentangan i Paulus.
3 Siga lama na ingiriat inguman datu' Pestus supaya ga si Paulus utudn kindi Yurusalam pasal siga lama na kiara adu-adu mmati nya di tenga' daidn.
4 Tei' datu' Pestus miabat,
“Si Paulus tinaadn di bandar Keseria ma' ou pudn nda' na meleid pebalik kindi.
5 Biardn na sebagi kupala nyu miaa' diaadn kindi ngua' ngadu aal kentangan nya bakng kebenaardn sia kiara sala'.”
6 Pegpunga datu' Pestus minien di Yurusalam walu' atau pudn pulu' rubian,
sia pebalik kindi bandar Keseria.
Sikng suub sia mulei nguhubm ma' igisuru' supaya ga si Paulus utudn kindi soig mekama na.
7 Pegompot nya dia,
suhu lama Yuhudi miatakng tidi Yurusalam na miusag igiliput nya ma' ingadu aal ndoot kentangan nya,
tei' ndara bukti'.
8 Inubu' si Paulus ingedawa.
Uubm nya,
“Ndara keselaadn ku di undakng-undakng nabi Musa,
atau pudn di bali migia nggien lama Yuhudi simbiaakng,
atau pudn di raja migia kuasa di bandar Rum.”
9 Tei' datu' Pestus mingin mengai guakng lama Yuhudi bas ingadu aal i Paulus.
Ina na,
sia ikimuat i Paulus,
“Ngahudn aha kindi bandar Yurusalam supaya ga di ou nguhubm diha?”
10 Inubu' si Paulus miabat,
“Na haa' na ou gugusag di mekama di soig pimirintaadn raja migia kuasa di bandar Rum.
Ina na,
diti ou na nuan nguhubm.
Aha pudn pandi ndara keselaadn ku di lama Yuhudi nti,
11 tei' bakng baar ou kiara sala' ma' mistii' uhuman mati,
ngahudn ou.
Tei' bakng siga lama nti set ngadu diaadn sei ma' nggitoot,
ndara ma' simbatu pudn lama kaap mori diaadn di siga lama na.
Asal ou kiuhubm raja migia kuasa di bandar Rum.”
12 Pegpunga datu' Pestus nigtuhar pihiardn ma' lama tuhakng nisihat nya,
sia miabat,
“Pegka aha ikiuhubm raja migia kuasa di bandar Rum,
gaabm aha pa kimindi nya.”
Si Paulus Iniit Kindi Tingguangan Raja Agripa Ma' I Bernike
13 Nda' ga keleid pungaan ina,
miatakng na raja Agripa ma' pusud na i Bernike.
Siga lama na kindi bandar Keseria ingua' megramai datu' Pestus ndedi gubnur dia.
14 Pasal meleid na siga lama na dia,
datu' Pestus ingatur aal i Paulus di raja na.
Uubm nya,
“Kiara lama tinaadn kati' tietak datu' Peliks.
15 Atakng ku di Yurusalam,
suhu kupala pegogot ugama ma' kutua' lama Yuhudi ingadu aal kentangan lama na di diaadn ma' ikibori supaya ga sia dubuadn uhuman mati.
16 “Tei' uubm ku,
‘Leidn ga kubasadn pimirintaadn Rum ngedabu' uhuman bakng lama nuan nguhubm na nda' bas biniriadn piluakng ngedawa di uhubm.’
17 Pegdatakng siga lama na diti,
sikng suub turus ou inguhubm ma' igisuru' supaya ga sia utudn kindi soig mekama.
18 Bu' lama bas ingadu nya na miusag,
tei' siga lama na nda' imoro' sia nigbuat kasau ma' ndoot singgurua di soig seromo ku.
19 Siga lama na set ga nigtangkar kentangan ugama nda ma' simbatu lama meti,
ngaardn nya Yesus.
Poro' i Paulus,
biag melik.
20 Pasal ndou iketotog aal ina,
ina na ou ikimuat i Paulus bakng sia ngahudn nuan ku nguhubm di Yurusalam.
21 Tei' sia ikiuhubm raja migia kuasa di bandar Rum ma' kibori supaya ga sia nuan nggipat sampai na punga nuan raja Rum nguhubm.
Ina na,
ou igisuru' naadn nya sampai na kompot odu ou ngatad nya.”
22 Inubu' raja Agripa nigsuad di datu' Pestus,
“Ou deirdn ku mingin kidoor onu tigoodn nya.”
Datu' Pestus miabat,
“Suub bu' tuadn kidoor onu ga tigoodn nya.”
23 Sikng suub raja Agripa ma' i Bernike simuak kindi soig mekama miaa' di adat raja.
Kiara sojar milibuat panggat miniaa' ma' suhu lama leidn kipanggat di bandar na.
Inubu' si Pestus igisuru' supaya ga si Paulus utudn kindia.
24 Datu' Pestus nigsuad,
“Raja Agripa ma' dihu nentaadn na kati',
nti na lama nuan nentaadn na lama Yuhudi di Yurusalam ma' lama kati' ngadu di diaadn.
Siga lama na meragu' ma' moro' sia nda' patut biag,
25 tei' ndou iketomu onu ga keselaadn nya patut uhuman mati.
Ina na,
na haa' na pasal sia deirdn na ikiuhubm raja migia kuasa di bandar Rum,
ngundakng ou na ngatad nya kindi Rum,
26 tei' ndou pa iketomu pungga' buat nuart suart kindi raja kentangan aal nya.
Ina na,
ou nggiit nya kindi tingguangan nyu,
lobi pa di diha raja Agripa,
supaya ga kiti kaap meriksa' nya nubu' kiara maap ku moro' di soig suart na.
27 Pasal pengeresaadn ku,
ndou patut ngatad lama tinaadn bakng lama nentabm ga nya kibilu.”