Si Paulus Di Bandar Korintus
18
1 Pegpunga ina,
si Paulus ipanu tidi bandar Atena kindi bandar Korintus.
2 Dia sia nigtomu ma' simbatu lama Yuhudi tidi bunua Pontus,
ngaardn nya si Akwila ma' saa na i Priskila.
Siga lama na pungaan tidi Itali pasal si Keludius raja migia kuasa mirinta di bandar Rum bas inunsub nentaadn na lama Yuhudi tidi bandar Rum.
Si Paulus miapit di bali siga lama na.
3 Inubu' ntetak ngkerai duma' siga lama na pasal pinsiriadn siga lama na sama.
Siga lama na tuhakng mbuat keyma.
4 Tiap-tiap odu simbiaakng si Paulus kindi bali simbiangan nggien mpiyahidn lama Yuhudi ma' lama Yunani supaya ga siga lama na pisiaa di Yesus.
5 Pegdatakng Silas ma' Timotius tidi bunua Mekedonia,
si Paulus beranti nigbubuat keyma nggien nya ngabis masa na mpompot birta tidi Itala di lama Yuhudi.
Sia moro' Yesus na nelamat munusia' ma' sia na Kiristus pinili' Itala.
6 Tei' waktu siga lama na dia musulaadn ma' ingijampa nya,
sia imepag abuk tidi pimihaadn na singgurua tanda' lama dia nda' mingin nirima Birta Mpia,
bu' deirdn na sia nigsuad,
“Nduhu kaap mpetampidn di diaadn atau di osi ga pudn waktu Itala ngedabu' uhuman di dihu.
Tidi na haa' na ou kindi kuberaman bangsa leidn.”
7 Inubu' si Paulus inetak siga lama na ma' ntetak di bali bangsa leidn,
ngaardn nya si Titius Yustus.
Sia pisiaa di Itala.
Bali nya nigsembela' duma' bali simbiangan lama Yuhudi.
8 Di bandar Korintus kiara lama pegogot bali simbiangan,
ngaardn nya si Kirispus.
Sia ma' nentaadn na lama di soig bali na ndedi pisiaa di Guruadn.
Mbarabm pa lama Korintus ikidoor birta piompot i Paulus ndedi pisiaa di Guruadn ma' pionsu'.
9 Pegrobi leidn miatakng di soig pingidadn i Paulus,
Guruadn nigsuad di nya,
“Dei kolok pompot Birta Mpia.
Ma' dei beranti moro' lama
10 pasal ou nuud diha.
Ndara ma' simbatu pudn lama ngkaap ngeladu diha pasal mbarabm lama pisiaa di diaadn kati' bandar nti.”
11 Ina na,
si Paulus mien di bandar Korintus sintoudn lobi leid sembela' nya ingira' lama dia birta tidi Itala kentangan Yesus.
12 Waktu i Galio ndedi kutua' mintiri' di bunua Akaya,
barabm lama Yuhudi nigsupahat ingedahap i Paulus.
Nubu' igiit nya kindi kutua' mintiri' na.
13 Pegdatakng dia,
siga lama na ngadu aal i Paulus.
Uubm siga lama na,
“Lama nti na igiit kuberaman lama simbiaakng di Itala,
tei' ajaardn nya nda' sugut ma' undakng-undakng mi.”
14-15 Waktu i Paulus ngundakng mulei nigsuad miabat na si Galio.
Uubm nya di lama Yuhudi dia,
“Suhu dihu lama Yuhudi hati',
bakng sia kiara keselaadn atau pudn sia bas ngeladu lama,
ou ngahudn nguhubm dihu.
Tei' nti pinegtengkaardn nyu kentangan ugama nyu,
ajaardn,
ngaardn kupala nyu,
ma' undakng-undakng nyu.
Ina na,
pegselesai uhu na deirdn nyu.
Ndou mingin miaa'-miaa' dihu kentangan aal nti.”
16 Inubu' sia inunsub siga lama na tidia.
17 Ma' kiara lama Yunani ingedahap Sestenis,
kupala bali simbiangan dia,
ma' ingeladu nya di tingguangan kuberaman lama di peguhuman dia.
Tei' si Galio nda' muduli'.
Si Paulus Pibelik Kindi Bandar Antiokia
18 Meleid na si Paulus metak di bandar Korintus.
Inubu' sia imuun lama pisiaa dia ma' limiaag nggien muli' kindi bunua Siria duma' Akwila ma' saa na i Priskila.
Nda' pa sia timulak,
sia nigbuurt gulu di bandar Kengkeria pasal punga na ginenggi nya di Itala.
19-21 Pegompot di bandar Epesus,
si Paulus simuak kindi bali simbiangan ma' nigtuhar pihiardn duma' lama Yuhudi dia.
Siga lama na mingin nya mien meleid dia,
tei' sia nda' ingahudn.
Uubm nya,
“Ou pebalik pa malik kinditi bakng ina kendahadn Itala.”
Pegpunga nya susuad oo' nga,
sia inetak i Priskila ma' saa na di bandar Epesus bu' limiaag tidia.
22 Pegompot nya di bandar Keseria,
sia ingindiaa kindi Yurusalam ingua' ikibirta suhu lama pisiaa dia.
Inubu' sia limombus kindi bandar Antiokia.
23 Meleid sia minien dia,
inubu' sia ipanu ingahap bunua Gelatia ma' Pirigia nggien ngosog guakng suhu lama pegbiaa' susuad Yesus dia maa' ga siga lama na tetap pisiaa.
Si Apolos Di Bandar Epesus Ma' Korintus
24 Waktu ina kiara simbatu lama Yuhudi miatakng di bandar Epesus,
ngaardn nya si Apolos.
Sia tidi bandar Iskandaria.
Sia pintaardn ma' pandi baar-baar kentangan Kitab.
25 Sia pudn inanu ingira' kentangan ajaardn Guruadn.
Sia pandi ma' ntogobm ngira' kentangan Yesus ma' ngam ajaardn nya,
tei' set nya ga pandi onu ga bas inanu ny Yohanes ingira' di lama pionsu' nya.
26 Sia ketogu' ngira' di bali simbiangan.
Pegdoor Akwila ma' saa na i Priskila ajaardn nya,
siga lama na igiit nya minili' ma' ingira' nya lobi pa kentangan ajaardn Itala.
27 Waktu ny Apolos mingin kindi bunua Akaya,
suhu lama pisiaa di bandar Epesus inuud nya inuart suart kindi lama pegbiaa' susuad Yesus di Akaya supaya ga siga lama na nirima ny Apolos.
Pegompot nya di Akaya,
sia baar-baar inulukng lama pisiaa di Yesus.
Siga lama na pisiaa pasal Itala migia lulug ma' nelamat siga lama na.
28 Si Apolos pintar ngala susuad lama Yuhudi di tingguangan barabm lama dia.
Sia imukti' tidi soig Kitab Yesus na Kiristus pinili' Itala.