Si Paulus Ma' Silas Di Bandar Tesalonika
17
1 Si Paulus ma' Silas ipanu miniaa' di daidn lemalu bandar Ampipolis ma' Apolonia.
Inubu' siga lama na miatakng di bandar Tesalonika.
Dia kiara bali simbiangan lama Yuhudi.
2 Singgurua kubasadn nya,
odu simbiaakng si Paulus kindi bali simbiangan.
Rapat-rapat ketolu nigsinut odu simbiangan sia pibelik kindia nigtuhar pihiardn kentangan Kitab ma' lama dia.
3 Sia iperati siga lama na susuad tidi Kitab ma' imori bukti' pungga' ga' Kiristus nuan niksa',
pitiaadn,
ma' biag malik.
Uubm nya,
“Yesus nuan ku susuad na haa' na,
sia na Kiristus pinili' Itala.”
4 Kuberaman lama Yuhudi ndedi pisiaa di Yesus ma' miniaa' i Paulus duma' Silas.
Ina hai mbarabm lama Yunani simbiaakng di Itala ndedi pisiaa di Yesus simuak na kilibuan kipanggat.
5 Tei' kiara lama Yuhudi ingedangki' imompodn sebagi lama ndoot ndara kerai tidi pasar.
Inubu' siga lama na igiit mbarabm lama leidn ngasau di bandar na.
Inubu' siga lama na kindi bali ny Yasun ingirubm i Paulus ma' Silas nggien nggiit siga lama na kindi ruar di tenga' kuberaman lama dia.
6 Tei' pegka siga lama na nda' iketomu i Paulus ma' Silas,
siga lama na ingiriaak ny Yasun ma' sebagi lama leidn pisiaa di Yesus iniit kindi suhu lama pegogot bandar na sembela' imeragu'.
Uubm siga lama na,
“Lama nti bas na ingasau nentaadn na lama mbimbi ga bandar nggien siga lama na mpanu.
Na haa' na siga lama na miatakng hai mingkati'.
7 Si Yasun bas na nirima siga lama na mien di bali na.
Siga lama nti nentaadn na nda' miaa' undakng-undakng raja migia kuasa di bandar Rum pasal siga lama na moro' kiara pa malik raja leidn,
ngaardn nya Yesus.”
8 Pegdoor kuberaman lama dia ma' lama pegogot bandar na kentangan ina,
siga lama na ndoot ati.
9 Inubu' lama pegogot bandar na igisuru' ny Yasun duma' lama leidn pisiaa biaar ma' siidn nggien ngijamin deirdn nda.
Inubu' siga lama na nuan mpelepas.
Si Paulus Ma' Silas Di Bandar Beria
10 Robi ina hai nentaadn na lama pisiaa dia igisuru' i Paulus ma' Silas kindi bandar Beria.
Pegdatakng siga lama na dia,
siga lama na kindi bali simbiangan lama Yuhudi.
11-12 Barabm lama Yuhudi dia ndedi pisiaa di Yesus ma' mbarabm hai lama Yunani dia ndedi pisiaa simuak na kilibuan kipanggat ma' kilihiadn.
Lama Beria lobi mpia tidi lama Tesalonika pasal siga lama na mingin kidoor Birta Mpia ma' odu-odu mandikng ajaardn i Paulus ma' Kitab nggien kiliid bakng baar ma' nda'.
13 Pegdoor lama Yuhudi tidi bandar Tesalonika si Paulus ipompot birta tidi Itala di bandar Beria,
siga lama na miatakng kindia ma' inuntudikng supaya ga lama dia sumusa guakng.
14 Ina na,
suhu lama pisiaa dia igundas ingatad i Paulus kindi tempoordn,
tei' Silas ma' n Timotius kahal pa ntetak di Beria.
15 Pegpunga siga lama na ingatad i Paulus di bandar Atena,
siga lama na pilupit malik kindi Beria.
Inubu' ipompot piit biidn i Paulus di Silas ma' n Timotius.
Si Paulus igisuru' siga lama na ngundas nolu' deirdn na.
Si Paulus Di Bandar Atena
16 Atakng i Paulus igait Silas ma' n Timotius di bandar Atena,
sia ikinuhu' kiid bandar na mbarabm patung nggien simbiaakng.
17 Ina na,
sia kindi bali simbiangan igiit lama Yuhudi ma' lama Yunani pisiaa di Itala megtuhar pihiardn.
Odu-odu osi ga metomu nya di pasar utudn nya susuad kentangan Itala.
18 Kiara hai kuberaman sigu tidi bigiadn Epikurus ma' Stua nigtangkar ma' i Paulus.
a Ma' kiara hai nigsuad,
“Sia mbikohu,
susuad nya ndara guna.”
Tei' kiara pa lama dia nigsuad,
“Sia susuad kentangan giidn bangsa leidn.”
Siga lama na nigpihir oo' nga rua pasal si Paulus moro' kentangan Yesus ma' aal lama mati biag malik.
19 Inubu' siga lama na igiit i Paulus kindi mesuarat migia di buid Arepagus.
Dia siga lama na nigsuad di nya,
“Mingin ihi kempandi onu rua ajaardn baru nuan nu mpompot na.
20 Kiara pirihara' nda' bas ndengoordn mi.
Ina na,
ihi mingin kempandi onu rati ina.”
21 (Siga lama na nigsuad oo' nga rua pasal lama di bandar Atena ma' bangsa leidn mien dia meseirt na mingin kidoor ma' ngatur kentangan pirihara' baru.)
22 Waktu i Paulus miusag di tingguangan lama mesuarat di buig Arepagus,
sia nigsuad,
“Suhu dihu lama Atena,
kiliid ou dihu kati' bandar nti,
uhu baar-baar simbiaakng di ugama nyu.
23 Waktu ku ngeroudn di bandar nti ma' ngkiliid nggien nyu simbiaakng,
ikiliid ou hai batu siusudn nyu nggien nyu simbiaakng.
Dia kiara sinuart nyu,
‘Adi Itala nda' kutunduadn mi.’
Na haa' na moro' ou dihu kentangan Itala nda' kutunduadn nyu.
24 “Itala imantur dunya' ma' nentaadn na kiara di soig dunya' nti.
Sia na Guruadn di langit ma' tana'.
Sia nda' mien di soig kuil binubuat munusia' adi giidn nda.
25 Sia nda' perlu' nuan munusia' nulukng pasal sia na imori kibiagadn,
intakng,
ma' nentaadn na di munusia'.
26 Ma' sia hai imantur tidi simbatu munusia' ndedi nentaadn na bangsa,
ma' igisuru' siga lama na mien di nentaadn na dunya'.
Nda' pa sia imantur munusia',
sia hai inotog waktu siga lama na biag atau pudn mati ma' mbi ga bunua nggien siga lama na mien.
27 Itala nigbuat oo' nga rua supaya ga siga lama na ngirubm deirdn na ma' mudadn-mudadn atakng siga lama na nigkengkabm siga lama na iketomu.
Tei' bakng uhu pandi,
sia nda' modu' tidi dihiti.
28 Singgurua kisimbatadn susuad lama ringa' bu',
‘Pasal kuasa Itala na,
kiti biag,
ngkaap nggisik ma' ngintakng.’
Sama hai singgurua pantudn sisuad sebagi bangsa nyu.
Poro' siga lama na,
‘Kiti nentaadn na anak Itala.’
29 “Pegka kiti nentaadn na anak Itala,
ndihiti kaap mpusugut Itala duma' patung binubuat tidi emas,
pirak,
atau pudn batu.
Ina nentaadn na binubuat tidi pihiardn ma' kependayadn munusia'.
30 Ringa' bu' lama nda' pandi kentangan Itala,
tei' sia ngampudn siga lama na.
Na haa' na Itala nggisuru' nentaadn na lama hati' dunya' nti timiligud tidi dusa nda.
31 Sia bas na inotog odu nggien nya ngelantik simbatu lama nda' ngelodis nguhubm nentaadn na munusia'.
Itala bas na imiag nya malik nggien mukti' di nentaadn na munusia' sia na inanu nya imili'.”
32 Pegdoor siga lama na dia kentangan biag malik,
kiara sebagi igesab i Paulus,
tei' kiara hai nigsuad,
“Mingin ihi pa kidoor ajaardn nu na malik.”