Si Timotius Miniaa' I Paulus Ma' Silas
16
1 Si Paulus ma' Silas limombus kindi bandar Derba ma' Listra.
Dia kiara simbatu tuni lama pegbiaa' susuad Yesus,
ngaardn nya si Timotius.
Sia pernahadn Yunani,
indu' Yuhudi ama' Yunani.
Na indu' pudn pisiaa di Yesus.
2 Nentaadn na lama pisiaa di bandar Listra ma' Ikonium mantug n Timotius mpia.
3 Si Paulus mingin supaya ga si Timotius miaa' deirdn na.
Ina na,
si Timotius sinuat.
Si Paulus nigbuat oo' nga pasal bangsa Yunani ndara adat nuat ma' sia pandi lama Yuhudi di bunua dia ketondu' n Timotius pernahadn Yunani.
4 Atakng i Paulus,
Silas,
ma' n Timotius ipanu tidi simbatu bandar kindi simbatu bandar,
siga lama na imoro' ma' igisuru' lama pisiaa di Yesus miaa' onu ga sinisuad lama piniit Yesus ma' kupala lama pisiaa di Yurusalam.
5 Ina na,
suhu lama pisiaa dia tetap pisiaa di Yesus ma' odu-odu kimonop na tuni siga lama na.
Si Paulus Kiara Pingidadn Di Bandar Toros
6 Si Paulus ma' siga ibal na limalu miniaa' di bunua Pirigia ma' bunua Gelatia pasal waktu ina Midua Itala nda' kigiu' siga lama na mpompot birta tidi Itala di Asia.
7 Pegdatakng di oit bunua Misia,
siga lama na ngundakng kindi bunua Bitinia,
tei' Midua Yesus ngerarakng siga lama na kindia.
8 Ina na,
siga lama na limalu ga Misia ma' turus na limombus kindi bandar Toros.
9 Rubian siga lama na dia miatakng na di soig pingidadn i Paulus kiara lama tidi bunua Mekedonia gusag di tingguangan na sembela' igisuru' i Paulus lemobot kindi Mekedonia ngua' nulukng deirdn nda.
10 Pegliid i Paulus pingidadn ina,
ihi igundas na nigpanyap nggien limobot kindi Mekedonia pasal ihi pandi Itala suru' dihi pompot Birta Mpia di lama dia.a
Si Lidia Pisiaa Di Itala
11 Ihi miuhad tidi bandar Toros ma' limiaag kindi puru' Semetrake.
Sikng suub ihi timulak na malik tidia kindi bandar Nepolis.
12 Tidia ihi ngintana' kindi Pilipi bandar migia di bunua Mekedonia.
Bandar Pilipi di soig pimirintaadn raja Rum.
Ihi mien dia kudaadn kutuluadn sei.
13 Pegodu nggien simbiaakng,
ihi limuas tidi bandar na ma' ninsir beig kosi.
Bas mi na nigpihir asal kiara nggien lama Yuhudi nguduaa dia.
Pegdatakng mi,
ihi miupug nigsuad ma' kilibuan nigtimung dia.
14 Kiara libudn dia meseirt na simbiaakng di Itala,
ngaardn nya si Lidia.
Sia tidi bandar Tiatira ma' bedagakng kumut begbeig belatukng.
Waktu nya kidoor ajaardn mi,
Guruadn imuha' guakng nya sampai sia pisiaa di Yesus.
15 Inubu' sia ma' lama di soig bali na pionsu'.
Pegpunga ina,
bu' sia igiit dihi minili'.
Uubm nya,
“Bakng uhu pisiaa ou bas na nirima Yesus ndedi Guruadn ku,
gaabm pa uhu mien di bali hu.”
Sia baar-baar imogos dihi mien di bali na sampai ihi miniaa'.
Si Paulus Ma' Silas Di Soig Giil Di Bandar Pilipi
16 Pegodu leidn atakng mi pebalik malik kindi nggien nguduaa,
ihi nigtomu ma' simbatu libudn.
Sia dipadn ma' nsuahadn kuakng.
Sia pandi ngudungu.
Tidi kerai nya ngudungu tuadn nya ngkaap untukng migia.
17 Libudn na miniaa' i Paulus ma' dihi sembela' nya meragu',
“Lama nti gigisuruadn Itala palikng kikuasa.
Siga lama na moro' pungga' ga' Itala nelamat dihu tidi dusa nyu.”
18 Ina sei kerai libudn na odu-odu sampai si Paulus nda' na mutu ati nuan nya ngasau.
Inubu' si Paulus ingilingu ma' nigsuad di kuakng simuak di libudn na,
“Tidi kuasa Yesus Kiristus ou nggisuru' diha lumuas tidi libudn noo.”
Pegsuad nya,
kuakng na limuas.
19 Waktu tuadn libudn na kimpandi deirdn nda nda' na ngkaap malik untukng migia tidi libudn bas nsuahadn na,
siga lama na ingedahap i Paulus ma' Silas.
Inubu' ingiriaak siga lama na kindi tenga' bandar nggien ngua' ingadu i Paulus.
20 Lama sompu' dipadn na igiit i Paulus ma' Silas kindi lama tidi bandar Rum pegogot uhubm dia ma' nigsuad di siga lama na,
“Lama dua tuni nti bangsa Yuhudi.
Siga lama na ngasau di bandar ti.
21 Lama nti ngira' dihiti adat nda.
Nda' maap ti lama Rum nirima atau pudn miaa'.”
22 Kuberaman lama dia pudn miniaa' musulaadn i Paulus ma' Silas.
Inubu' lama pegogot uhubm na imereit pimihaadn i Paulus ma' Silas ma' igisuru' supaya ga siga lama na nuan ngelapas.
23 Pegpunga siga lama na meleid liapas,
siga lama na pinisuak kindi soig giil ma' kutua' pegipat giil siuru' baar-baar ngijaga siga lama na.
24 Miniaa' inisuru' ina,
sia inaadn siga lama na di soig giil palikng lihu' nggien lumuas ma' ingipa' uai siga lama na di soig gogu' kiou supaya ga siga lama na nda' kaap nggisik.
25 Kira-kira tenga' robi si Paulus ma' Silas inguduaa ma' nigkapak imantug Itala.
Kuberaman lama di soig giil dia pudn ikidoor siga lama na.
26 Taha na bunua igisik sampai nentaadn na bansuk giil na pudn miniaa' iguyag-uyag ma' turus nentaadn na pintu' giil dia kimbuha'.
Inubu' taha na ranti bosi pinigat suhu lama di soig giil dia iloput.
27 Bu' deirdn na kutua' pegipat giil na ilimpungan ma' ikitiag.
Pegliid nya nentaadn na pintu' giil kimbuha',
tadn na nya pa' nentaadn na lama tinaadn dia inabis na irari.
Inubu' sia imurnus badi' na nggien ngundakng mmati deirdn na.
28 Tei' si Paulus ingerarakng.
Uubm nya,
“Oi!
Dei pemmati deirdn nu!
Ihi nentaadn na kahal pa kati'.”
29 Kutua' pegipat giil na igisuru' lama ingai lampu.
Inubu' sia limompud simuak di soig nggien i Paulus ma' Silas.
Pegsuak nya dia,
sia igotud-otud di tingguangan siga lama na sembela' nya igisik onsi.
30 Sia ingatad siga lama na kindi ruar sembela' nigsuad,
“Tuadn,
pungga' buat ku supaya ga ou nuan Itala nelamat?”
31 Uubm siga lama na,
“Pisiaa di Yesus,
sia na Guruadn.
Inubu' Itala nelamat diha ma' nentaadn na lama di soig bali nu.”
32 Inubu' siga lama na ipompot birta tidi Guruadn di nya ma' nentaadn na lama di soig bali na.
33 Robi ina kutua' pegipat giil na igiit siga lama na nggien imasa' damat siga lama na,
bu' deirdn na sia ma' nentaadn na lama di soig bali na pionsu'.
34 Pegpunga ina,
sia igiit siga lama na iginohodn di bali na.
Sia ma' nentaadn na lama di soig bali dia senang guakng pasal siga lama na ndedi lama pisiaa di Itala.
35 Sikng suub rigiodu lama pegogot uhubm na ipiit pulis igisuru' kutua' pegipat giil na mpelepas i Paulus ma' Silas.
36 Uubm kutua' pegipat giil na di i Paulus,
“Undaa' nyu ga muli' pasal lama pegogot uhubm na nggisuru' na mpelepas dihu.”
37 Tei' uubm i Paulus di pulis na,
“Lama pegogot uhubm na nda' na nguhubm dihi,
tei' turus siga lama na igisuru' ingelapas dihi di tingguangan barabm lama ma' mpusuak ga dihi di soig giil.
Nda' na kaap mbuat oo' nga rua pasal ihi pudn rayat Rum.
Na haa' na siga lama na nggisuru' dihi muhad supaya ga lama leidn nda' kempandi.
Ndihi ngahudn bakng leidn ga siga lama na deirdn nda matakng ngua' mpelepas dihi.”
38 Pulis na ingua' imoro' di lama pegogot uhubm na onu ga sinisuad i Paulus ma' Silas di siga lama na.
Pegdoor lama pegogot uhubm na si Paulus ma' Silas rayat Rum,
siga lama na niggolok.
39 Inubu' siga lama na miatakng dia ma' ikibori ampudn sembela' igiit i Paulus ma' Silas limuas,
bu' igisuru' siga lama na miuhad tidia.
40 Inubu' si Paulus ma' Silas ipanu tidi giil na kindi bali i Lidia.
Pegtomu siga lama na ma' lama pisiaa dia,
siga lama na ingosog guakng lama dia inubu' deirdn nda ipanu.