Si Paulus Ma' I Barnabas Di Bandar Ikonium
14
1 Onu ga bas ndedi di Antiokia ndedi hai di Ikonium.
Ina na,
pegdatakng i Paulus ma' i Barnabas di bandar Ikonium,
siga lama na simuak di bali simbiangan lama Yuhudi singgurua kubasadn siga lama na ma' ipompot birta tidi Itala sampai mbarabm lama Yuhudi ma' bangsa leidn dia ndedi pisiaa di Yesus.
2 Tei' suhu lama Yuhudi nda' ngahudn pisiaa di Yesus ipitindag bani bangsa leidn supaya ga siga lama na musulaadn lama pisiaa di Yesus.
3 Walaupudn oo' nga si Paulus ma' i Barnabas kahal pa metak meleid dia ma' ketogu' ngira' lama dia kentangan Yesus Guruadn nda ma' pungga' ga' nya migia lulug ma' nelamat lama.
Sia imori siga lama na kuasa nggien mbuat mbisa.
Ina na bukti' Birta Mpia ina baar.
4 Sebagi lama di bandar dia temampu lama Yuhudi ma' sebagi temampu lama piniit Yesus.
5 Inubu' lama Yuhudi inupahat kupala nda ma' bangsa leidn dia supaya ga niksa' ma' muntal i Paulus ma' i Barnabas duma' batu.
6 Tei' siga lama na kimpandi,
inubu' irari kindi bandar Listra ma' Derba di bunua Likenia ma' nentaadn na bobo' bunua dia.
7 Dia na siga lama na ipompot Birta Mpia.
Si Paulus Ma' I Barnabas Di Bandar Listra
8 Di bandar Listra kiara simbatu lama kohod tangga di soig tiadn kai.
Tidi toyuk nda' ngkaap mpanu.
9 Sia gugupug dia ikidoor susuad i Paulus.
Si Paulus ikiliid ma' inondu' nya.
Sia pandi lama kohod na pisiaa ma' maap nuan mpekemaa'.
10 Inubu' si Paulus inoog nya.
Uubm i Paulus,
“Usag na!”
Inubu' sia pitelabu' ma' nigpanu-panu.
11 Pegliid kuberaman lama dia si Paulus ipekemaa' lama kohod na,
siga lama na imeragu' ma' nigsuad di uubm Likenia,
“Jeus ma' Hermas giidn ti bas na iniliu dimua' ninggurua munusia'.”
12 Tadn siga lama na si Barnabas ma' i Paulus giidn nuan simbiaakng.
Si Barnabas bitangan siga lama na Jeus ma' si Paulus bitangan siga lama na Hermas pasal sia na tuhakng susuad.
13 Pegpunga ina,
miatakng na lama pegogot ugama Jeus tidi kuil di ruar bandar dia.
Sia igiit sapi' lahi ma' mbarabm pa suurt budak di pintu' bandar na nggien siga lama na ngundakng nimbali sapi' ma' simbiaakng di i Paulus ma' i Barnabas.
14 Pegrati i Paulus ma' i Barnabas aal ina,
siga lama na munu' lama dia.
Inubu' siga lama na imereit baju' nda ma' limompud di tenga'-tenga' lama dia sembela' nigsuad,
15 “Dei uhu pegbuat oo' nga rua.
Ihi pudn munusia' singgurua dihu kai.
Ihi mingkati' ngua' mpompot Birta Mpia kindi dihu supaya ga beranti uhu simbiaakng di giidn ndara mudal ma' pisiaa uhu di Itala biag seleid-leid na.
Sia na imantur langit ma' nentaadn na biag di soig dunya' nti.
16 Ringa' bu' Itala bas na ipusuru nentaadn na bangsa megkibiagadn miaa' kendahadn nda deirdn nda.
17 Tei' kiara hai bukti' Itala mpia,
sia bas na imori dihu dolok ma' nentaadn na tinaman miaa' musibm.
Sia pesenang guakng nyu ma' mori dihu suhup koon.”
18 Walaupudn si Paulus ma' i Barnabas bas nigsuad oo' nga rua,
tei' siga lama na adak nda' kaap ngerarakng kuberaman lama dia simbiaakng di deirdn nda.
19 Inubu' miatakng na lama Yuhudi tangga di bandar Antiokia ma' Ikonium.
Siga lama na inupahat kuberaman lama dia sampai timabakng deirdn nda imuntal i Paulus ma' batu bu' ingiriaak nya kindi ruar bandar dia.
Tadn na siga lama na pa' sia meti na.
20 Tei' lama pegbiaa' susuad Yesus dia miusag liliput di sodi nya.
Si Paulus miudukng ma' miniaa' siga lama na simuak kindi soig bandar na.
Pebalik Kindi Bandar Antiokia Di Bunua Siria
Sikng suub si Paulus ma' i Barnabas ipanu kindi bandar Derba.
21 Siga lama na ipompot Birta Mpia dia sampai mbarabm lama ndedi pisiaa ma' miaa' susuad Yesus.
Inubu' siga lama na pibelik melik kindi bandar Listra,
Ikonium,
ma' Antiokia di bunua Pisidia
22 nggien ngosog guakng lama pegbiaa' susuad Yesus ma' igisuru' lama dia tetap pisiaa.
Uubm siga lama na,
“Ndihiti pa sumuak suruga',
kiti mistii' ngkerasa barabm kususaadn gulu.”
23 Tiap-tiap bunua kiara lama pisiaa di Yesus,
si Paulus ma' i Barnabas ingelantik suhu kupala dia.
Inubu' siga lama na inguduaa ma' begpuasa adi kupala na.
Bu' deirdn nda kituud Guruadn nuan siga lama na pisiaa nggipat kibiagadn kupala ina.
24 Pegpunga siga lama na ipanu di bunua Pisidia,
siga lama na kindi bunua Pimpilia.
25 Punga na pompot birta tidi Itala di bandar Perga,
siga lama na kindi bandar Atalia.
26 Tidii Atalia siga lama na limiaag pibalik kindi bandar Antiokia.
Dia na lama pisiaa di Yesus bas ikituud Itala igipat siga lama na ma' ipiit siga lama na mpompot Birta Mpia.
Ina na kerai nda baru pa kimpunga.
27 Pegompot siga lama na dia,
siga lama na igisuru' suhu lama pisiaa dia nigpompodn ma' imoro' pungga' ga Itala inulukng deirdn nda di soig pianu nda ma' pungga' Itala imuha' guakng bangsa leidn supaya ga pisiaa.
28 Meleid siga lama na ntetak dia duma' lama pegbiaa' susuad Yesus.