Si Petrus Ipekemaa' Lama Kohod
3
1 Pegodu leidn si Petrus ma' ny Yohanes kindi laman bali migia nggien simbiaakng.
Siga lama na miatakng dia waktu barabm lama nguduaa puhul tiga gibiidn.
2 Kiara simbatu lama kohod tidi soig tiadn hai.
Odu-odu sia etadadn kindi laman bali simbiangan na nggien kibori sudaha tidi lama sumuak di pintu' laman na,
bitangan lama Pintu' Ayad.
Pegdatakng i Petrus ma' ny Yohanes,
na lama kohod inatad na kindia.
3 Pegliid nya i Petrus ma' ny Yohanes ngundakng sumuak,
sia ikibori sudaha tidi siga lama na.
4 Tei' siga lama na inondu' nya.
Inubu' si Petrus igsuad.
Uubm nya,
“Kida' ihi gulu.”
5 Lama kohod na inondu' siga lama na baar-baar.
Tadn na nya sia kaap siidn.
6 Tei' uubm i Petrus,
“Ihi ndara siidn,
tei' mori ihi diha onu ga kiara di dihi.
Ina na,
ga' kuasa Yesus Kiristus tidi bandar Nejarat kemaa' aha na ma' panu ga.”
7 Inubu' si Petrus miogot pii' kuaan lama kohod na sembela' ipusag nya.
Pegogot i Petrus,
turus na kimaa' tangga di-otud kindi bungul nya kimosog.
8 Lama kohod na petelabu' ma' mulei ipanu.
Inubu' sia simuak di laman bali simbiangan na sembela' nya mpanu petelabu' ma' mantug Itala.
9 Suhu lama dia ikiliid nya mpanu ma' mantug Itala.
10 Siga lama na ketondu' nya ma' pandi sia na lama kohod meseirt na mupug kibori sudaha di Pintu' Ayad nggien sumuak di laman bali simbiangan na.
Ina na,
siga lama na kibunggakng baar-baar kiliid onu ga bas ndedi.
Si Petrus Ipompot Birta Tidi Itala
11 Kahal pa lama bas kohod na timunda' i Petrus ma' ny Yohanes,
nentaadn na lama dia kibunggakng baar-baar sembela' igundas ingua' igpompodn kindi i Petrus ma' ny Yohanes di kahi' lima,
bitangan Kahi' Lima Selomo.
12 Pegliid i Petrus,
sia igsuad di siga lama na.
Uubm nya,
“Suhu dihu lama Israil,
dei uhu pikibunggakng lama nti kaap mpanu.
Ma' dei uhu penondu' dihi singgurua nti kuasa mi deirdn mi atau pudn ihi miaa' rua gaya Itala sampai kaap pekemaa' lama nti.
13 Itala nuan ny Abraham,
ny Isak,
ma' ny Yakub,
apu'-otud ti simbiaakng bas na imanggat Yesus lama gigisuruadn nya medadi singgurua deirdn na,
tei' uhu mingin nya pitiaadn ma' ingatad nya kindi lama pemmati.
Tetap na nduhu ngulu nya.
Walaupudn si Pilatus gubnur dia ngundakng mpelepas Yesus,
tei' nduhu ngahudn.
14 Yesus ndara dusa ma' meseirt na miaa' kendahadn Itala,
tei' uhu ngiriat suru' i Pilatus mmati nya ma' mpelepas lama bas imati lama.
15 Uhu na imati lama mori kibiagadn seleid-leid na,
tei' Itala imiag nya malik ma' ihi na saksi'.
16 Pasal ihi pisiaa di Yesus,
sia na pekemaa' lama kohod kutunduadn nyu nti.
Kida' nyu lama nti ndaardn na ladu pasal Yesus bas na ipekemaa' nya.
17 “Na haa' na nubu' ou kimpandi,
asal uhu duma' kupala nyu,
nduhu kerati onu ga binubuat nyu ringa' diti.
18 Ringa' bu' Itala bas na ipiit biidn di nentaadn na nabi.
Poro' nya,
Kiristus nuan nya mpiit ina asal pitiaadn.
Na haa' na ndedi na singgurua bas sinisuad nya.
19 Tiligud uhu na tidi dusa nyu.
Ma' biaa' uhu na susuad Guruadn supaya ga sia ngampudn dusa nyu ma' pesenang guakng nyu.
20 Yesus pinili' nya ndedi Kiristus ma' pitidn kindi dihu malik.
21 Sia nggait di suruga' sampai nentaadn na nuan Itala mpedadi baru singgurua bas sinisuad nabi piniit nya ringa' bu'.
22 Nabi Musa bas na igsuad.
Uubm nya,
‘Itala,
Guruadn ti,
mili' simbatu lama tidi bangsa ti medadi nabi singgurua diaadn.
Nubu' sia mpiit nya kindi dihu.
Uhu mistii' ngkidoor ma' miaa' suad nya.
23 Esi-esi ga nda' miaa' susuad nya sunsubudn tidi lama miaa' Itala ma' dubuadn uhuman mati.’ ”
24 Si Petrus inambukng malik susuad na.
Uubm nya,
“Nentaadn na nabi leidn mulei tidi nabi Samuel ringa' bu' hai bas na nigsuad kentangan onu medadi waktu na haa' na.
25 Kiti bas na inirima genggi piniit Itala di apu'-otud ti.
Sia bas ingigenggi di ny Abraham.
Uubm nya,
‘Tidi simbatu anak apu' nu nentaadn na bangsa di dunya' nti nuan ku merahat.’
26 Itala imili' ma' ipiit Yesus lama gigisuruadn nya ngua' nuud dihu gulu supaya ga nggiit dihu beranti mbuat dusa nggien nya merahat dihu.”