Midua Itala Miatakng
2
1 Waktu Ari Raya' Pentekasta suhu lama pisiaa di Yesus igtimung simbatu bali.
2 Atakng siga lama na gupug dia,
taha-taha ga kiara boros tidi suruga' singgurua tiorub dodos.
Nentaadn na siga lama na di soig bali na ikidoor.
3 Inubu' siga lama na ikiliid singgurua api igeraat dimapa' di kuberaman lama dia.
4 Guakng nentaadn na siga lama na dia kimosog ga' Midua Itala ma' siga lama na mulei nigsuad di uubm leidn pasal Midua Itala ingira' siga lama na.
5 Waktu ina kiara lama Yuhudi tidi nentaadn na bunua mien di bandar Yurusalam.
Siga lama na baar-baar pisiaa di Itala.
6 Pegdoor siga lama na boros ina,
siga lama na igpompodn ma' igumbakng-umbakng pasal singkia na ikidoor lama pegbiaa' Yesus igsuad uubm nda.
7 Siga lama na kibunggakng baar-baar ma' nigsuad,
“Esi gisi lama nti bakng nda' lama tidi bunua Gililia?
8 Pungga' ga' ti nentaadn na kidoor siga lama na susuad uubm ti!
9 Kiti tidi bunua Pertia,
Media,
Elam,
Mesopotamia,
Yudia,
Kapadokia,
Pontus,
Asia,
10 Pirigia,
Pimpilia,
Mesir,
ma' Libia mingad bandar Kirena.
11 Kiara lama Yuhudi ma' bangsa leidn simuak ugama Yuhudi miatakng tidi bandar Rum.
Kiara hai lama tidi puru' Kiriit ma' bunua Arab.
Kiti kidoor siga lama na igsusuad kentangan kerai Itala di uubm ti.”
12 Suhu lama ikidoor kibunggakng ma' eyradn.
Ina na,
sebagi siga lama na nigsuad deirdn nda,
“Pungga' buat siga lama nti taha na kimpandi uubm ti?”
13 Tei' kiara lama dia igesab lama pegbiaa' Yesus.
Moro' siga lama na inelu.
Si Petrus Ingira' Lama Di Bandar Yurusalam
14 Inubu' si Petrus ma' lama piniit Yesus pulu' esa' tuni na miusag.
Sia nigsusuad ngkosog ma' mulei ngira' suhu lama nigtimung dia.
Uubm nya,
“Suhu dihu lama Yuhudi ma' suhu dihu metak di Yurusalam,
pikidoor uhu na susuad ku.
Mperati ou dihu onu ga bas ndedi.
15 Tadn nyu siga lama nti inelu,
tei' nda'.
Ndara lama nginum nda' pa libuat odu sikng na haa' na.
16 Ringa' bu' nabi Youl bas igsuad di soig Kitab kentangan onu ndedi na haa' na:
17 ‘Uubm Itala,
“Mingad na dunya' kiamat,
mpiit ou Midua hu nggien ngosog guakng lama tidi suhu bangsa pisiaa di diaadn di dunya' nti.
Waktu ina siga anak nyu,
libudn lahi na,
moro' lama piit biidn ku,
kilihiadn mulak kiara pingidadn tidi diaadn ma' kilihiadn ntua' ngginipi kentangan diaadn.
18 Ma' waktu ina mpiit ou Midua hu ngosog guakng lama gigisuradn ku,
libudn lahi na.
Nubu' siga lama na moro' lama leidn piit biidn ku.
19 Mbuat ou tanda' mbisa singgurua raa',
api,
ma' goudn di langit ma' dunya'.
20 Nda' pa Guruadn pebalik malik kindi dunya' nti,
mata odu tumuang ma' buaidn semega' singgurua raa'.
Odu palikng mpia waktu nya pebalik malik kindi dunya' ngua' nguhubm munusia'.
21 Nda' pa odu ina Guruadn nelamat osi-osi ga ngkiselamat nya.”
’ ”
22 Si Petrus inambukng susuad na.
Uubm nya,
“Suhu dihu lama Israil,
pikidoor uhu susuad ku nti.
Yesus tidi bandar Nejarat ma' piniit Itala.
Uhu pudn pandi sia biniriadn Itala kuasa nggien mbuat mbisa ma' tanda' di tenga'-tenga' nyu.
23 Tidii bu' kai Itala kiara padu nelamat munusia' walaupudn sia pandi Yesus nuan nguduraha' ma' etadadn di dihu.
Uhu na imati nya,
igisuru' lama ndoot inalib nya.
24 Tei' Itala imiag nya malik ma' ipelepas nya pasal Yesus nda' maap minjara' di soig lobokng.
25 Ringa' bu' raja Daud bas na nuart susuad Yesus nti:
‘Ou pandi Guruadn meseirt na ngibal ma' nulukng diaadn.
Ndou molok pasal sia di sodi ku.
26 Ina na,
senang guakng ku.
Ou meseirt na mantug nya.
Ndou molok mati.
Ngarap ou di Itala.
27 Pegpati hu,
ndaha mpibiar diaadn metak meleid di soig lobokng ma' ndaha ngahudn banggi ku kumutakng pasal ou pegbiaa' diha ma' ndara dusa.
28 Bas nu na moro' diaadn ou biag malik seleid-leid na.
Senang guakng ku pasal aha ngibal diaadn.’ ”
29 Si Petrus inambukng malik susuad na.
Uubm nya di lama Israil dia,
“Suhu dihu singgurua pusud ku,
moro' ou di dihu kentangan raja Daud,
apu'-otud ti.
Sia meti na.
Lobokng nya kahal kati' bandar nti.
30 Waktu nya kahal biag,
sia nabi ma' pisiaa genggi Itala di nya.
Itala bas ngigenggi mpusag simbatu tidi anak apu' raja Daud medadi raja singgurua n Daud.
31 Raja Daud pandi onu nuan Itala mbubuat di odu kimidiadn.
Ina na,
ringa' bu' sia imoro' Kiristus biag malik waktu nya nigsuad,
“ ‘Asal Itala nda' netak nya meleid di soig lobokng ma' nda' ngahudn banggi nya kumutakng.’ ”
32 Uubm i Petrus,
“Nentaadn na ihi saksi' Yesus biag melik ga' Itala.
33 Sia inanggat Itala di sembela' kuaan na ma' biniriadn Itala Midua nggien mori dihi sikng bas ginenggi Ama' na.
Sia imori api Midua Itala inidadn nyu maa' ga ihi nsusuad uubm nyu.
Ina na dengoordn nyu kina.
34 Raja Daud leidn ga inanggat Itala kindi suruga' singgurua Yesus,
tei' ringa' bu' raja Daud bas na inuart di soig Kitab kentangan Yesus Guruadn nya.
Uubm nya,
‘Itala,
sia na Guruadn.
Sia igsuad di Guruadn ku,
“Upug na di sembela' kuaan ku nggien nu mirinta duma' diaadn
35 sampai ou mogos lama medetadn diha miaa' pirinta nu.”
’ ”
36 Si Petrus inambukng malik susuad na.
Uubm nya,
“Suhu dihu lama Israil mistii' kerati nti:
Yesus sialib nyu nuan Itala manggat medadi Guruadn ma' Kiristus pinili' nya.”
37 Pegdoor lama dia suad i Petrus,
siga lama na susa guakng.
Inubu' ikimuat nya ma' siga ibal na.
Uubm siga lama na,
“Pungga' buat mi pasi?”
38 Uubm i Petrus,
“Uhu nentaadn na mistii' timiligud tidi dusa nyu ma' punsuudn supaya lama pandi dihu pisiaa di Yesus Kiristus ma' supaya ga dusa nyu nuan ngampudn.
Nubu' uhu biriadn Itala Midua na.
39 Ina genggi Itala di dihu sampai anak apu' nyu ma' suhu lama modu' pa pinili' Guruadn ti.”
40 Barabm pa inanu i Petrus ingira' di siga lama na.
Uubm nya,
“Pengahudn uhu na Itala nelamat dihu tidi uhuman nya waktu nya ngedabu' uhubm di lama ndoot.”
41 Kuberaman lama dia pisiaa suad i Petrus.
Kira-kira tolu ribu tuni pisiaa di Yesus ma' pionsu' odu ina.
42 Inubu' siga lama na beganad baar-baar di lama piniit Yesus.
Nentaadn na siga lama na simbatu guakng nggimung mohodn ruti nggien nggintabm kipitiaadn Yesus ma' nguduaa.
Suntuadn Tidi Lama Pisiaa
43 Nentaadn na lama kibunggakng kiliid lama piniit Yesus meseirt na mbuat mbisa ma' tanda' tidi kuasa Itala.
44 Suhu lama pisiaa di Yesus nigtimung dia ma' nentaadn na medoot siga lama na ndedi pegimungan nda.
45 Kiara hai lama dia ipeboli tana' atau medoot nda nggien mbagi ma' lama pisiaa perlu' siidn.
46 Odu-odu siga lama na nigpompodn di laman bali migia nggien simbiaakng ma' ntimung ngginohodn di bali nda.
Siga lama na baar-baar senang guakng ma' mulumak ati
47 sembela' mantug Itala.
Nentaadn na lama Yurusalam kemengaan siga lama na.
Odu-odu Yesus,
sia na Guruadn,
ngonop tuni lama nuan nya nelamat.