Si Petrus Ma' Ny Yohanes Iniit Kindi Mekama Ugama
4
1 Kahal pa si Petrus ma' ny Yohanes nigsuad ma' barabm lama di laman bali migia nggien simbiaakng,
miatakng na lama tidi bigiadn Suduki (siga lama na nda' pisiaa lama mati biag malik),
ma' lama pegogot ugama,
ma' kutua' pulis di bali simbiangan na.
2 Siga lama na ndoot ati pasal si Petrus ma' ny Yohanes ngira' lama kentangan Yesus biag melik.
Poro' siga lama na,
Yesus bukti' lama mati biag malik.
3 Ina na,
si Petrus ma' ny Yohanes diahap ma' tinaadn di soig giil sampai sikng suub pasal waktu ina bunua seronsobm na ma' nda' kaap nguhubm robi.
4 Tei' barabm lama di laman bali simbiangan na ikidongor ma' pisiaa birta kentangan Yesus.
Lama pisiaa di Yesus kimonop sampai lima ribu tuni nda' kiroodn libudn ma' peranak.
5 Sikng suub suhu lama di mekama ugama Yuhudi igtimung di bandar Yurusalam nggien ngedabu' uhuman di i Petrus ma' ny Yohanes.
Ina na suhu kupala lama Yuhudi,
kutua' lama Yuhudi,
sigu ugama,
6 ma' kupala migia pegogot ugama ngaardn nya si Anas.
Si Kayapas,
si Yohanes,
si Iskandar,
duma' lama leidn tidi waris ny Anas pudn kiara.
7 Si Petrus ma' ny Yohanes piusag di tingguangan nentaadn na lama dia.
Inubu' kinimuat siga lama na,
“Pungga' ga' nyu pekemaa' lama kohod noo?
Esi mori dihu kuasa nggien nigbuat oo' nga rua?”
8 Si Petrus kimosog ga' Midua Itala ma' miabat.
Uubm nya,
“Suhu dihu kupala ma' kutua' bangsa ti,
9 inguhubm uhu dihi odu nti pasal ihi mingisiadn lama kohod nti ma' bas ipekemaa' nya.
10 Ihi mingin dihu ma' nentaadn na lama Israil kempandi lama nti miusag di tingguangan nyu kimaa' ga' kuasa Yesus Kiristus tidi bandar Nejarat.
Sia na sialib nyu,
tei' Itala imiag nya malik.
11 Kiara suad di soig Kitab kentangan Yesus:
‘Sia palikng ayad singgurua batu taadn nggien mbuat bali,
tei' uhu nda' nirima nya singgurua lama mbuat bali ingondi' batu ayad pasal tadn na siga lama na ndara guna.’ ”
12 Si Petrus inambukng susuad na.
Uubm nya,
“Uhu singgurua lama mbuat bali na.
Yesus deirdn na ngkaap nelamat munusia'.
Ndara lama leidn bineri Itala di dunya' nti ngkaap nelamat dihiti.”
13 Lama di mekama na kibunggakng ikidoor i Petrus ma' ny Yohanes iketogu' nigsuad.
Uhubm dia pandi i Petrus ma' ny Yohanes ndara iskul.
Inubu' siga lama na ikintabm na dua-dua na bas pangan Yesus.
14 Tei' siga lama na ndara abat pasal ikiliid lama bas kohod na gusag di sodi i Petrus ma' ny Yohanes.
15 Inubu' lama di mekama na igisuru' siga lama na limuas.
Pegluas siga lama na,
lama di mekama dia nigsupahat deirdn nda.
16 Uubm siga lama na,
“Pungga' buat ti na haa' na?
Nyata' na kuasa mbisa binuat siga lama na sampai nentaadn na lama mien di bandar Yurusalam pandi.
Ndihiti ngkaap milia.
17 Kiti mistii' ngerarakng siga lama na moro' lama kentangan Yesus supaya ga lama leidn nda' na kidoor malik birta nti.”
18 Inubu' siga lama na igisuru' i Petrus ma' ny Yohanes simuak melik ma' ingerarakng siga lama na moro' atau pudn ngira' lama kentangan Yesus malik.
19 Tei' si Petrus ma' ny Yohanes miabat.
Uubm siga lama na,
“Pegpihir uhu deirdn nyu nti' na ayad,
miaa' pirinta nyu atau pudn miaa' pirinta Itala.
20 Ihi mistii' moro' di lama kentangan kerai ma' susuad Yesus.”
21 Lama di mekama na baar-baar ingerarakng.
Inubu' ipelepas i Petrus ma' ny Yohanes.
Siga lama na nda' pandi pungga' buat ga' ngedabu' uhuman di i Petrus ma' ny Yohanes pasal nda' ketomu keselaadn siga lama na.
Lagi pudn siga lama na kiliid nentaadn na lama dia imantug Itala
22 pasal lama kohod na kimaa' na ga' kuasa mbisa ma' umur nya lobi na epaat pulu' toudn.
Suhu Lama Pisiaa Inguduaa
23 Peglepas i Petrus ma' ny Yohanes,
siga lama na minili' kindi suhu lama pisiaa di Yesus.
Siga lama na imoro' onu ga sinisuad suhu kupala pegogot ugama ma' kutua' lama Yuhudi.
24 Pegdoor siga lama na susuad na,
siga lama na simbatu guakng inguduaa di Itala.
Uubm siga lama na,
“Guruadn,
aha na imantur langit,
dunya',
loud,
ma' nentaadn na biag di dunya' nti.
25 Ringa' bu' raja Daud,
apu'-otud mi,
sia gigisuruadn nu ma' siuru' Midua nu nigsuad:
‘Kiara barabm bangsa leidn ndoot ati di Itala.
Siga lama na ma' lama Yuhudi bas na nigsupahat lemoon Itala walaupudn ina ndara guna.
26 Mbarabm raja di dunya' bas na sidia' megperakng.
Ma' kupala bunua pudn nigpompodn duma' raja na nggien lemoon Itala,
sia na Guruadn,
ma' Kiristus pinili' Itala.’ ”
27 Siga lama na inambukng duaa nda malik.
“Guruadn,
asal berhai onu ga bas pioro' Midua nu di raja Daud,
pasal raja Herodes,
datu' Pontius Pilatus,
lama Yuhudi,
ma' bangsa leidn bas na nigpompodn nggien nigsupahat di bandar nti.
Guruadn,
siga lama na limoon Yesus lama gigisuruadn nu.
Sia ndara dusa ma' pinili' nu.
28 Ina na,
siga lama na bas na nigbuat onu ga bas tiotog nu.
Ndedi ga' kuasa nu ringa' bu'.
29 Tulungi ihi na pasal siga lama na ngansabm ngeladu dihi.
Nua' na ngosog guakng mi supaya ihi ketogu' mpompot birta tidi diha pasal ihi gigisuradn nu.
30 Pitiliha' na kuasa nu ma' nua' na pibiaa' di dihi nggien mi pekemaa' lama ma' mbuat mbisa miaa' di Yesus.
Sia gigisuruadn nu ma' ndara dusa.”
31 Pegpunga inguduaa,
igisik na bali nggien siga lama na nigpompodn.
Siga lama na nentaadn na kimosog ga' Midua Itala ma' ketogu' mpompot birta tidi Itala.
Lama Pisiaa Mbagi Arta' Nda
32 Nentaadn na lama pisiaa di Yesus simbatu guakng ma' simbatu pihiardn.
Ndara simbatu pudn mpihir arta' nya sia sengompu',
tei' tiap-tiap lama pedadi arta' nda pegimungan ma' siga ibal na.
33 Lama piniit Yesus kosog mukti' Yesus Guruadn nda biag melik.
Ma' Itala baar-baar mori berahat di nentaadn na lama pisiaa.
34 Ndara ma' simbatu pudn lama dia oluk.
Kali-kali lama kiara tana' atau pudn bali mpeboli ma' mori siidn na
35 di lama piniit Yesus.
Siga lama na pasi magi siidn na di esi-esi ga perlu'.