2 Kinmili:

―Katka pa se Wepweblo se hwes amo kimawishtiliyaya Dyos,

niyok amo'ak kimawishtiliyaya.

3 Pa in Wepweblo katka niyok se siwat mihki nitaka,

yewal yawiya ka in hwes wan kitahtaniyaya shinishpale pa niktanilis ika yewal nishkokoli.

4 Opan sek tonatim wan in hwes amo ki'ihit,

ma yok tamat:

“Hanwel amo nihmawishtili Dyos niyok amo'ak nihmawishtili,

5 in siwat mihki nitaka amo nishmakawaltis,

nikpalewis pa yahmo walatiyas kampa nisiyawiltitik.”

6 Kwakin kito in TATS:

―Shihkakik kina kito in hwes amokwal.

7 Ma yok hanwel aso Dyos amo kinpalewis niyok yehwante nita'onanilme,

kampa kitahtoltil yewal pa tahka wan pa tayo?

Wehkawas pa kinankilis?

8 Annimichilis kampa ankinpalewis haniman.

Ma yok kimani NitakaTakpakIlwikak walas,

kitas taneltokaliste pa in tal?

9 Yehshwa kipowaya in okse tapowaliste,

pa sek yewal iselte moneltokaloya kina kwahkwalme wan kinihyaloya in oksek.

Kito:

10 ―Omente takam oyak tyopWe kitahtoltiloya Dyos:

yewal se katka parisheyo,

wan in okse katka tapishkalisteTomi.

11 In parisheyo,

moketstikatka,

yok kitahtoltiyaya:

“Ooh Dyos,

nimishmak tashtawiliste kampa newal amoyok nimomat kina in oksek,

yewal katka ta'ishtikiyanilme,

takokolilme wan kinkwamanal ininsiwam ka oksek siwam;

niyok amoyok kina in nitapishkalisteTomi.

12 Nimosa ohpa pa in chikome tonatim,

wan nitemak matahti pa sesen tahko pa mochi kishki niktani.”

13 Ma yok in nitapishkalisteTomi pa wEhka amo mochikawaya ki'ahkokiskya nishtololwam pa takpakIlwikak,

hanwel kitehtewiyaya nipecho wan kitowaya:

“Ooh Dyos ka newal,

shikpi ta'ihniliste ka newal,

kampa newal nita'ihtakoliste!”

14 Newal annimichilis kampa in omokwep icha ka ta'ihniliste,

wan in okse ayak kampa mochi sesen in we tamatilme ka in oksek yes amo wetanotsal in yewal aki mopinawilti isel yes wetanotsal.

15 In masewalme kiwikililoya piltontim Yehshwa,

kampa yewal kintaliliskya nimahwam;

kimani nimonestililme okitak in,

kinahwaloya.

16 Ma yok Yehshwa okinnots wan kinmili:

―Shikinmakawak in piltontim ma walak ka newal,

amo shikintsakwilik;

kampa nireynaroliste in takpakIlwikak in yewal yok nesil kina yehwante.

17 Melak annimichilis,

aki amo kinamikis nireynarolisteDyos kina se piltonte,

amo kalakis pa yewal.

18 Se takat wemonotsaya kitahtanili Yehshwa:

―Tamashtini kwal,

ten monek pa nikchiwas pa yok nikpiyas noyoliliste yewal amoTamis?

19 Yehshwa kili:

―Pates tinichili kampa newal nikwal?

Amo'ak se yok onka kwal,

han Dyos.

20 Tikinmat kina mo'ito pa nitahtolmeDyos:

“Amo shikonan se siwat tasiyawatil;

amo shitamikti;

amo shita'ishtikti;

amo shitaketsti ten amo tikit;

shiktasot motats wan monantsi.”

21 In takat kito:

―Mochi in nihneltokatiwal pa kimani nikatka nipiltonte.

22 Kwah okikak in,

Yehshwa kili:

―Hanwel mishteshmonek se tachiwal:

shiknamak mochiten tikpi wan shikinmak in amoten kipiyal,

yok tikpiyas tashtawiliste pa in takpakIlwikak;

kwah pano in shiwal wan shinishtok.

23 Kimani yewal takat kikak in,

moka moyokoltiti,

kampa tapiyaya miyak pa mochiten wan miyak tomi.

24 Wan kimani okit Yehshwa kampa moyokoltitikatkaya miyak,

kito:

―Kina hyero amokwal se takat yewal kipi miyak tomi yewal kalakis ka nireynarolisteDyos!

25 Kwal panos se kameyo pa se nishtolol tatsomal,

kampa se yewal kipi miyak tomi pa kalakiskya ka nireynarolisteDyos.

26 In yewal kikakik in kitoloya:

―Kwakin,

ak wel mokishtilis niyoliliste?

27 Wan Yehshwa kinankili:

―Mochiten amokwal pa takam,

ma yok kwal kichiwas mochiten Dyos.

28 Kwakin Petros kito:

―Tehwante tihkawak mochiten titapiyal,

wan timishtokak.

29 Wan Yehshwa kinmili:

―Melawak annimichilis,

akyewal okinka nikal,

nitahwan,

ninohniwan,

nisiwa,

ininpilwam,

ka nireynarolisteDyos,

30 kitenamikis miyak pa in tonatim wan pa in tonatim yewal walal;

kipiyas yoliliste yewal amoTamis.

31 Yehshwa okinnots oksela in 12,

wan kinmili:

―Ashka ma yatiyak pa in ot Yerushalém,

ompa motachiwas mochi yewal in Taketsalme nitahtolmeDyos kikwihkwilok ika in NitakaTakpakIlwikak.

32 Ina yes tatemakal ka in amo yudiyo',

yehwante kiwetskiliske yewal,

in hyero kichiwiliske wan kichihchaske.

33 Kwah tamiske kiwetekiske,

kimiktiske;

pa kwah panoske yey tonatim yolis oksep.

34 Yehwante amo kimatik kikakik amoten in,

kampa in tanawatiliste amokwal kimatiloya kikakiloya.

35 Kimani Yehshwa katka pa asiskya pa Yerikó,

pa in ot yowatikatka se yewal tahtaniyaya tomi amo tachiyaya.

36 Kwah kinkakiyaya in amo tachiyaya kampa panoloya masewalme,

otahtan ten panotikatkaya.

37 Wan kimani kililoya kampa Yehshwa nasareteko panowaya ompa.

38 Okipewalti tsatsiliste:

―Yehshwa,

Nikon Dawid,

shinishihnil newal!

39 Yehwante yaloya ta'ishpa ki'ahwaloya pa amo nawatitiyaskya,

ma yok yewal wehwe tsatsiyaya:

―Nikon Dawid,

shinishihnil newal!

40 Kwakin Yehshwa omokets wan otatake pa kiwikililoskya ka yewal.

Kimani in amo tachi o'as,

Yehshwa kitahtanili:

41 ―Ten tihnek pa nikchiwas pa tewal?

Wan in amo tachiyaya kinankili:

―TATS,

nihnek pa nikpiyas tachiyaliste.

42 Yehshwa kili:

―Ashka tihnamiktik!

Motaneltokaliste mishpahti.

43 Haniman in amo tachiyaya opahti nishtololwam,

wan hani okitok Yehshwa,

kilitiyaya wehwe tahtolme Dyos.

Wan kimani kitaloya moshte in masewalme in ten panowaya,

niyok kililoya tahtolme wehwe pa Dyos.