―Kampa omoneshtil mochi in taneshtiliste?

Ten tamatiliste yewal kipi,

wan kinchi taneshtiliste ka chikawaliste ka nimahwam?

3 Amo in se karpintero,

nikon Marya wan ninohniwan Yakobo,

Yosé,

Yudas wan Shimón,

amo niyok inik mochantil ninohniwanSiwam pa in pweblo.

Wan amo kinekik kikakik.

4 Wan Yehshwa kinmili:

―Se niTaketsal nitahtolDyos kimawishtilil masewalme,

ma yok amo kimawishtilil yehwante pa nital,

wan ika niparyente wan ninohniwan pa icha.

5 Wan ompa amo okichi se taneshtiliste,

hanwel okintalil nimahwam pa sek kokoshkim wan okinpahti.

6 Wan motapololtiya Yehshwa ompa yehwante amo kinekik kineltokak.

Yawiya pa ranchito' amo wEhka,

kinmashtiyaya.

7 Kwakin okinnots in 12 nimoneshtililme,

wan ompa okintake pa yaloskya ka ohome,

okinmak chikawaliste pa kinkishtililoskya yehyekatim tawalilom.

8 Wan kinmili amo shihwikak amoten pa ot,

hanwel se bordon.

Amo shihwikak wangoch,

nipan,

nitomi.

9 Niyok kinmili shiktalik anmowarachim wan amo shihkwikak ome shashalme.

10 Kinmili:

―Kimani asiske pa se kal,

ompa shimokawak pa mochi tonatim pa kimani kisaske.

11 Ta yehwante pa in pweblo amo anmishnamikil wan amo kinekil anmishkakiske,

kwakin haniman shikisak ompa shimotsehtselok nipohtiTal pa mo'ikshiwam,

yok kimatiske kina kichiwilitikat Dyos ten amokwal.

Annimichili melak,

pa in tonat Dyos kintakokoltis amoyok miyak panoske takokoliste yehwante pa in Wepweblo,

Sodoma wan in Wepweblo Gomora.

12 Yok kisak in 12 nimoneshtililme,

pa kintakichilil nitanawatilisteDyos pa kikwepaloskya ininyolme.

13 Niyok kinkishtililoya yehwante myak niyehyekatim tawalilom,

niyok myak kokoshkim kinshawililoya aseyte wan kinpahtiloya.

14 In weRey itok Herodes Antipas kimat,

ten kichiwaya Yehshwa.

Kampa ni'itokaliste moshte kitaketsaloya kina katka yewal sek kililoya:

―Yehshwa katka Yuhanes yewal takwateki oksep walyoliya,

kampa yok kipi chikawaliste yewal kichiwaya myak taneshtiliste.

15 Oksek kililoya:

―Yewal EliYah.

Wan oksek kililoya:

―Yewal se ka niTaketsal nitahtolDyos yewal yoliwiya ya wehkA.

16 Kwah okikak Herodes,

kito:

―In yewal Yuhanes,

yewal newal onitatake pa kikotonililoskya nikich,

kampa yewal oyol oksep.

17 Yuhanes oki'ahwa Herodes,

kampa okonan Herodyas yewal ye nisiwa Pilipos wan Pilipos,

ye ninohni Herodes,

kwakin Herodes otatake pa kikitskiloskya Yuhanes,

pa kitsakwaloskya wan pa ki'ilpiloskya ka kadena'.

18 Kampa Yuhanes kiliyaya Herodes:

―Ma yok amokwal pa tikonanas nisiwa monohni.

19 Ma yok Herodyas,

okwalan ka Yuhanes kinekiya kimiktiskya,

ma yok amokwal kina kimiktiskya;

20 kampa Herodes kimawishtiliyaya Yuhanes kimatiya kampa katka se takat kwal kipiyaya niyol chipawak,

yewal mochantiyaya kina Dyos nitamashtiliste.

Kimani kikakiyaya Herodes,

kina taketsaya Yuhanes amo kimatiya ten kichiwaskya ma yok kikakiyaya kwal kampa niyok kipalewiyaya.

21 Kwakin o'as in tonat kimani Herodyas,

okit kina kimiktiskya Yuhanes in tonat kampa omonamik kwah otakat Herodes,

okinnots pa takwaloskya yehwante wehwe monotsalme wan wehwetatakewalme wan niwehwe gwacho' pa in Galileya.

22 Takwatikatkaloya okalak nikonSiwat Herodyas wan ompa omitot,

yok okinmak pakiliste Herodes wan yehwante ompa katkaloya.

Kwakin in weRey Herodes kili in siwat:

―Shinishtahtan ten tihnekis,

wan newal nimishmakas.

23 Wan kili tahtol melawak newal nimishmakas ten tinishtahtanis,

ta tinishtahtan notahko ka noreynaroliste.

24 Okis in siwatYankwik,

kili ninantsi:

―Ten kwal niktahtani?

Wan ninantsi kinankili:

―Shiktahtan nitsontek Yuhanes yewal takwateki.

25 Haniman ka isewiliste in siwatYankwik okalak kaha katka weRey Herodes,

wan kili:

―Nihnek pa tinishmakas ashkit nitsontek Yuhanes yewal takwateki pa se tapalkat.

26 Kwakin kikok niyol in weRey;

yok kina kili in siwat ka nitahtol amo kinek kikwep yewal ten kili pa i'ishpa yehwante wehwe tatakewaloya.

27 Yok okitake in weRey se nigwacho,

kili shinishwalikil itsontek Yuhanes.

28 In gwacho oy kaha katka tatsakwal Yuhanes,

kikotonil nitsontek wan okiwik pa se tapalkat.

Okimak in siwatYankwik,

wan yewal okiwikil ninantsi.

29 Kimani nimoneshtililme Yuhanes kimatik in,

oyak konanak ikwerpo pa kitapacholoskya.

30 Inik 12 tatitanilme monichikok ka Yehshwa wan kitakichilik mochiten okichiwak,

wan in ten kinmashtik.

31 Kwakin Yehshwa kinmili:

―Ma tiyak pa oksela kaha amo'ak onka,

ompa timosewiske tipit.

Kinmili kampa yaloya wan walaloya myak masewalme,

kampa amokwal kina takwaloskya.

32 Yok oyak pa se barkit kampa amo'ak katka.

33 Ma yok myak kinmitak kimani oyak yehwante,

wan ki'ishmatik,

kwakin kisak pa mochi inik Wehwepweblo',

haniman motalotiyak,

asik kwah ayamo'ok asiyaya.

34 Kwah Yehshwa okis pa in barkit,

okinmit myak masewalme wan kinihnil,

kampa katkaloya kina borrego' yewal amo'ak kinkwitawiyaya;

haniman miyak okinmashti.

35 Kwah tamalinti tonat,

walak nimoneshtililme ka yewal wan kilik:

―Hyero ya tyotak,

kampa nika amoten onka.

36 Shikintake ma yayak pa tashosholtik wan inik ranchito' pa mokowiliske ten kikwaske.

37 Yewal kinnankili:

―Anmehwante shikintamakak.

Kitahtatanilik:

―Tikpiyaloskya pa titikipanoloskya pa myak mestim pa yok tikpiyaloskya myak tomi pa titakowaloskya takwal pa moshte masewalme?

38 Yehshwa kintahtanili:

―Kishki pan ankipiyal?

Shiyak shikitak.

Kwah kimatik kishki,

kwakin kilik:

―Makwil pane' wan ome michim.

39 Kwakin kinmili in masewalme pa mosewiloskya wan monechikoloskya ka tihtipitot ka se wan oksek ompa pa in sakat shosholtik;

40 yok monichikok yehwante wan motalik ka myak tanichikolme sek ka 100 oksek ka 50 takam.

41 Wan Yehshwa okonan in makwil pane' wan in ome michim,

otachi pa ilwikak,

kimashtiyaya haniman kitahtapan tatahtahko,

wan okinmak nimoneshtililme pa kinmakaloskya masewalme.

Wan niyok kinmak tahtahko in ome michim ka moshte.

42 Yok moshte takwak wan pachiwik;

43 kinichikok mochi inik tahtahko ka michim kishki amo kikwak,

kintemiltik 12 chikiwim.

44 Katkaloya 5,000 takam yehwante kikwak pane'.

45 Haniman Yehshwa kinmili nimoneshtililme pa tehkoloskya pa in barkit niyok kinmil kampa panoloskya pa BetSayda yewal katka analko in we'atTemtik,

wan yewal omoka kinmiliti in masewalme ma yayaptiyak pa ninicha.

46 Kwah otam okintitan moshte,

oy Yehshwa pa in tepetLom ompa Dyos kitahtaniyaya.

47 Kwah tapohpoyaptiyaya,

wan katka in barkit ipanta in we'atTemtik,

wan mokawaya Yehshwa isel pa tal.

48 Wan kinmitaya Yehshwa nimoneshtililme kampa hyero siyaptikatkaloya kitaneloltitikatkaloya in barkit,

kampa kinnamikiyaya in yehyekat chikawak,

tahtanesti Yehshwa owal ka yehwante nehnemiyaya ipa we'atTemtik,

mochi kina kinpanawiskya.

49 Kwah kitak yewal nehnemiyaya pa in we'atTemtik,

tamatiloya kampa katka se tamaptiliste wan kipewaltik tsatsiliste;

50 kampa moshte kitatikatkaloya wan momaptitikatkaloya.

Ma yok kinnots Yehshwa kinmili:

―Shikchikawaltik anmoyol;

amo shimomaptik newal ninewal!

51 Tehko pa in barkit ka yehwante,

in yehyekat moyolse;

wan nimoneshtililme mokawak tachishtikat.

52 Kampa yehwante amo kimatiloya takakiloya wan ayamo'ok kimatiloya kikakiloya kina opan,

ompa kaha kinmakaya tahtahko in pan.

53 Kwah panok in we'atTemtik asik pa in tal itok Genesaret,

wan kilpik in barkit pa itenko in we'atTemtik.

54 Kwah kisak pa in barkit,

wan haniman in masewalme ki'ishmatik Yehshwa.

55 Yok nehnemtinem pa moshte yehwante ompa mochantiloya,

kinwalikilik in kokoshkim pa tapeshtim,

kimatik kaha katka Yehshwa.

56 Kaha han kalakiyaya yewal,

pa ranchito',

pa Wehwepweblo' pa tashosholtik,

kintaliloya in kokoshkim kaha mosewiloya wan panoloya masewalme kitahtaniloya ka ininyolme Yehshwa pa kinmakawaltiskya pa kikitskiloskya hanwel itenko nishashal;

wan moshte yehwante kishki kikitskiloya,

mokawaloya tapahtilme.