Yehshwa kinkishtiliya myak yehyekatim tawalilom se takat pa in tal Gadara
(Mt. 8:28-34; Lk. 8:26-39)
5
Asik pa analko in we'atTemtik,
pa tal Gerasa.a
2 Kwah okis Yehshwa pa in barkit,
mo'ashilti se takat yewal kipiya yehyekat katsak.
3 Mochantiyaya in takat kaha kintapachol mihmihki wan amo'ak kikitskiyaya,
pa ki'ilpiskya ka kadena'.
4 Pa myak tonatim ki'ilpiloya ka se yawaltik patawak kina kadena' pa nikshiwam wan niyok nimahwam,
ma yok yewal kikohkotonaya kadena' wan amo'ak kimansot.
5 In takat nehnemtinem tsatsitinem pa tahka wan pa yowal,
pa tepetLom wan kaha kintapachol mihmihki,
niyok motehtewiyaya ka tetelme.
6 Kwah okit wEhka Yehshwa,
walmotal motankwakets pa i'ishpa yewal,
7 wan tsatsi chikawak kito:
―Ten tikpi ka newal,
Yehshwa,
nikonDyos HyeroTakpak?
Nimichilis pa tinichilis pa i'ishpa Dyos kampa amo tishkokoltis.
8 Kampa Yehshwa yok kili:
―Yehyekat katsak,
shikis pa'itik in takat!
9 Yehshwa kitahtanili:
―Kina ti'itok?
Wan yewal kinankili:
―Ni'itok Legyon,
kampa tikat myak niyehyekatim tawalilom.
10 Kitahtaniyaya miyak ka niyol Yehshwa pa amo kintetaniskya okse tal.
11 Amo wEhka katkaloya myak pitsom pa se tepetLom takwatikatkaloya,
12 wan moshte niyehyekatim tawalilom kitahtaniloya miyak ka niyol Yehshwa:
―Shitishtake pa in pitsom;
shitishmakawilti ma tikalakik pa yehwante.
13 Kwakin Yehshwa okinmak,
kwah kisak in yehyekatim tawalilom pa'itik in takat kalakik pa pitsom.
Katkaloya 2,000 pitsom,
wan tsikwinik pa se teshkal kaha we'atTemtik,
wan ompa kohkonik.
14 Yehwante takwitaptikatkaloya pitsom,
cholok oyak taketsak pa mochi Wepweblo wan pa mochi tashosholtik.
In masewalme okisak pa tachiyaloskya ten opan.
15 Asik kaha Yehshwa,
kitak in takat yewal kipiyaya niyehyekatim tawalilom,
ashka yowatikatka,
wan tatakemiltil katka wan kwal mo'ilnamikiya;
wan moshte momaptik.
16 Wan yehwante aki kitak,
ten okipan in takat yewal kipiyaya niyehyekatim tawalilom,
kintakichilik kina oye wan kina okinpan in pitsom.
17 Kwakin miyak kitahtaniloya Yehshwa pa yaskya pa okse tal.
18 Kimani Yehshwa tehko pa in barkit,
in takat yewal takishtilil niyehyekatim tawalilom kitahtani pa mokawaskya inak yewal.
19 Ma yok Yehshwa amo okikawil,
kili:
―Shi kaha timochanti,
ka moparyente,
wan shikintakichil mochi in ten TATS okichi ka tewal.
20 In takat opanoti,
wan taketstinem mochi pa in MatahtiPweblo'b yewal ten okichi Dyos pa yewal;
wan moshte motapololtiloya.
NikonSiwatPiltonte Ya'iros wan in siwat yewal kikitski nitakemtel Yehshwa
(Mt. 9:18-26; Lk. 8:40-56)
21 Wan Yehshwa omokwep oksep pa barkit pa analko in we'atTemtik,
monichikok kiyawalok myak masewalme,
yok omoka pa itenko in we'atTemtik.
22 Kwakin owal se takat itoka Ya'iros;
yewal wetatakewan pa in tyopYudiyo,
okit Yehshwa,
motankwakets pa nikshiwam
23 kitahtani miyak,
kiliyaya:
―Nokon siwatPiltonte mikti;
Shiwal shiktal momahwam pa yewal,
pa pahti wan pa yolis.
24 Oy inak Ya'iros,
wan kitokatiyaloya Yehshwa myak masewalme,
wan kitiliniloya.
25 Ompa katka se siwat kipewaya se kokoliste,
ka 12 shiwim kisaya yEste.
26 Panotikatka miyak takokoliste kichiwilik myak tapahtinilme,
ki'ihtakowaya nitomi mochi kishki kipiyaya,
han amo'ak okipahti.
27 Kwah kimat kina taketsaloya ka Yehshwa,
o'as takwitap ika masewalme,
wan okikitski pa nishashal.
28 Wan mo'iliyaya pa'itik yewal:
“Ta nihkitskiskya nitakemtel,
kwakin yok nipahtiskya.”
29 Haniman wak niyEste,
kimat pa'itik ikwerpo kampa opahti.
30 Yehshwa haniman okimat kampa pa newal okis chikawaliste;
omomalin okinmit myak masewalme wan kinmili:
―Ak okikitski notakemtel?
31 Nimoneshtililme kilik:
―Tikinmitatik kina in myak masewalme mishtilintikat wan titahtani:
“Ak nishkitski?”
32 Ma yok,
yewal omoka tachishti pa kitaskya ak yok okichiwil.
33 Kwakin in siwat momaptitikatka,
moyoyokatikatka,
kampa kimat ten kipanotikatka pa'itik ikwerpo,
mo'ashilti,
omotankwakets pa ni'ishpa Yehshwa,
wan kili mochiten yewal kipanotikatka.
34 Wan Yehshwa kili:
―NonohniSiwat,
ashka otipahti kampa otiktal motaneltokaliste ka newal.
Shiyapti ashka ka sewiliste,
wan timoka tapahtil.
35 Ayamo'ok tamiyaya tahtowaya Yehshwa,
kwah walak yehwante katkaloya pa nikal wetatakewan pa in tyopYudiyo wan kilik:
―Pates tikilitik in tamashtini;
kampa omik mokonsiwat?
36 Yehshwa,
amo kinkak in yewal ten kitoloya,
wan kili wetatakewan pa in tyopYudiyo:
―Amo shimomapti;
shiktal motaneltokaliste ka newal.
37 Wan amo kinek kinnosti moshte hanwel Petros,
Yakobo wan Yuhanes,
ninohni Yakobo.
38 Asik pa nikal ka wetatakewan pa in tyopYudiyo,
Yehshwa okit kina hyero mochiwaloya,
chokatikatkaloya wan tsatsiloya.
39 Okalak wan kinmili:
―Pates anchokatikat wan antsatsitikat?
Amo mihki in siwatPiltonte,
hanwel koshtik.
40 In masewalme kiwetskililoya yewal.
Otatake pa kisaloskya moshte,
okalak inak nitats wan ninantsi wan yehwante walaloya inak yewal,
kaha katka in siwatPiltonte.
41 Okikitski nimahwa in siwatPiltonte,
wan kili:
―Talita,
kumi ―yewal kinek kito:
SiwatPiltonte,
nimichili,
shimokets.