Ten ki'ihtako se masewal
(Mt. 15:1-20)
7
Wan walak kaha katka Yehshwa in parisheyo',
wan sek Tamashtinilme NitanawatilMoshé walaloya pa Yerushalém.
2 Kitak kina sek nimoneshtililme takwaloya ka ininmahwam kahkatsak,
kinek kito,
amo mopakalme.
3 Inik parisheyo' wan moshte yudiyo' kichiwal,
amo takwal ta ayamo mopakal ininmahwam yok kina kimatiloya kichiwaloya inik ininwichalme.
4 Wan ta han yal takowal wan tanamakal,
kimani walmokwepal pa ininicha,
amo takwal ta ayamo mopakal yok kina kimatiloya kichiwaloya,
wan kat oksek myak taneltokaliste yewal kintemakak ininwichalme,
in yudiyo' kipiyal oksek tachiwaliste,
kinpakal inik baso',
komim wan komim wehwe ka tayokshitil tatsilinilme wan tapeshtim.
5 Kwakin inik parisheyo' wan Tamashtinilme NitanawatilMoshé kitahtanilik Yehshwa:
―Pates amo kichiwal momoneshtililme yok kina kimatiloya kichiwaloya towichalme,
kampa takwal ka ininmahwam kahkatsawak?
6 Yehshwa kinnankili:
―Ome ininshayak kwal kitowaya YeshaYah kimani kimashtiyaya nitahtolDyos inak mehwante:
Inik masewalme tamawishtilil kina kitol ka in kamak,
wan melak ka inyol amo nishmawishtilil.
7 Motankwaketsal hanya han,
kampa tamashtil kina nitahtolme masewalme.
8 Kampa anmehwante ankikawal nitamashtilisteDyos wan amo ankikawal pa ankichiwaske in taneltokaliste yewal kikwihkwilok takam ya wehkA:
kina tapakaliste komim wehwe wan tihtipichim,
wan myak oksek taneltokaliste.
9 Niyok kinmili:
―Kwal anmoneshtilik kina amo kinekil nitamashtilisteDyos kampa yok ankinpiyal anmotaneltokaliste.
10 Amo ankichiptikat kwal kampa Moshé kito:
“Shikintasot motats wan monantsi,”
“Niyok kito ak kihwehwekalti nitats wan ninantsi,
ma mik.”
11 Ma yok anmehwante ankilil kampa ta se takat kili nitats wan ninantsi:
“Amo annimishpalewis ka notomi wan mochi yewal ten yes tasot in Korbán” (Korbán kinek kili,
kampa notemakalisteDyos);
12 kwakin yok,
anmehwante ayamo ankimakal pa ankinpalewis nitats wan ninantsi.
13 Yok ankichiwal,
wan yok anmehwante yahmo kimawishtilil nitahtolmeDyos ka anmotamatiliste in tamatiliste anmishtemakak ya wehkA inik takam,
wan anmehwante ankitemakak anmopilwam in tamatiliste.
Niyok kat myak oksek tamatiliste kina inik ankinchiwal.
14 Oksep Yehshwa okinnots in masewalme,
kinmili:
―Shinishkakik moshte,
wan shihmatik in ten kinek kitos:
15 Amoten yewal ten kikwa se,
yewal ki'ihtako.
Yewal ten kis pa niyol se yewal ki'ihtako.
16 Aki kipi ninakas,
ka takakis,
shitakak kwal.
17 Kimani Yehshwa panoti ka in myak masewalme okalak pa kal,
nimoneshtililme kitahtanilik ten kinek kitos in tapowaliste.
18 Yewal kinmili:
―Niyok amo ankimatil anmehwante ten kinek kitos?
Amo ankimatil kampa mochi yewal kikwa se,
amo ki'ihtako,
19 amo kalaki pa ininyolme,
kalaki pa itik ikwerpo kwakin kis kimani mapits?
―Ten hanwel yewal kis pa niyol se takat,
yewal ki'ihtako.
21 Kampa pa'itik ininyolme inik takam amo kwahkwalme kisal inintamatiliste,
inik amo tasiyawatilmea motekal sek ka oksek,
in ta'ishtikiyanilme,
wan in tamiktilme,
22 inik tasiyawatilme motekal sek ka oksek,
kinektiyaske mochiten,
kichiwal ten amokwal,
takwahkwamanal,
amo kimatil pinawal ka inintachiwaliste amo kwahkwalme,
kinkokolitiyaske,
takwahkwamantiyaske,
mopantilitiyaske,
wan amo mo'ilnamiktiyaske.
23 Mochi inik kisal pa'itik,
ininyolme se ki'ihtako niyol takat.
Nitaneltokaliste in siwat SiroPoynikya
(Mt. 15:21-28)
24 Kwakin okis Yehshwa ompa,
oy pa tal Tiros wan Tsidón.
Ompa okalak pa se kal amo'ak kinek pa kimatiskya;
kampa ompa katka ma yok amokwal kina motatiskya.
25 Ompa katka se siwat kipiyaya se nikonSiwatPiltonte kipiyaya se yehyekat tawalilot;
otakak in siwat kina tapahtiyaya Yehshwa,
wan haniman owal okit,
omotankwakets pa nikshiwam.
26 In siwat otakat pa SiroPoynikya wan tahtowaya gereka.
Kimashtiyaya Yehshwa pa kikishtiliskya niyehyekat tawalilot siwatPiltonte.
27 Yehshwa kili:
―Ta'ishpa ma takwak topilwam pa pachiwiske.
Amokwal tikinkishtiliske in yewal kikwal topilwam pa tikinmakaske pa kikwaske chichim.
28 Wan in siwat kili:
―Haha,
TATS;
ma yok yewal wetsi tahtahko itsinta in kaha takwal topilwam yewal chichim kikwal.
29 Yehshwa kili:
―Hanwel kwal in yewal tikito;
kampa shimowik.
Ashka okikis niyehyekat tawalilot mokon.
30 Kwah o'as in siwat pa nikal,
okit in siwatPiltonte pa nitapeshte,
yahmo kipiyaya niyehyekat tawalilot.
Yehshwa kipahti se yewal amo takakiya wan amo tahtowaya
31 Okis Yehshwa pa in tal Tiros,
wan panoti pa Tsidón itenko in we'atTemtik pa Galileya,
kaha katkaloya MatahtiPweblo'.b
32 Kiwalikilik se takat yewal amo takakiya wan amowel tahtowaya kwal,
wan kilik:
Kitahtaniloya pa kitaliliskya nimahwa pa yewal.
33 Kwakin Yehshwa okiwik,
kaha amo katkaloya masewalme in takat yewal amo takakiya,
okikalakti Yehshwa inindedo' pa moshte omente ininnakaswam in takat,
kishashawil nichihchal pa nilengua in takat.
34 Kwakin tachi pa in takpakIlwikak,
mihyot,
kito:
―Hepata!
―yewal kinek kito:
Ma motap!
35 Haniman,
mo'ishtapok ininnakaswam,
momaka nilengua wan okipewalti tahtoliste kwal.
36 Okinmil Yehshwa pa amo tanawatiloskya;
ma yok miyak kintahtan,
se wan oksep ma yok yehwante kitaketstinemil miyak.
37 Wan in masewalme motapololtiloya miyak,
kitoloya:
―Yewal mochi kwal kichi;
yehwante amo takakiloya kintakakilti wan aki amo tahtoloya ashka yehwante tahtol.