4
Moshé kili Dyos:
―Ten nikchiwas ta amo nishneltokal wan amo kichiwal kina nikinmili?
Ten nikchiwas ta nichilil:
“In WeTatsDyos amo omoneshti monawak?”
2 Kwakin in WeTatsDyos kitahtanili:
―Ten tikpi pa momahwa?
Moshé tanankili:
―Se bara.
3 In WeTatsDyos kili:
―Shihmaka ma wets talpa.
Moshé kimaka in bara pa talpa,
wan ina omochi kowat Moshé kinek omotal kampa okimakas,
4 ma yok in WeTatsDyos kitake pa kimelawas nimahwa pa kikitskiskya nikola kowat.
Pa haniman kwah Moshé okikitski in kowat omochi se bara pa nimahwa.
5 Ka ina taneltokaske kampa omoneshti in WeTatsDyos,
niDyos anmotahwan,
NiDyos AbRaham,
NiDyos Itsak,
NiDyos Yakob.
6 Niyok,
in WeTatsDyos kili:
―Shihkalakti momahwa pa mopecho!
Moshé kikalakti nimahwa pa nipecho pa kimani kikisti,
okit kampa palantikatka kipiyaya kokoliste itok lepraa wan istak kina sekwiste.
7 Kwakin kili in WeTatsDyos:
―Oksep shihkalakti momahwa pa mopecho!
Moshé oksep okikalakti nimahwa pa nipecho,
kwah kikisti nimahwa pa nipecho,
katkaya kwal tapahtil kina mochi nikwerpo.
8 Kwakin in WeTatsDyos kili:
―Ta ka in ta'ishpa taneshtiliste amo mishneltokal,
amo mishkakil,
hanwel mishneltokaske ka in okse taneshtiliste.
9 Ta amo mishneltokal amo mishkakil ka in ome taneshtiliste,
shikonan tipit at pa atenko Nilo wan shihnok pa tal wak.
In at yewal tihkistis pa atenko Nilo mochiwas yEste pa haniman kwah monokis pa tal.
10 Moshé kili WeTatsDyos:
―Tats,
newal amokwal kina nikitos,
ina yewal amoten yalwa wan yawipta,
ni'ashka yewal titahto ka ina motekipanol tewal.
Kampa amokwal nitahto wan ten nikinmilis kwah nitahto.
11 In WeTatsDyos kili:
―Akyewal okichi nikamak in takat?
Ak okichi pa se masewal yewal amo takak,
amo tahto wan in amo tachi wan kichi pa tachiyas,
hanwel amo ninewal in WeTatsDyos?
12 Shi kampa newal niyes monawak pa kimani titahtos wan nimishnawatis ten tikitos.
13 Moshé kito:
―Aah Tats!
Nimishtahtani pa tiktitanis okse.
14 Kwakin in WeTatsDyos okwalan inak Moshé wan kili:
―Kwal onka,
nimishtitanilis se pa mishpalewis,
monohni Arón in lewita yewal kimat tahto kwal,
kampa wal pa ni'ot pa mishpashalos.
Kwal tamatis pa kimani michitas.
15 Shitakets inak yewal wan shiktakichil in ten tihnek pa kitos.
Newal niyes monak wan inak yewal pa kimani tahtoske wan annimishnawatis in ten monek pa kichiwaske.
16 Yewal tahtos pa tewal ka in masewalme,
kina ta tewal titahtotiyaskya wan tewal tiktakichilis yewal pa newal,
kina ta Dyos isel yeskya pa kitakichiliskya.
17 Ma yok amo shikilka pa tihwikas in bara monak,
kampa ika yewal tikchiwas taneshtiliste.
Moshé mokwep pa tal Egipto
18 Moshé omokwep kaha ni'icha Yetró,
nimontats wan kili:
―Shinishka ma nimokwep pa Egipto,
kampa nihnek niyas kaha kat nonohniwan.
Niyas nikinmitas ta yoltikat.
Yetró kinankili:
―Shi ka sewiliste.
19 Pa Midyán,
in WeTatsDyos niyok kili Moshé:
“Shimokwep pa tal Egipto,
kampa omikik inik kinekiloya mishmiktiloskya.”
20 Kwakin Moshé okiwik nisiwa wan ininpilwam,
okintal pa se burro wan omokwep pa Egipto.
Pa nimahwa kiwikaya nibara Dyos.
21 In WeTatsDyos niyok okil Moshé:
“Kimani timokwepas pa Egipto,
shikilnamik mochiten inik ten tapololti yewal oniktal pa momahwam wan shikchi ni'ishpa in para'ó.
Newal nikchiwas,
pa kichikawalti niyol pa amo kinmakawas pa yaske isra'elita'.
22 Kwakin tikilis para'ó,
in WeTatsDyos kito:
“Isra'El yewal nokon we.
23 Nimishtahtani pa tihkawas nokon pa walas nichilis tahtolme wehwe.
Ta amo tihnek tihkawas,
nihmiktis mokon yewal ta'ishpa otakat.’”
24 Kwah yawiya pa Egipto,
Moshé omose pa ot pa kochiskya.
In WeTatsDyos omo'it inak Moshé ompa kaha moseptikatka okinek okimikti.
25 Ma yok nisiwa Moshé yewal itoka Shépora okonan se kochiyo tachiwal ka tet wan kikotonili nikwerit kaha mashishal,
in nikon okonan in kwerit wan okitalil pa nipyerna Moshé.
Kwakin nisiwa kili Moshé:
“Ka niyEste nokon timopaleptik.”
26 Kwakin in WeTatsDyos opanoti ka yewal.
Nisiwa kito,
notaka in yEste,
kampa oye takotonil nikwerit kaha mashishal.
27 In WeTatsDyos kili Arón:
“Shi shihnamik Moshé ompa pa se tal kaha amo'ak mochantiyaya.”
Arón oy wan okinamik Moshé pa nitepetLom Dyos,
wan kitenamik pa nishayak.
28 Kwakin Moshé kitakichili Arón mochi in ten WeTatsDyos kiliyaya wan mochi inik taneshtiliste yewal kili pa kichiwas.
29 Moshé wan Arón oyak wan kinnotsak moshte inik Abwelolme Wehwetsim ka inik isra'elita',
30 Arón kintakichili mochi in ten WeTatsDyos kiliyaya Moshé,
kwakin kichiwaya inik taneshtiliste ininishpa masewalme,
31 moshte inik masewalme kineltokak kampa yewal in WeTatsDyos katkaya inak yehwante wan kimatiya kampa panotikatkaloya yolkokoliste,
wan inik isra'elita' mokwalpacholoya talpa wan kitahtoltiloya in Tats.