2
1 Otam okichi Dyos takpakIlwikak wan mochital,
wan mochiten onka pa mochital.
2 Pa chikome tonatim,
Dyos mosewiyaya
kampa tamiyaya nitikipanoliste ten kichiptikatkaya.
3 Wan kimashti Dyos pa tonat chikome,
okichi se tonat we,
pa yewal mosewi kwah otam okichi mochi nitikipanoliste.
4 Ina nitapowaliste ka ipewaliste
ka takpakIlwikak wan mochital kimani oyek tachiwalme.
Génesis 2.4-25
In masewal kaha motashot itok Edén
Kimani Dyos in WeTatsDyos okichi mochital wan takpakIlwikak,
5 wan mochi tashosholtik pa kwawim kimani ayamo kisaloya shosholtik,
kampa Dyos in WeTatsDyos ayamo kiwaltitaniyaya kyawit pa mochital wan amo katka masewal kitikipanoskya tal.
6 Ma yok,
nalkistikatka pa tal nitonalmikiliste at ki'ahwiliyaya mochital.
7 Kwakin Dyos in WeTatsDyos okichi se masewal ka nipohtiTal,
wan okipits pa niyakatsol ka ni'ihyo kimak yoliliste,
wan ye se masewal yolke.
8 Wan Dyos in WeTatsDyos okitok se kwahmil itok Edén kaha kis tonat,
ompa okika masewal yewal okichi.
9 Dyos in WeTatsDyos okichi pa kisaloskya kwawim kwal nesiloya inintaki pa kikwaloskya.
Ipanta tashotanilme katkaloya ome kwawim,
se tayolti,
wan okse kimashti ten kwal wan ten amokwal.
10 Kistikatka pa Edén se atenko we ki'ahwiliyaya in kwahmil,
kipiyaya nawi nimashaltik atenko.
11 Se itoka Pishón,
wan kiyawalowaya tal Hawilá,
kampa katka oro.
12 In oro kina kwal katka pa in tal,
niyok onka ompa kwawitito ahwiyal kwal fragante wan niyok ompa onka tet itok onish.
13 In okse atenko itok Gihón,
in atenko kiyawalo in tal itoka Kush.
14 In okse atenko itok Tigris,
wan totok pa itenko pweblo Asirya kaha walkis tonat.
Wan in okse atenko itoka Éprates.
15 Dyos in WeTatsDyos okika in masewal pa kwahmil Edén pa kitikipanoskya wan kikwitawiskya,
16 wan WeTatsDyos kili masewal:
“Pa mochi inik kwawim takilme kwal tewal tikwas,
17 ma yok kwawit kinmashti ten kwal wan ten amokwal amo tikwas,
kimani yewal tonat tikwas melak timikis.”
18 Kwakin Dyos in WeTatsDyos kito:
“Amokwal isel yes masewal.
Nikchiwilis se pa kipaleptiyas se nihni nesis kina yewal.”
19 Wan Dyos in WeTatsDyos okinchi ka tal mochi inik tekwanim yolil ka takam wan yolil pa kwawim wan mochi totom pa takpakIlwikak,
wan okinwikil masewal pa kintokayoltiskya.
Yewal takat kintokayolti,
yok kina ashka itokal.
20 Yok kintokayolti mochi inik tekwanim yolil pa kwawim,
wan totom pa takpakIlwikak wan inik yolil ka takam.
Ma yok,
masewal amo okit ak kipalewiskya se nihni nesis kina yewal.
21 Kwakin Dyos in WeTatsDyos okikochilti masewal chikawak,
kwah koshtikatka,
kikishtil se ni'omita tanakastekal wan okitsakwa oksep inaka.
22 Ka ni'omit kostiya masewal,
okichi WeTatsDyos se siwat okiwikil masewal,
23 kito masewal:
 
“Ashka,
ina no'omit ka no'omit
wan inaka nonaka.
Itoka siwat
kampa takishtiliste katka pa takat.”
 
24 Kampa se takat kikawas nitats wan ninantsi,
motakitskilti inak nisiwa,
wan yeske se han inakayo.
25 Kampa takat wan nisiwa amo kipiyaloya shashalme,
ma yok amo pinawaloya.