In takat wan siwat amo kineltokak Dyos
3
In kowat kimatiya tekwamanaya,
amoyok moshte kimatiloya oksek yolikilme,
tekwanim mochantil pa kwawim wan in tekwanim kintikipanol takam,
yewal kinchiwaya Dyos in WeTatsDyos.
In kowat kili siwat:
Kampa melak anmichili Dyos pa amo ankikwaske nitaki inik kwawim pa kwahmil?
2 In siwat kinankili in kowat:
―Kwal tikwaske inintaki kwawim pa kwahmil.
Génesis 3.1-24
3 Ma yok otichil Dyos:
“Amo tikwaske wan amo tihkitskiske nitaki kwawit,
yewal onka ipanta kwahmil,
ma yok timikiske.”
4 Kwakin kowat kili siwat:
―Amo anmikiske!
5 Kampa Dyos kimat,
ta ankikwak nitaki,
kwakin melak anmehwante ankimatiske kampa anmo'ilnamikiske anmo'ishtaposke anmoshtololme anyeske kina Dyos,
ankimatiske ten kwal wan ten amokwal.
6 Kwakin siwat okit kwawit nitaki kina kwal nestikatka pa kikwaskya,
wan niyok kinekiya kimatiskya tamatiliste,
kwakin okonan se nitaki wan okikwa.
Niyok okimak nitaka,
yewal katka inak wan niyok yewal okikwa.
7 Kwakin haniman mo'ilnamikik ten okichiwak,
wan katkaloya nakatilme.
Kwakin kitsomak sek ni'iswam igo' pa motakemiltiloskya.
8 Kikakiloya Dyos in WeTatsDyos pek nehnemiya pa kwahmil kwah katka ta'istikit pa tyotakit,
kwakin kitatilik tsalakwawim pa kwahmil.
9 Ma yok okinots Dyos in WeTatsDyos takat wan kili:
―Kaha ti'onka?
10 Wan yewal kinankili:
―Onimishkak pa kwahmil,
wan nimomapti kampa nikatka nakatil wan onimotat.
11 Kwakin Dyos kitahtanili:
―Ak yok michili kampa tikatka nakatil?
―Otikwa nitaki kwawit yewal nimichili amo tikwaskya?
12 Wan yewal takat kinankili:
―In siwat yewal otishmak pa yes nonihni onishmak tahko taki,
wan newal onikwa.
13 Kwakin Dyos in WeTatsDyos kili siwat:
―Ten otikchi?
Wan kito siwat:
―In kowat onishkwaman kwakin onikwa taki.
14 Kwakin kili Dyos in WeTatsDyos in kowat:
“Kampa yok otikchi in,
nimichilis kampa amokwal mishyaptiyas ika mochi tekwanim,
yolil ka takam,
wan mochi tekwanim yolil pa kwawim!
Pa kimani tiyoltiyas timowilanas,
wan tikwas mochi inik tonatim nipohtiTal.
15 Wan nikchiwas kampa tewal wan siwat,
mokokolitiyaske niyok mokolinchim wan nikolinchim in siwat,
nikolinchim siwat kishakwalo motsontek,
wan tewal tikwas nikshi.”
16 Kili siwat:
“Nihmiyapti motakokoliste kwah ti'ostitiya,
nimishtakokoltis ka takokoliste tiktakatiltis mokon.
Ma yok tihnekis motaka yes ka tewal.
Yewal kipiyas chikawaliste ipa tewal.”
17 Wan takata kili:
“Kina otikchi kina michili mosiwa,
wan otikwa nitaki yewal nimichili amo tikwaskya!
Nimichilis kampa amokwal kiyaptiyas in tal!
Ka takokoliste titakwas
pa hanse tonatim tiyoltiyas.
18 Wistim wan tsetsekalot mochiwaske,
wan tikwas shosholtik tashotanilme.
19 Ka motonalmikil titikipanos miyak pa yok titakwas mochi inik tonatim tiyoltiyas,
yok tiyes pa mochi inik tonatim kimani timikis wan timokwepas pa tal
onimishchi ka nipohtiTal.
Kampa timochiwas nipohtiTal
wan timochiwas pohtital kwah timikis.”
20 Adán okitokayolti nisiwa Hawa,
kampa yewal ininnantsi moshte kishki yoltikat.
21 Kwakin Dyos in WeTatsDyos okinchiwil takatb wan nisiwa shashalme ka nikwero tekwanim wan yok okintakemilti.
22 Wan kito Dyos in WeTatsDyos:
“Ashka takat omochi kina tehwante,
kimat ten kwal wan ten amokwal.
Ta kitekiskya nitaki kwawit tayolti,
wan pa kikwaloskya wan yok yoliske hanse.”
23 Kampa okikishti Dyos in WeTatsDyos pa kwahmil Edén,
pa kitikipanoskya tal kampa okichi ka nipohtiTal.
24 Kimani okikishti takat pa kiyawak,
okital pa itenko kwahmil Edén kaha kis tonat sek yolil itokal kerubine',
wan se teposte tatatitikatka wan kati momalintikatkaloya kina tapitaniliste,
kikwitaptikatkaloya ot pa amo'ak kalakiskya pa kwahmil kaha katka kwawit tayolti.