Kalingata n katagarda ke kenu
10
Ɗa kpamu me enei kene,
ɗa me enei kalingata ku utsura a̱ kuta̱ gaɗi.
U shiyai keleshu u ka̱ra̱Ꞌa̱ka̱i ka̱ci ka̱ ni an mayaga,
n vukamba kpamu a kaci ka̱ ni.
Ɗa a̱shi a̱ ni a akanai an kanna,
ene a̱ ni kpamu an akina a na a̱ ɗenga̱i tsu nshukpu.
2 U ka̱na̱i katagarda ke kenu ka na ki uɓa̱yuwi.
U shamgbai n kune ku usingai ku ni a mala,
n kune ku ugula̱ ku ni kpamu a iɗika.
3 Ɗa wo orukpoi n ka̱la̱ka̱tsu n kacaꞋa ka na ki ci izumgbi i ikawu.
Ana wo orukpoi,
ɗa akpanga e cindere a̱ ushuki.
4 Ana akpanga e cindere a yaꞋin kadanshi,
ɗa n gita̱i kuɗana.
Amma ɗa m panai ka̱la̱ka̱tsu gaɗi ka danai,
“Sokongu mayin ili i na akpanga e cindere a a danai,
ka̱ta̱ vu ɗana i ɗa ba.”
5 Kalingata ka na ka shamgbai a mala koɓolo n iɗika ya ka̱ ɗengusa̱i kukiye ku usingai ku ni a kubana gaɗi.
6 Ɗa u kucinai n kula ku Ka̱shile,
vuza na u tsu kuwa̱ ba,
n vuza na u yaꞋin gaɗi n iɗika m mala n ili i na yi punu dem,
a na wi a kudansa ili i mayun.
U danai,
“Ka̱shile ko kudoku ka vana ka̱ta̱ u yeve u yaꞋan ili i na u sheshei ba.
7 Amma kalingata ke cindere ka̱ lika̱ baci kavana ka̱ ni,
Ka̱shile ki ta̱ a kuyaꞋan ili i na yi ishi lo usokongi ali gogo na,
uteku u na u danai agbashi a̱ ni,
eneki.”
8 Ɗa ka̱la̱ka̱tsu ka na ki gaɗi va ko doku ke ɗekei mu kpamu:
“Bana vi isa katagarda ka na a̱ ɓa̱yuwa̱i va,
ka na Kalingata ka na ka shamgbai a mala koɓolo n iɗika ki a̱ kuɓa̱na̱ va.”
9 Ɗa m banai u kalingata ka,
ɗa n danai ni u neke mu katagarda ke kenu ka.
Ɗa u danai mu,
“Ɗika katagarda ka ka̱ta̱ vu takuma kaꞋa.
A̱ una̱ u nu ki ta̱ o kuyokpo ci ishigi,
amma ki ta̱ a kuyaꞋan okono a̱ ka̱tsuma̱ ka̱ nu.”
10 N ɗikai katagarda ka na wi a̱ kuɓa̱na̱ va,
ɗa n takumai kaꞋa.
Ɗa ko yokpoi ci ishigi a̱ una̱ u va̱,
amma ana n soɗongi kaꞋa,
ɗa ka kukucikpa ko bonoi okono a̱ ka̱tsuma̱ ka̱ va̱.
11 Ɗaɗa a danai mu,
“Mayun ɗa vu sala kpamu gogo na ili i na Ka̱shile ke sheshei kuyaꞋanka uma a iɗika n a̱bunda̱i n umaci,
aza a na i a kudansa kelentsu kakau,
nu ngono ra̱ka̱.”