9
Ɗaɗa kalingata ka tawun ka̱ lika̱i kavana ka̱ ni.
Ɗa me enei ili an kazangata ka na ka̱ yikpa̱i a iɗika.
Ɗa kazangata ki isai kagbaguratsu adama a na u ɓa̱yuwa̱ kpenle ku zururu.
2 Ana u ɓa̱yuwa̱i ku ɗa,
ɗa ka̱nga̱ ku uta̱i a kpaꞋa ka akina ku na ki n usuɗukpi ka̱u.
Ka̱nga̱ ka ka̱ ɗenga̱i ɗa ka shanai gaɗi ali kaꞋa ka palai kutashi ku kanna,
ɗa ubuta̱ wo okpoi n ka̱yimbi.
3 Ɗa akyuꞋun n a̱bunda̱i a̱ uta̱i ɗe a̱ ka̱nga̱ ka,
ɗa a̱ cipa̱i a iɗika,
ɗa e nekei le utsura u na a taɗa uma tsa adyaɓu.
4 Ɗa a danai le,
“U gaꞋan ta̱ i taɗa aza a na i babu urotu u Ka̱shile a̱ a̱ca̱n e le.
Amma ka̱ta̱ i taɗa nɗanga ko ica̱Ꞌa̱shi ba.”
5 Ka̱shile ka zuwai le e neke uma mɓa̱la̱ ka̱u n a̱bunda̱i n na n laꞋi n na m buwai,
ali wotoi u tawun,
amma u ka̱sa̱kpa̱ a una le ba.
Mɓa̱la̱ n na a kupana n yotso ta̱ uteku u na kudyaɓu ku tsu taɗa vuza ka̱ta̱ u ɓa̱la̱.
6 A̱ ka̱tsuma̱ ka ayin a nan lo,
uma i ta̱ a̱ kula̱nsa̱ ukpa̱,
amma a̱ kuciya̱ u ɗa ba.
A kuciga ta̱ a̱ kuwa̱,
amma a kufuɗa ba.
7 AkyuꞋun a nam pa i ta̱ an tsa odoku a na i ufoɓushi adama a na a bana kuvon.
I ta̱ n oroliko o tsugono a azanariya a aci e le,
n ukambu u a̱shi tsu uma.
8 A̱nji e le kpamu ugaɗi ugaɗi an ka̱nji ka vuka,
anga e le an anga a ikawu.
9 A ukai ntogu mi iyum a̱ nka̱nga̱ n le.
KacaꞋa ka na evelyu e le a yaꞋin ki ta̱ tsu na odoku o kuvon n a̱bunda̱i a ci yaꞋan moloko a kubana a̱ ubuta̱ u kuvon.
10 Nu ntaɗatsu a winja n na n kuneke le utsura u kuzuwa uma o soꞋo atakaci ali wotoi u tawun.
11 Mogono me le a̱yi ɗa kalingata ka na ki a kulyaꞋa tsugono e kpenle ku zururu.
Kula ku ni ku ɗa MalyaꞋi.
(N ci Ciyahuda ɗaɗa Abadon,
n Cihelene ɗaɗa Afoliyon).
12 Atakaci a iyain o kotso ta̱.
Amma atakaci e re a buwa ta̱ a na a̱ ta̱wa̱.
13 Ɗa kalingata ka̱ ta̱li ka̱ lika̱i kavana ka̱ ni.
M panai ka̱la̱ka̱tsu a kadanshi a̱ kuta̱ punu e mere ma avana a katalikalyuka ka azanariya ka na ki e kelime ka̱ Ka̱shile.a
14 Ka̱la̱ka̱tsu ka danai kalingata ka̱ ta̱li ka na ki a̱ kuɓa̱na̱ kavana ka,
“Shikpa alingata a̱ na̱shi a na Ka̱shile ka shiyai o kuɗolu ku gbayin ku Yufiriti ka.”
15 Ɗaɗa kalingata ka̱ ta̱li ka ka shikpai alingata a̱ na̱shi a nan lo a na a̱ uta̱i kuna vuza te te a̱ ka̱tsuma̱ ka uma a tatsu a na i a aduniyan a.
Ka̱shile ko foɓuso le ta̱ ɗe a yaꞋan nannai a̱ ka̱tsuma̱ ka ayin a nam pa a.
16 Alingata a a ukai osoji a na a kumbai odoku a kelime.
M pana ta̱ a danai i ta̱ lo ali uma mbana amangatawenre (200,000,000).
17 I na me enei tsalatani kpamu,
me enei odoku n aza a na a kumbai le.
A ukai ntogu mi iyum a̱ nka̱nga̱ n le n na mi ushili tsa akina,
m bulu tsu kokocilili,
koɓolo m mini mo tsuloꞋo.
Aci o odoku a an aci a ikawu,
n akina kpamu n ka̱nga̱ n farinwuta a̱ kuta̱ a̱ una̱ u le.
18 Ndukpa̱ n tatsu n nam pa ma,
(n ɗaɗa akina n ka̱nga̱ n farinwuta a̱ kuta̱ a̱ una̱ wo odoku wa) a una ta̱ vuza te te a̱ ka̱tsuma̱ ka uma a tatsu a na i a aduniyan.
19 A̱ una̱ wo odoku u ɗa koci ba,
amma ali n winja u le dem o kuforo uma.
Winja u le wi ta̱ an oko n aci a kuluma uma.
20 Amma uma a na a̱ kpa̱ɗa̱i kukuwa̱ nu ndukpa̱ n nan lo ali n gogo na a̱ ka̱sa̱kpa̱ ulinga u gbani-gbani u le ba.
A lyaꞋi kelime n kucikpa wunla̱i u gbani-gbani n a̱ma̱li a na a̱ luwa̱i n azurufa n azanariya,
n iyum i shili.
Ɗa kpamu e sheꞋwei o yoku n atali,
nu nɗanga.
A̱ma̱li a nam pa e ce ene ko a pana ko a wala ba!
21 Uma a nam pa a̱ ka̱sa̱kpa̱ munanai,
ko kuyaꞋan nkunu n na n laꞋi m gbani-gbani,
ko tsugbani,
ko uboki ba.