2 Ɗaɗa u danai le,

“Yi baci a kuyaꞋan kavasa,

i dana:

5 Ɗa u danai le kpamu,

“Vuza yoku vu ɗa̱ wi baci n ka̱ja̱Ꞌa̱,

ɗa u banai wa̱ ni n kayin,

ɗa u danai,

‘Ka̱ja̱Ꞌa̱ ka̱ va̱,

kopuku mu burodi vu tatsu.

6 Adama a na komoci ko yoku ka̱ cipa̱ ta̱ wa̱ va̱.

Mi ta na n ili i na n kuneke yi u lyaꞋa ba.’

7 “Ɗaɗa vuza na wi punu a asuvu a,

ɗa wu ushuki,

‘Ka̱ta̱ vu takacika mu ba.

Utsutsu u yaꞋan ta̱ ɗe ugbaguri,

muku n va̱ kpamu a lata ta̱ ɗe a kajiba na nu mpa.

Mi a kufuɗa kuɗenga̱ ka̱ta̱ n neke ɗa̱ ili ba.’

8 N dana ɗa̱,

ko wi a kufuɗa kuɗenga̱ ka̱ta̱ u neke yi burodi va adama a na wi ka̱ja̱Ꞌa̱ ka̱ ni ba,

amma adama a uteku u na u lyaꞋi kelime n kutakacika yi,

wi ta̱ a̱ kuɗenga̱,

ka̱ta̱ u neke yi ili i na u cigai dem.

9 “YaꞋan n dana ɗa̱:

Folonosoi,

e kuneke ɗa̱ ta̱.

La̱nsa̱sa̱i,

ya̱ kuciya̱ ta̱.

Ka̱la̱sa̱i utsutsu,

a̱ kuɓa̱yuwa̱ka̱ ɗa̱ ta̱.

10 Vuza na baci dem wi o kufolonoso,

u kisasa ta̱.

Vuza na wi a̱ kula̱nsa̱sa̱,

u kuciya̱sa̱ ta̱.

Vuza na kpamu wi a̱ kuka̱la̱sa̱ utsutsu wa,

a̱ kuɓa̱yuwa̱sa̱ka̱ yi ta̱.

11 “Kesheku ke ne kaꞋi,

maku ma̱ ni mo folono yi baci kadan,

ka̱ta̱ u neke yi koko?^a

12 Ko u folono yi baci kokowo,

ka̱ta̱ u neke yi kudyaɓu?

13 A̱ɗa̱ na yi uma a gbani-gbani i yevei kuneke muku n ɗa̱ ili i singai.

Esheku a̱ ɗa̱ a na i gaɗi tamkpamu,

a laꞋa ta̱ biꞋi,

wi ta̱ ufoɓushi ka̱u adama a na u neke aza a na o folonoi ni Ayinviki a̱ Ka̱shile!”

14 Kanna ke te,

Yesu wu uta̱ka̱i n wunla̱i u gbani-gbani u tsubebe.

Ana wunla̱i u gbani-gbani wa u lazai,

vuza na wi ishi kebebe ka ɗa u dansai.

Ɗa koɓolo ka uma ka yaꞋin mereve.

15 Amma aza o yoku e le a danai,

“Wi ta̱ o kuloko wunla̱i u gbani-gbani n utsura u BaꞋalzabu mogono ma̱ wunla̱i u gbani-gbani.”

16 Aza o yoku o kondoi ni o kufolono yi u yaꞋanka le urotu u na wu uta̱i gaɗi.

17 Yesu u yevei ili i na e kusheshe,

ɗa u danai le,

“Tsugono tsu na baci ci pecuki ka̱ci ka̱ ni,

ci ta̱ a̱ kukuwa̱.

KpaꞋa ku na baci kpamu ku pecuki ka̱ci ka̱ ni ki ta̱ a̱ kuyikpa̱.

18 MalyaꞋi me pecuku baci ka̱ci ka̱ ni,

nini ɗai tsugono ci ni tsa kushamgba?

N dana ta̱ ili i nam pa ya,

adama a na a̱ɗa̱ i dana ta̱ n loko ta̱ wunla̱i u gbani-gbani wa n utsura u BaꞋalzabu.

19 Gogo na,

mu uta̱ka̱ baci wunla̱i u gbani-gbani n utsura u BaꞋalzabu,

n utsura we ne u ɗai tamkpamu otoni a̱ ɗa̱ o tsu lokoko?

To,

na lo va,

ele i ta̱ a̱ kilukpa̱ ɗa̱ adama a ili i na i danai.

20 Amma n loko baci wunla̱i u gbani-gbani n utsura u Ka̱shile,

tsugono tsu Ka̱shile tsu ta̱wa̱ ta̱ wa̱ ɗa̱ ta na.

21 “Vuza vu utsura n yunatsu i gbayin u shamgba baci a kinda kpaꞋa ku ni,

ucanuku u ni ra̱ka̱ u kuyongo ta̱ m ma̱ta̱na̱.

22 Amma vuza yoku vu na u laꞋi ni n utsura wi ta̱ a kisa yunatsu i na wi a kuyaꞋanka a̱ra̱ɗi a,

ka̱ta̱ u ɗika ucanuku wa.

23 “Vuza na wi koɓolo nu mpa ba,

wi ta̱ a tsurala nu mpa.

Vuza na baci u ɓa̱nga̱i mu kuɓolongu ba,

wi ta̱ a kuwacuwa.

24 “Wunla̱i u gbani-gbani wu uta̱ baci u vuza,

u tsu tono ta̱ n ubuta̱ u na wi babu mini a̱ kula̱nsa̱ ubuta̱ u kuvuka,

amma u kuciya̱ u ɗa ta na ba.

Ka̱ta̱ ta na u dana,

‘Mi ta̱ o kubono a kpaꞋa ku na mi ishi.’

25 Ayin a na baci u yawai,

wi ta̱ a kucina kpaꞋa ka upura̱ngi,

n wadani kpamu derere.

26 Ka̱ta̱ u bana u doku wunla̱i u gbani-gbani kpamu ali uma e cindere,

aza a na kpamu a laꞋi ni n wuya-wuya,

ka̱ta̱ a uwa punu o yongo.

Ka̱ta̱ atakaci a vuza nan lo,

a laꞋa uteku u na i ishi n ugiti.”

27 An Yesu wi a kadanshi ki ili i nan lo,

ɗa vuka punu a̱ ka̱tsuma̱ ka uma ka,

u ɗengusa̱i ka̱la̱ka̱tsu,

“Una̱singai u ɗa̱ wa̱ a̱na̱vu a na a matsai nu,

ɗa o woꞋi nu.”

28 Ɗa wu ushuki,

“Amma una̱singai u laꞋa ta̱ a kubana wa aza a na a panai kadanshi ka̱ Ka̱shile,

ɗa o tonoi kaꞋa.”

29 Ana koɓolo ka uma ka,

ko doki,

ɗa Yesu u danai,

“Uma a anana a gbani-gbani a ɗa.

A cigai urotu u mereve,

amma ko u te a̱ kuciya̱ ba,

sai u keneki Yunusa koci.

30 Tsu na Yunusa wo okpoi urotu u Niniva,

ta kpamu Maku ma Vuma u kokpo u uma a anana a nam pa nannai.

31 Mogono ma vuka me Sheba mi ta̱ a̱ kuɗenga̱ a̱ ubuta̱ wa afada n uma a anana a nam pa,

ka̱ta̱ u neke le unushi.

Wu uta̱ ta̱ daꞋin ka̱u adama a na we ene kuyeve ku Sulemanu.

Gogo na kpamu vuza na u laꞋi Sulemanu wi ta̱ na.

32 Uma a Niniva i ta̱ a̱ kuɗenga̱ kashani a kanna ka afada n uma a anana a nam pa,

ka̱ta̱ e neke le unushi.

Adama a na ele a̱ shika̱ ta̱ unushi u le a̱ ubuta̱ u kadanshi ka Yunusa.

Gogo na ta na vuza na u laꞋi Yunusa wi ta̱ na.

33 “Babu vuza na kudyaɓa ma̱kuni,

ka̱ta̱ u sokongu maꞋa ko u zuwa ɗaka vu kasasu.

Sai a zuwa maꞋa gaɗi vu kashamkpatsu ka̱ ni,

ka̱ta̱ vuza na wi a kuꞋuwa dem we ene kutashi.

34 A̱shi a̱ nu a ɗa kutashi ki ikyamba ku nu.

A̱shi a̱ nu a gaꞋan baci,

ikyamba i nu ra̱ka̱ yi ta̱ n kutashi.

Amma a gaꞋan baci ba,

ikyamba i nu ra̱ka̱ yi ta̱ a kuyaꞋan n ka̱yimbi.

35 La̱na̱ biꞋi ko kutashi ku na ki a̱ nu ka̱yimbi kaꞋa.

36 Adama a nannai,

ikyamba i nu ra̱ka̱ yi baci n kutashi,

babu kakambu ko yoku ka na ki n ka̱yimbi.

U kuyaꞋan ta̱ n kutashi gbende,

tsu na kutashi ku ma̱kuni ku tsu akana wu hawun.”

37 Ayin a na Yesu u kotsoi kadanshi,

ɗa Kafarishi ka banuki ni kulyaꞋa ki ilikulyaꞋa.

Ɗa u banai a kpaꞋa ku ni ka,

ɗa u da̱sa̱ngi kulyaꞋa.

38 Amma ana Yesu u kpa̱ɗa̱i kusaꞋa ekiye kafu u lyaꞋa,

ɗa Kafarishi ka ka yaꞋin mereve.

39 Ɗa Vuzagbayin u danai ni,

“A̱ɗa̱ Afarishi,

i tsu za̱Ꞌa̱ ta̱ nkoꞋo nu nvene pulai koci,

amma punu a̱ a̱ɗu a̱ ɗa̱,

sai ulyopi n kagbani-gbani.

40 A̱ɗa̱ alau a ɗa!

A̱yi vuza na u yaꞋin pulai,

a̱yi ɗa kpamu u yaꞋin asuvu ba?

41 Amma neke aza a unambi ili i na yi e mevene,

adama a na ili ra̱ka̱ i nu yo okpo babu ka̱biꞋin.

42 “Atakaci i ta̱ a kuvana ɗa̱ Afarishi,

adama a na i neke ta̱ Ka̱shile ili i te a̱ ka̱tsuma̱ ka kupa ki ili i na i ciya̱i dem,

ali n ili kenkeꞋen i mavaꞋan ma kusan n igeɓetsu.

Amma i kpa̱ɗa̱i kukeɓece n kindana uma derere n ucigi u Ka̱shile.

I gita̱i kuyaꞋan kasingai ka nam pa,

amma ka̱ta̱ i ka̱sa̱kpa̱ ili i na yi ishi a kuyaꞋansa ba.

43 “Atakaci i ta̱ a kuvana ɗa̱,

Afarishi adama a na i laꞋa ta̱ n kuciga ida̱shi i tsugbayin a̱ unu a avasa,

n ikya̱shi i tsugbayin yi baci a kuꞋuwa e kuden.

44 “Atakaci i ta̱ a kuvana ɗa̱,

adama a na yi ta̱ tsa asaun a na i babu urotu a̱ ubuta̱ u ka̱ciɗa̱,

ali uma a wala gaɗi vi le babu kuyeve.”

45 Keyevi ka̱ Wila̱ ko yoku ka danai ni,

“Malum,

ana vu danai ili i nam pa ya,

vi shika tsu ta̱ dem.”

46 Yesu wu ushuki,

“Atakaci i ta̱ a kuvana ɗa̱ feu,

a̱ɗa̱ eyevi a̱ Wila̱,

adama a na i tsu zuwaka ta̱ uma ucanuku wa̱ a̱miki u na a kufuɗa kuɗika ba.

A̱ɗa̱ kpamu n ka̱ci ka̱ ɗa̱ ko n ka̱jivu ke te ya̱ kuɓa̱nka̱ le kuɗika ba.

47 “Atakaci i ta̱ a kuvana ɗa̱,

yi o kufoɓuso asaun e eneki a na ikaya i ɗa̱ yu unai ɗe m megeshe.

48 A̱ɗa̱ yi a kupana uyoꞋo n ili i na ikaya i ɗa̱ i yaꞋin,

a unai eneki,

a̱ɗa̱ tamkpamu i foɓusokoi le asaun mayin.

49 Adama a nannai,

Ka̱shile n kuyeve ku ni u danai ɗa̱,

‘Mi ta̱ a̱ kusuku le eneki n azusuki,

aza o yoku a una,

ka̱ta̱ e neke aza o yoku atakaci.’

50 Adama a nannai,

uma a anana a nam pa a kuɗika ta̱ unushi wu mpasa u eneki wa ra̱ka̱ a na a unai ali n ayin a̱ ugiti wa aduniyan.

51 A̱ gita̱ a mpasa n Habila a kubana n Zakariya vuza na a unai e mere ma katalikalyuka o Mololo ma Ciɗa.^b

E,

n dana ɗa̱,

uma a anana a nam pa i ta̱ a kuɗika unushi u le ra̱ka̱.

52 “Atakaci i ta̱ a kuvana ɗa̱ eyevi a̱ Wila̱,

adama a na i ɗika ta̱ ɗe kagbaguratsu ke kuyeve.

A̱ɗa̱ a̱ ka̱ci ka̱ ɗa̱ i uwa ba,

i ka̱sa̱kpa̱ kpamu aza a na a cigai kuꞋuwa a uwa ba.”

53 Ana Yesu u ka̱sa̱kpa̱i ubuta̱ u nan lo,

ɗa Afarishi nu nlum n Wila̱ a̱ ka̱na̱i kula̱nsa̱ tsu na a̱ kuka̱na̱ yi.

Ɗa a̱ ka̱na̱i kuyaꞋanka yi keci n a̱bunda̱i ku gbagbaꞋin,

54 adama a na a̱ ciya̱ a̱ ka̱na̱ yi n ili i na u kudansa.